[1] Дәнг-бә'сед дәрәw бәла нәкә. Бь шә'дәтийа дәрәw алийе нәһәqа нәкә.
[2] Бона хьрабийе дәсте п'ьр'анийева нәчә. У диwанеда пьшта п'ьр'анийе нәгьрә, һәqийе нәт'әр'ьбинә.
[3] Диwанеда пьшта йе к'әсиб нәгьрә.
[4] Һәгәр тӧ га йан к'әре дьжмьне хwәйә ӧндабуйи бьбини, ә'сә wан пашда бьбә.
[5] Һәгәр тӧ бьбини кӧ к'әре хернәхwазе тә бьн баре хwәда к'әтийә, пьшта хwә нәде нәчә, т'әви wи дәст бавеже р'акә.
[6] Диwанеда һәqийа к'әсибе хwә нәт'әр'ьбинә.
[7] Жь дәрәwийе дур бә у йе бесущ у р'аст нәкӧжә, чьмки әз йе нәһәq бещәза наһельм.
[8] Нә жи р'ӧшәте һьлдә, чьмки р'ӧшәт ч'ә'ве мәрьвед вәкьри кор дькә у хәбәред р'аста дәвәр'у дькә.
[9] Тәнгасийе нәдә хәриба, һун һаш жь дьле хәриба һәнә. Чьмки һун хwәха жи wәлате Мьсьреда хәрибийеда бунә.
[10] Шәш сала ә'рде хwә бьр'әшини у дәрәмәта wе т'оп ки,
[11] ле сала һ'әфта р'ьһ'әт бьһели у дәст нәдейи, wәки к'әсибед ль нав щьмә'та тәда бьхwьн у чь кӧ бьминә жи һ'әйwанед чоле бьра бьхwьн. Р'әзе тьрийе хwә у даред зәйт'уне жи ӧса бьки.
[12] Шәш р'ожа хәбата хwә бьки у р'ожа һ'әфта р'ьһ'әт би, wәки га у к'әре тә р'ьһ'әт бьн у кӧр'е щарийа тә у хәриб бина хwә бьстиньн.
[13] Әв һ'әмуйед кӧ мьн wәр'а готьн хwәй кьн, наве хwәдейед майин бир нәйньн, бьра жь дәве wә нәйе бьһистьне.
[14] Сале се щара мьнр'а щәжьне бьки.
[15] Щәжьна Нане Шкәва хwәй ки. Чаwа кӧ мьн т'әми дайә тә у wи wә'де мәһа Абибедайә к'ьфшкьри, һ'әфт р'ожа нане бе һәвиртьр'шк бьхwи, чьмки wе мәһеда тӧ жь Мьсьре дәрк'әти. Бьра кәсәк дәствала дәрнәк'әвә бәр мьн.
[16] Щәжьна Нандьруна бәре пешьн бь к'әда хwәйә ә'рдеда чанди хwәй ки. Ӧса жи Щәжьна Бәрт'опкьрьнейә хьлазийа сале, гава жь ә'рде к'әда хwә т'оп ки, хwәй ки.
[17] Сале се щара һ'әму qьсьме тәйә нерин бьра ль бәр Хӧдан Хwәде бьсәкьньн.
[18] Хуна qӧрбана мьн т'әв нане һәвиртьр'шк нәди у бәзе щәжьна мьн бьра һ'әта сьбәһе нәминә, бьшәwьтинә.
[19] Бәред дәрәмәта пешьнә ә'рде хwәда йә һәрә qәнщ бини мала Хӧдан Хwәдейе хwә. Каре ль нав шире македа нәк'әлини.
[20] Ва йә әзе мьлйак'әтәки пешийа тәва бьшиньм, wәки р'еда хwәйитийе ль тә бькә у тә бьбә wи щийе кӧ мьн һазьр кьрийә.
[21] Ль бәр wи һаш жь хwә һәбә у гӧһ бьдә готьна wи, ль бәр wи сәрһ'ьшкийе нәки, әwе нәһәqийед wә нәбахшинә, чьмки әw бь наве мьн дькә.
[22] Ле һәгәр тӧ р'асти гӧһдарийа дәнге wи бьки у һ'әму готьнед мьн бьqәдини, һьнге әзе бьбьмә дьжмьне дьжмьнед тә у мьqабьле мьqабьлед тә.
[23] Чьмки мьлйак'әте мьне пешийа тәва һәр'ә у wе тә бьбә щәм әморийа, һ'итийа, пьриззийа, кәнанийа, һ'иwийа у йәбусийа у әзе qьр'а wан биньм.
[24] Тӧ хwәдейед wан нәһ'әбинә у хӧламтийа wан нәкә, ч'ә'в нәдә кьре wан ле wан к'ав-к'ун кә у һ'әйкәлед wан һурдәхwәши кә.
[25] Һун хӧламтийа Хӧдан Хwәдейе хwә бькьн, әwе дӧа нане тә у ава тә бькә у нәхwәшийе жь нав тә дәрхә.
[26] Wәлате тәда жьна бебәр, йан йа ль бәр һәр'ә wе т'ӧнә бьн, әзе р'ожед ә'мьре тә т'әмам кьм.
[27] Әзе саwа хwә пешийа тәва бьшиньм у wан һ'әму мьләтед кӧ те навр'а дәрбаз би т'әвиһәв кьм у һ'әму дьжмьнед тәйе жь бәр тә бьр'әвьн.
[28] Әзе тьрс у хофе пешийа тәва бьшиньм у әwе жь бәр тә һ'иwийа, кәнанийа, һ'итийа р'аqәтинә.
[29] Нава саләкеда әзе wана жь бәр тә р'анәqәтиньм, кӧ нәбә ә'рд вала бьминә у тәрәwьлед чоле сәр тә зедәбьн.
[30] Әзе һеди-һеди жь бәр тә wан р'аqәтиньм, һ'әта кӧ тӧ ль һәв зедә би у wи ә'рди wар би.
[31] Һьнге әзе синоре тә жь Бә'ра Сорда гьрти һ'әта Бә'ра Навбәре у жь бәр'ийеда гьрти һ'әта ч'әме Фьрате дайньм, чьмки әзе бьнәлийед wи wәлати бьдьмә дәсте wә у те жь бәр хwә wан р'аqәтини.
[32] Т'әви wан у т'әви хwәдейед wан пәймане гьренәдә.
[33] Әw wәлате тәда гәрәке нәжин кӧ һьндава мьнда wә нәдьнә гӧнәкьрьне, чьмки һәгәр тӧ хӧламтийа хwәдейед wан бьки, әwе ә'сә тәр'а бьбә т'әлә».