[1] Һьнге Бьсалел, Оһолиаб у һәр кәсед хwәйифьрасәтә йе кӧ Хӧдан фьрасәти у биланти дабу wан, бона һәр щур'ә шьхӧлед пирозгәһе бьзаньбьн у анәгори т'әмийа Хӧдан бькьн.
[2] Муса гази Бьсалел, Оһолиаб у һ'әмуйед хwәйифьрасәт кьр, дьле к'ижанада Хӧдан фьрасәти данибу, аwа готи гази wан, дьле к'ижани дьк'ьшандә wи к'ари, кӧ wе хәбате бькә.
[3] Һьнге wана әw һ'әму һ'әди, к'ижан кӧ зар'ед Исраел бона хәбата пирозгәһе анибун, жь щәм Муса һьлдан. У һәр сәре сьбәһе щьмә'те бь р'әзәдьлийа хwә һе һ'әдийед хwә данинә щәм wи.
[4] Һ'әму хwәйифьрасәтед кӧ һ'әму хәбата пирозгәһе дькьрьн, һәр кәс жь хәбата хwә һат,
[5] т'әви Муса хәбәрдан у готьне: «Бона ви шьхӧли чьqас кӧ Хӧдан т'әми дабу бькьн, щьмә'т жь wе зедәтьр тинә».
[6] Муса т'әми да кӧ зомеда ә'лам кьн бежьн: «Жь вьр шунда нә мер нә жьн бона һ'әдийа пирозгәһе иди т'ӧ тьшти нәкә». У щьмә'те дәст жь анине к'ьшанд.
[7] Әw тьштед анибун т'ера һ'әму шьхӧле кӧ wе бькьрана кьр у бәр жи ма. Чекьрьна п'әр'да
[8] Һ'әму хwәйифьрасәтед нава хәбатк'ара, жь к'ьтане зьрав-бадайи, р'исе шин, ширк, соре гәвәз дәһә тәж бь хәбата ньтьрандьне херуб сәр дәрхьстьн бона Коне Шә'дәтийе.
[9] Дьрежайийа һәр тәжи бист у һ'әйшт зәнд бу, бәрайийа һәр тәжи жи чар зәнд бу, чапа һ'әму тәжа wәкә һәв бу.
[10] Пенщ тәж һәвва кьрьн у пенще жи һәвва.
[11] Жь р'исе шин п'әвгьрек авитьнә ль кәвийа кәре тәжед пешьн ль сәр лева һәввабуне, ӧса жи авитьнә лева кәвийа кәре тәжед майини һәввабуне.
[12] Пенщи п'әвгьрек авитьнә сәр п'арч'е һәр пенщ тәже ә'wльн, пенщи п'әвгьрек жи авитьнә сәр лева п'арч'е һәр пенщ тәже дӧда, ӧса кӧ һ'әму п'әвгьрека һәвр'а хәбәр дьдан.
[13] Пенщи qәмьтокед зер'ин чекьрьн у һәр дӧ п'арч'ед пенщ тәжи пе wан qәмьтока һәвва кьрьн у Коне Шә'дәтийе бу йәк.
[14] Бона сәр гьртьна Коне Шә'дәтийе жь пьр'ч'а бьзьне йанздәһ тәж чекьрьн.
[15] Дьрежайийа һәр тәжи си зәнд бу у бәрайийа һәр тәжи жи чар зәнд бу, ӧса кӧ чапа һәр йанздәһ тәжа wәкә һәв бу.
[16] Пенщ тәж башqә һәвва кьрьн у шәш тәж жи башqә.
[17] Пенщи п'әвгьрек авитьнә ль кәвийа кәре п'арч'е пенщтәжийи пешьнә ль сәр лева һәввабуне, пенщи п'әвгьрек жи авитьнә ль кәвийа кәре п'арч'е шәштәжейи майин ә ль сәр лева һәввабуне.
[18] Бона һәввакьрьна кон жь сьфьр пенщи qәмьток чекьрьн кӧ бьбә йәк.
[19] Жь ч'әрмед бәранайә сор р'әнгкьри сәргьрәк чекьрьн бона сәргьртьна кон, жь ч'әрмед га-мә'сийа жи сәрк'ешәк чекьрьн, бона к'ьшандьна ль сәр wе.
[20] Бона Коне Шә'дәтийе жь дара дарщеwийе читед сәкьнанди чекьрьн.
[21] Дьрежайийа һәр чити дәһә зәнд бу, бәрайийа wан жи зәнд у нивәк бу.
[22] Сәре һәр чити дӧ к'әрт бун, кӧ һәвда р'удьньштьн, һ'әму читед Коне Шә'дәтийе жи ӧса чекьрьн.
[23] Коне Шә'дәтийер'а, бона алийе кӧ дьк'әвә башуре, бист чит чекьрьн,
[24] жь зив чьл бьнгәһ бона бист чити чекьрьн, дӧ бьнгәһ чите ә'wльнр'а, бона һәр дӧ к'әрта, ӧса жи бона йед майин.
[25] Бона алийе дьн бакӧра Коне Шә'дәтийе бист чит чекьрьн,
[26] бона wан чьл бьнгәһед зивин чекьрьн, дӧ бьнгәһ бьн чите ә'wльнр'а, дӧ бьнгәһ жи бьн һәр читед майинр'а.
[27] Бона пьшта Коне Шә'дәтийе алийе р'оавайева шәш чит чекьрьн.
[28] Алийе пьштева бона ә'нишкед Коне Шә'дәтийе дӧ чит чекьрьн.
[29] Әw алийе жерева щот бун у жорева жи пе хәлаqәке һәввакьри бун. Бона һәр дӧ ә'нишка һәр дӧ жи ӧса чекьрьн.
[30] Һ'әйшт чит у шанздәһ бьнгәһед wанә зивин бун, бьне һәр читида дӧ бьнгәһ бун.
[31] Жь дара дарщеwийе дәсту чекьрьн. Пенщ бона читед алики Коне Шә'дәтийе,
[32] пенщ жи бона читед алийе дьнейи Коне Шә'дәтийе у пенщ дәсту жи алийе р'оавайева бона читед пьшта Коне Шә'дәтийе.
[33] Дәстуйе наве чекьрьн кӧ нава читар'а жь ви сәри дәрбази сәре дьн бә.
[34] Чит зер' кьрьн, хәлаqед wан, аwа готи щийед кӧ дәсту тер'а дәрбаз дьбьн, бь зер' чекьрьн. Дәсту жи зер' кьрьн.
[35] Жь р'исе шин, ширк у соре гәвәз у жь к'ьтане зьрав-бадайи п'әр'дә бь хәбата ньтьрандьне херуб ль сәр чекьрьн.
[36] Әw авитьнә сәр чар стунед дарщеwийейә зер'кьри, кӧ чәнгәлед wан зер' бун, бона wан чар бьнгәһед зивин р'окьрьн.
[37] Бона дәре кон п'әр'дә жь р'исе шин, ширк, соре гәвәз у жь к'ьтане зьрав-бадайи бь хәбата нәqьшандитийе чекьрьн,
[38] бона wе пенщ стун чәнгәлед wанва чекьрьн, сәред wан у шишед wан зер' кьрьн. Һәр пенщ бьнгәһед wан жи жь сьфьр бун.