[1] Бьсалел жь дара дарщеwийе сьндоq чекьр, дьрежайийа wе дӧ зәнд у нив, бәрайийа wе зәнд у нив, зәнд у нив жи бьльндайийа wе бу.
[2] Дәр у һьндӧр'е wе бь зер'е хальс зер' кьр у дора лева wе т'оqәки зер'ин авите.
[3] Бона һәр чар ньгед wе чар хәлаqед зер'ин р'о кьрьн, дӧ хәлаq аликива, дӧ хәлаq жи алийе дьнва.
[4] Жь дара дарщеwийе дәсту чекьрьн у әw зер' кьрьн.
[5] Дәсту хәлаqед к'еләкед сьндоqер'а дәрбаз кьрьн, wәки сьндоq бе һьлдане.
[6] Qалп'ахе бахшандьне жь зер'е хальс чекьр, дьрежайийа wе дӧ зәнд у нив, бәрайийа wе жи зәнд у нив бу.
[7] У сәр һәр дӧ сәрийед qалп'ахе бахшандьне пе зер' дӧ херубед к'оланди чекьрьн.
[8] Херубәк сәрикива дәрхьст, херубәки жи сәре дьнва, херуб жь qалп'ахе бахшандьне сәр һәр дӧ сәрийава дәрхьстьн.
[9] П'әр'ед херуба бәрбь жор вәкьри бун у бь п'әр'ед хwә qалп'ахе бахшандьне дьньхамтьн. Бәре wан һәвдӧда бу у дина wан qалп'ахе бахшандьнеда бу.
[10] Жь дара дарщеwийе т'әхт чекьр, дьрежайийа wе дӧ зәнд, бәрайийа wе зәндәк у бьльндайийа wе зәнд у нив бу.
[11] Әw бь зер'е хальс зер' кьр у дора wе т'оqәки зер'ин авите.
[12] У дора wе бьльндайийа чар т'ьлийа кәви чекьр, дора кәвийа wе жи т'оqәки зер'ин авите.
[13] Бона wе чар хәлаqед зер'ин р'окьрьн у әw хәлаqана бәр һәр чар ньга, сәр һәр чар ә'нишкава кьрьн,
[14] Хәлаq кәвийава бун, wәки щийед дәстуйа һәбьн кӧ т'әхт бе һьлдане.
[15] Дәсту жь дара дарщеwийе чекьрьн, әw зер' кьрьн кӧ бь wан т'әхт бе һьлдане.
[16] Дәрданед ль сәр т'әхт сьни, т'ас, к'ас у щер' пе зер'е хальс чекьрьн, wәки бь wан дийарийа сәрдакьрьне бе дайине.
[17] Жь п'арч'әки зер'е хальс шәмдан к'оланди чекьр, бьнгәһа wе, стуна wе, т'аськ, гӧл у севькед wе һ'әму жь wе дәрдьк'әтьн.
[18] К'еләкава шәш ч'ьqьл дәрдьк'әтьн, се ч'ьqьл алики шәмданева бун у се ч'ьqьл жи алийе шәмданейи дьнва бун.
[19] Се т'аськед мина гӧлед бәһиве, севьк у гӧлава ль сәр ч'ьqьләки бун. Се т'аськед мина гӧлед бәһиве, севьк у гӧлава жи сәр ч'ьqьле дьн бун, һәр шәш ч'ьqьлед кӧ жь шәмдане дәрдьк'әтьн аwа бун.
[20] Чар т'аськед мина гӧлед бәһиве, севьк у гӧлава стуна шәмданева бун.
[21] Севькәк бьн һәр дӧ ч'ьqьлед шәмданейе жерьнва, севькәк бьн һәр дӧ ч'ьqьлед орт'ева, севькәк жи бьн һәр дӧ ч'ьqьлед жорьнва бу. Ӧса бона һәр шәш ч'ьqьлед стуна шәмдане һәбун.
[22] Севьк у ч'ьqьлед wе жь wе дәрдьк'әтьн. Һ'әму жь п'арч'әки зер'е хальс к'оланди һатьбу чекьрьне.
[23] Һ'әфт ч'ьра, дәстьк у сьнийед wе жь зер'е хальс жер'а чекьрьн.
[24] Әw у һ'әму һащәтед wе, жьft тәлантәк зер'е хальс чекьр.
[25] Горигәһа бьхуре жь дара дарщеwийе чекьр, дьрежайийа wе зәндәк, бәрайийа wе зәндәк, әw чар гошә бу, бьльндайийа wе дӧ зәнд, стьруйед wе жи жь wе бун.
[26] Жора wе, дора wе, стьруйед wе бь зер'е хальс зер' кьр у дора лева wе т'оqәки зерин авите.
[27] Дӧ хәлаqед зер'ин бона wе чекьр. Әw бьне т'оqва авитьнә һәр дӧ алийа, wәки гава wе һьлдьн щи һәбьн кӧ дәстуйа тер'а дәрбаз кьн.
[28] Дәсту жь дара дарщеwийе чекьрьн у әw зер' кьрьн.
[29] Р'уне р'ункьрьнейи пироз у бьхура хальсә бинхwәш бь пьспорти т'әвдайи чекьр.