[1] Мәһа сьсийада зар'ед Исраел пәй дәрк'әтьна Мьсьрер'а, һәма wе р'оже гьһиштьнә бәр'ийа Синайе.
[2] Жь Р'ьфидиме р'ек'әтьн чунә бәр'ийа Синайе у бәр'ийеда конед хwә вәгьртьн. Исраел ль wе дәре бәр ч'ийе конед хwә вәгьртьн.
[3] Муса һьлк'ьшийа щәм Хwәде у Хӧдан жь ч'ийе гази wи кьр у готе: «Аһа бежә мала Аqуб у зар'ед Исраелва бьдә ә'йанкьрьне:
[4] ‹Wә дит мьн чь ани сәре мьсьрийа у һун чаwа һьлдан ль сәр п'әр'ед тәйре симьр' анинә щәм хwә.
[5] У ньһа һәгәр һун р'аст гӧр'а мьн бькьн у пәймана мьн хwәйи кьн, һьнге һуне жь нав һ'әму мьләтада бьбьнә мьлк'е мьн, чьмки т'әмамийа дьне йа мьн ә.
[6] Һуне жи мьнр'а бьбьнә п'адшатийа к'аһина у мьләтәки бӧһӧрти›. Әв ьн әw готьн кӧ тӧ гәрәке зар'ед Исраелр'а бежи».
[7] Муса һат гази р'усьпийед щьмә'те кьр у һ'әму хәбәред кӧ Хӧдан т'әми дабу wи бәр wан дани.
[8] У т'әмамийа щьмә'те һәвр'а щаб да у гот: «Һ'әму готьнед Хӧдан әме бькьн!» У Муса готьна щьмә'те гиһандә Хӧдан.
[9] Хӧдан готә Муса: «Ва йә әзе нав ә'wрәки сьхда бемә щәм тә, wәки щьмә'т бьбьһе әзе чаwа т'әви тә хәбәр дьм у һәр гав тә баwәр бькә». Муса готьна щьмә'те гиһандә Хӧдан
[10] у Хӧдан готә Муса: «Һәр'ә щәм щьмә'те у wан иро у сьбе паqьж кә, бьра к'ьнщед хwә бьшон.
[11] Бона р'ожа сьсийа һазьр бьн, чьмки р'ожа сьсийа ль бәр ч'ә'ве т'әмамийа щьмә'те, Хӧдане пәйайи сәр ч'ийайе Синайе бә.
[12] Һәр алийава, бона щьмә'те синор к'ьфш кә у бежә: ‹Мьqати хwә бьн, кӧ р'анәбьнә ч'ийе йан жи п'еше к'әвьн. Һәр кәсе кӧ незики ч'ийе бә, гәрәке бьмьрә.
[13] Бьра дәст wи нәк'әвә, ле wи бьдьнә бәр кәвьра йан жи пе тире лехьн, һәгәр һ'әйwан бә йан мәри бә гәрәке сах нәминә›, чахе дәнге бор'ийа жь стьруйе бәрен дьреж бе ледане, һьнге әw дькарьн һьлк'ьшьнә ч'ийе».
[14] Муса жь сәре ч'ийе пәйайи щәм щьмә'те бу, щьмә'т паqьж кьр у wана к'ьнщед хwә шуштьн.
[15] Әwи готә щьмә'те: «Бона р'ожа сьсийа һазьр бьн, незики к'ӧлфәта нәбьн».
[16] Р'ожа сьсийа, гава сьбәһ зәлал дьбу, бу qьр'ч'ин у бьруске бьрq вәдьда, ә'wрәки сьх ль сәр ч'ийе бу у дәнге бор'ийа жь стьру гәләки qайим һат, р'ьсасе ль т'әмамийа щьмә'та зоме гьрт.
[17] Муса щьмә'т жь зоме дәрхьстә ль бәр Хwәде у әw бьнат'ара ч'ийе сәкьнин.
[18] Т'әмамийа ч'ийайе Синайе ду дькьр, чьмки Хӧдан агьрда пәйайи сәр wи бу, дуйе wи мина дуйе фьр'не һьлдьк'ьшийа у т'әмамийа ч'ийе qайим дьһ'әжийа.
[19] Дәнге бор'ийа стьру чьqас дьчу qайим дьбу, Муса хәбәр да у Хwәде бь дәнг щаба wи да.
[20] Хӧдан пәйайи сәр сәре ч'ийайе Синайе бу, Хӧдан гази Муса ль сәр сәре ч'ийе кьр у Муса һьлк'ьшийа.
[21] Хӧдан готә Муса: «Пәйа бә у т'әмийе бьдә щьмә'те, кӧ нәбә бона дитьна Хӧдан жь синор дәрбаз бьн у гәләк жь wан ӧнда бьн.
[22] К'аһинед кӧ wе незики Хӧдан бьн, гәрә әw жи хwә паqьж кьн, кӧ Хӧдан qьр'а wан нәйнә».
[23] Муса готә Хӧдан: «Щьмә'т нькарә р'абә сәр ч'ийайе Синайе, чьмки тә т'әми да мә у гот: ‹Синор дайнә дор ч'ийе у wи пироз кә›».
[24] Хӧдан готә wи: «Һәр'ә пәйа бә у т'әви Һарун һьлк'ьшә, ле к'аһин у щьмә'т жь синор дәрбаз нәбьн кӧ һьлк'ьшьнә щәм Хӧдан у әw qьр'а wан бинә».
[25] Муса пәйайи щәм щьмә'те бу у әв йәк wанр'а гот.