[1] Т'әмамийа щьвина зар'ед Исраел, ль гора готьна Хӧдан жь фьрарийа бәр'ийа Сине чун ль Р'ьфидиме конед хwә вәгьртьн, ль wьр бона щьмә'те ава вәхwарьне т'ӧнә бу.
[2] Һьнге щьмә'те qьр'ка Муса гьрт у готьне: «Аве бьдә мә әм вәхwьн». Муса готә wан: «Һун чьма qьр'ка мьн дьгьрьн? Чьма Хӧдан дьщер'ьбиньн?»
[3] Щьмә'т wе дәре т'и бу, бина хwә ль Муса тәнг кьрьн у готьне: «Чьма тә әм жь Мьсьре дәрхьстьн, wәки мә, зар'ед мә у һ'әйwанед мә т'ибуна бькӧжи?»
[4] Муса гази Хӧдан кьр у гот: «Әз хwә ль ве щьмә'те чаwа бькьм? Һьндьк майә кӧ мьн бьдьнә ль бәр кәвьра!»
[5] Һьнге Хӧдан готә Муса: «Дәрбази пешийа щьмә'те бә, жь р'успийед Исраел т'әви хwә һьлдә у wе шьвдара хwә, бь к'ижане тә ч'әме Ниле хьст, бьгьрә дәсте хwә у һәр'ә.
[6] Ва йә әзе ль wьр Һ'оребеда сәр qәйе, ль бәр тә бьсәкьньм у тӧ qәйе хә, wе жь wе аве дәре щьмә'те вәхwә». Муса ль бәр ч'ә'ве р'успийед Исраел ӧса кьр.
[7] У наве wи щийи дани Массаһ у Мерибаһ , чьмки зар'ед Исраел wьр к'әтьнә дә'wе, Хӧдан щер'ьбандьн у готьн: «Гәло Хӧдан нав мәда йә йан на?»
[8] Амалеки һатьн ль нав Р'ьфидиме т'әв Исраел шәр' кьрьн.
[9] Муса готә Йешу: «Мәр'а мера бьбьжерә у һәр'ә т'әв Амалек шәр' кә, сьбе әзе ль сәре гьр бьсәкьньм у шьвдара Хwәде жи дәсте мьнда».
[10] Йешу ӧса кьр чаwа кӧ Муса гот, т'әви Амалек шәр' кьр. Муса, Һарун у Һур р'абунә сәре гьр.
[11] Гава Муса дәсте хwә бьльнд дькьр, исраелийа ль сәр дьк'әтьн, ле гава дәсте хwә бәр'дьда, амалеки ль сәр дьк'әтьн.
[12] Ле гава дәстед Муса wәстийан, һьнге кәвьрәк һьлдан данинә бьн wи у әw ль сәр wи р'уньшт. Һарун у Һур жи йәки аликива йе дьн жи алийе дьнва дәстед wи бьльнд хwәй кьрьн, һ'әта р'о чу ава дәстед wи qәwин сәкьнин.
[13] Йешу Амалек щьмә'тева дәве шурр'а дәрбаз кьр.
[14] Һьнге Хӧдан готә Муса: «Ве йәке бона биранине к'ьтебеда бьньвисә у бьгьһинә гӧһе Йешу кӧ әзе биранина Амалек, бьн п'әр'е ә'зманда лап бьдьмә һьлдане».
[15] Муса горигәһәк чекьр у наве wе дани: Хӧдан ала мьн ә.
[16] У гот: «Ль сәр т'әхте Хӧдан дәст бьльнд бу! Хӧдане т'әв Амалек qӧр'нә-qӧр'нә шәр' кә»