<Дәрк'әтьн 7

[1] Хӧдан готә Муса: «Һәла бьньһер'ә, әз тә дькьмә мина Хwәде бона Фьрәwьн, бьре тә Һарун жи wе бьбә п'ехәмбәре тә.

[2] Һәр тьшти бежи, чь кӧ әзе ә'мьри ль тә бькьм у бьре тә Һарун бьра Фьрәwьнр'а бежә, кӧ зар'ед Исраел жь wәлате хwә бәр'дә.

[3] Ле әзе дьле Фьрәwьн бькьмә кәвьр, нишан у к'әрәмәтед хwә ль нав wәлате Мьсьреда зедә кьм.

[4] Фьрәwьне гӧһдарийа wә нәкә. У әзе дәсте хwә дайньмә ль сәр Мьсьре у р'әфед хwә, щьмә'та хwә, зар'ед Исраел пе диwанед мәзьн жь wәлате Мьсьре дәрхьм.

[5] У һьнге мьсьрийе бьзаньбьн кӧ әз Хӧдан ьм, гава әз дәсте хwә дьрежи ль сәр Мьсьре кьм у зар'ед Исраел жь нав wан дәрхьм».

[6] Муса у Һарун ӧса кьрьн, чаwа кӧ Хӧдан ә'мьри ль wан кьр ӧса жи кьрьн.

[7] Муса һ'әйште сали бу, ле Һарун һ'әйште се сали бу, гава т'әв Фьрәwьн хәбәрдан.

[8] Хӧдан т'әви Муса у Һарун хәбәр да у гот:

[9] «Гава Фьрәwьн т'әв wә хәбәр дә у бежә: ‹Һәла нишанәке бькьн›, wи чахи бежә Һарун: ‹Шьвдара хwә һьлдә бавежә бәр Фьрәwьн›. Әwе бьбә мә'р».

[10] Муса у Һарун к'әтьнә щәм Фьрәwьн у чаwа кӧ Хӧдан ә'мьри ль wан кьрьбу ӧса жи кьрьн. Һарун шьвдара хwә авитә бәр Фьрәwьн у бәр хӧламед wи у әw бу мә'р.

[11] Фьрәwьн жи гази сәрwахт у к'оч'әка кьр у ван сербазед Мьсьре жи бь сербазийа хwә ӧса кьрьн.

[12] Һәр йәки шьвдара хwә давит у әw дьбунә мә'р, ле шьвдара Һарун шьвдаред wан даqӧртандьн.

[13] У дьле Фьрәwьн бу кәвьр гӧр'а wан нәкьр, чаwа кӧ Хӧдан готьбу.

[14] Хӧдан готә Муса: «Дьле Фьрәwьн бу кәвьр, әw нахwазә щьмә'те бәр'дә.

[15] Сәре сьбәһе һәр'ә щәм Фьрәwьн. Ва йә әwе һәр'ә бәрбь аве у тӧ бәр дәве ч'әме Ниле ль бәр wи бьсәкьнә у әw шьвдара кӧ бьбу мә'р бьгьрә дәсте хwә.

[16] Wир'а бежә: ‹Хӧдан Хwәдейе ибранийа әз шандьмә щәм тә у дьбежә: Щьмә'та мьн бәр'дә кӧ бәр'ийеда хӧламтийа мьн бькә, ле ва йә һ'әта ньһа тә гӧһдари нәкьрийә.

[17] Хӧдан аһа дьбежә: «Бь ве бьзаньби кӧ әз Хӧдан ьм». Аwа әзе шьвдара дәсте хwә ава ч'әме Ниле хьм у wе бьбә хун.

[18] Мә'сийед ч'емда wе һ'ьшк бьн у бине бьк'әвә ч'ем, мьсьрийе зьвер бьн кӧ ава Ниле вәхwьн›».

[19] Хӧдан готә Муса: «Бежә Һарун: ‹Шьвдара хwә һьлдә у дәсте хwә дьрежи сәр авед Мьсьре, сәр ч'әмед wан, сәр щәwед wан, сәр голед wан у сәр һ'әму авед wанә т'опбуйи кә у wе бьбьнә хун. Wе т'әмамийа wәлате Мьсьреда, ава дәрданед дар у кәвьрида жи бьбә хун›».

[20] У чаwа кӧ Хӧдан ә'мьри ль wан кьрьбу, Муса у Һарун ӧса жи кьрьн. Һарун шьвдара хwә бьльнд кьр бәр ч'ә'ве Фьрәwьн у бәр ч'ә'ве хӧламед wи ава Ниле хьст, т'әмамийа ава ч'ем бу хун.

[21] Мә'сийед ч'емда һ'ьшк бун у бин к'әтә ч'ем, мьсьрийа нькарьбун жь ч'ем ав вәхwарана. У т'әмамийа wәлате Мьсьреда хун һәбу.

[22] Ле сербазед Мьсьре жи бь сербазийед хwә ӧса кьрьн. Дьле Фьрәwьн бу кәвьр, гӧһ нәда wан, чаwа кӧ Хӧдан готьбу.

[23] Фьрәwьн вәгәр'ийа чу мала хwә, әв йәк сәр дьле wи гьран р'унәньшт.

[24] У һ'әму мьсьри р'абун бона ав вәхwарьне дор-бәре ч'ем к'олан, чьмки ава Ниле нькарьбун вәхwарана.

[25] Пәй ч'ем хьстьна Хӧданр'а, һ'әфт р'ож дәрбазбун.