[1] Һьнге Хӧдан готә Муса: «Һәр'ә щәм Фьрәwьн, чьмки мьн дьле wи у дьле хӧламед wи кьрә кәвьр, wәки ван нишанед хwә нав wанда бькьм
[2] у wәки тӧ зар'е хwәр'а у зар'ед зар'е хwәр'а гьли ки, кӧ мьн пе кьред хwә мьсьри чаwа кьрьн пек'әни у чь нишан мьн кьрьн, кӧ һун бьзаньбьн әз Хӧдан ьм».
[3] Муса у Һарун чунә щәм Фьрәwьн у готьнә wи: «Хӧдан Хwәдейе ибранийа аһа дьбежә: ‹Һ'әта к'әнге те нәхwази бәр мьн хwә бьшкени? Щьмә'та мьн бәр'дә кӧ хӧламтийа мьн бькә.
[4] Ле һәгәр тӧ нәхwәзи щьмә'та мьн бәр'ди, ва йә әзе сьбе кӧлийа бьшиньмә ль сәр т'опраха тә,
[5] әwе р'уйе ә'рде ӧса бьгьрьн, кӧ ә'рде иди нәйе к'ьфше чь жи пәй тәйрокер'а бона wә майә wе бьхwьн у ӧса жи һ'әму даред ә'рде wәда йә шинбуйи wе бьхwьн.
[6] Әwе малед тә, мале хӧламед тә у малед һ'әму мьсьрийа т'ьжи бьн, wәки нә бавед тә, нә жи баве бавед тә жь р'ожа р'убари дьне к'әтьнә һ'әта ньһа тьште ӧса нәдитьнә›». У пьшта хwә дайе жь щәм Фьрәwьн дәрк'әт.
[7] Хӧламед Фьрәwьн готьнә wи: «Һ'әта к'әнге әве бьбә бәла сәре мә, ван меред wан бәр'дә бьра Хӧдан Хwәдейе хwәр'а хӧламтийе бькьн. Гәло тӧ һе набини кӧ Мьсьр wеран бу?»
[8] Муса у Һарун вәгәр'андьнә щәм Фьрәwьн у әwи готә wан: «Һәр'ьн Хӧдан Хwәдейе хwәр'а хӧламтийе бькьн. Ле к'и у к'е wе һәр'ьн?»
[9] Муса готе: «Әме бь бьч'ук у мәзьнед хwәва һәр'ьн, кӧр' у qизед хwәва, пәз у дәwаред хwәва һәр'ьн, чьмки бона мә щәжьна Хӧдан ә».
[10] Фьрәwьн готә wан: «Һәгәр әз дәстура wә у жьн-зар'ед wә бьдьм бьра Хӧдан т'әви wә бә. Ле ве йәке бьзаньбьн кӧ дьле wә qәлп ә.
[11] На, хер! Һун мер т'әне һәр'ьн хӧламтийе Хӧданр'а бькьн, нә wә әw йәк дьхwәст?» У бәри wан дан жь щәм Фьрәwьн дәрхьстьн.
[12] Хӧдан готә Муса: «Дәсте хwә дьрежи сәр wәлате Мьсьре кә, бьра кӧли р'абьнә ль сәр wәлате Мьсьре у һ'әму гиһайе ә'рде, чь кӧ пәй тәйрокер'а майә бьхwьн».
[13] Муса шьвдара хwә дьрежи сәр wәлате Мьсьре кьр у Хӧдан т'әмамийа wе р'оже у т'әмамийа wе шәве, байе р'оһьлате р'акьр. Сәре сьбәһе байе р'оһьлате кӧли анин.
[14] У кӧлийа т'әмамийа wәлате Мьсьре гьрт у ль сәр т'әмамийа т'опраха Мьсьре беһ'әсаб данин, ӧса кӧ нә бәри ве йәке һаqас кӧли һәбунә у нә жи пәй вер'а.
[15] Кӧлийа т'әмамийа р'уйе ә'рде гьрт у wәлат бу тә'ри, һ'әму шинайа ә'рде у бәред дарайә кӧ пәй тәйрокер'а мабун хwарьн. Т'әмамийа wәлате Мьсьреда т'ӧ тьште шин ль сәр дара у к'ола нә ма.
[16] Һьнге Фьрәwьн ләз гази Муса у Һарун кьр у гот: «Мьн һьндава Хӧдан Хwәдейе wәда у һьндава wәда гӧнә кьр,
[17] ньһа һиви дькьм, т'әне ве щаре гӧне мьн бьбахшинә у р'әща жь Хӧдан Хwәдейе хwә бькьн, т'әне ве мьрьне бьра жь сәр мьн һьлдә».
[18] Әw жь щәм Фьрәwьн дәрк'әт у р'әща жь Хӧдан кьр.
[19] Хӧдан ба вәгәр'анд, баки р'оавайейи qайим р'акьр у бе әw кӧли ажотьн кьрьнә Бә'ра Сор. Т'әмамийа т'опраха Мьсьреда кӧлик нә ма.
[20] Ле Хӧдан дьле Фьрәwьн кьрә кәвьр у әwи зар'ед Исраел бәр'нәдан.
[21] Һьнге Хӧдан готә Муса: «Дәсте хwә бәрбь ә'змен дьреж кә, wәки ль сәр wәлате Мьсьре бьбә шәвәр'әшәкә дәстдайине».
[22] Муса дәсте хwә бәрбь ә'змен дьреж кьр у се р'ожа ль сәр т'әмамийа wәлате Мьсьре бу шәвәр'әшәкә тә'ри.
[23] Кәсәки һәвдӧ нәдьдит у се р'ожа qәт йәк жь щийе хwә р'анәбу, ле щийед кӧ һ'әму зар'ед Исраел дьман р'онайи һәбу.
[24] Һьнге Фьрәwьн гази Муса кьр у готе: «Һәр'ьн Хӧдан бьһ'әбиньн, ле т'әне бьра пәз у дәwаред wә бьминьн, жьн-зар'ед wә жи бьра т'әв wә бен».
[25] Муса гот: «Гәрәке тӧ qӧрбан у дийарийед т'әвайишәwате жи бьди дәсте мә, кӧ әм бьдьнә Хӧдан Хwәдейе хwә.
[26] Әме һ'әйwанед хwә жи т'әв хwә бьбьн, qәт сьмәк жи гәрә нәминә, чьмки бона Хӧдан Хwәдейе хwәр'а хӧламти кьрьне, әм гәрәке жь wан һьлдьн. Һ'әта әм нәчьнә wьр, әм ньзаньн әме бь чь Хӧданр'а хӧламтийе бькьн».
[27] Ле Хӧдан дьле Фьрәwьн кьрә кәвьр у wи нәхwәст кӧ wан бәр'дә.
[28] У Фьрәwьн готә Муса: «Жь щәм мьн һәр'ә! Һаш хwә һәбә кӧ щарәкә дьн р'уйе мьн р'уйе тә нәк'әвә, чьмки wе р'ожа кӧ р'уйе мьн р'уйе тә к'әвә, те бьмьри».
[29] Һьнге Муса гот: «Тә р'аст гот, иди т'ӧ щар р'уйе тә р'уйе мьн нак'әвә».