[1] Әв ьн әw qанунед кӧ тӧ гәрәке дайини ль бәр зар'ед Исраел:
[2] Гава тӧ хӧламәки ибрани бьк'ьр'и, бьра әw шәш сала тәр'а хӧламтийе бькә, ле сала һ'әфта бьра бе һәq дәре азайе.
[3] Һәгәр әw т'әне һатьбә, бьра әw т'әне жи дәре, ле һәгәр әw зәwьщибә, бьра жьн жи пер'а дәре.
[4] Һәгәр ахайе wи әw зәwьщандьбә у жьне кӧр' у qиз wир'а анибьн, һьнге бьра жьн у зар' ахер'а бьминьн у әw т'әне дәре.
[5] Ле һәгәр хӧлам ашкәрә бежә: ‹Әз ахайе хwә, жьн у зар'ед хwә һ'ьз дькьм, нахwазьм дәремә азайе›
[6] һьнге ахайе wи, бьра wи бьбә щәм һ'акьма у wи незики дери, йан рәхдәри кә, ахайе wи бь дьреше гӧһе wи qӧл кә у һ'әта әw хwәш бә бьра хӧламе wи бә.
[7] Гава йәк qиза хwә чаwа щари бьфьрошә , гәрәке әw ӧса дәрнәйе чаwа хӧлам дәрте.
[8] Һәгәр әw ахайе хwә хwәш нәйе кӧ wе хwәр'а бьхwазә, бьра изьне бьдә пьсмаме wейи незик кӧ wе бьк'ьр'ьн, ле изьна wи т'ӧнә кӧ wе бьфьрошә малбәтәкә дьн, чьмки әwи әw хапандийә.
[9] Һәгәр wе кӧр'е хwәр'а бьхwазә, гәрәке әw wәкә дәрәща qиза хwә бона wе бькә.
[10] Һәгәр ахайе wе һеwике бинә сәр wе, гәрәке хwарьна wе, к'ьнща wе у т'әв р'азана wе сәр нәбьр'ә.
[11] Һәгәр әw ван һәр се тьшта бона wе нәйнә сери, һьнге әwа бьра бе һәq, бе к'ьр'ин һәр'ә.
[12] Йе кӧ мерьв бькӧжә, әw ә'сә гәрәке бе кӧштьне.
[13] Ле һәгәр әwи бь һ'әмде хwә нәкьр, ле Хwәде әw да дәсте wи, әзе бона тә щики к'ьфш кьм кӧ әw бьр'әвә wьр.
[14] Ле һәгәр йәк бь һ'әмде хwә жь мьхәнәтийе йәки хә бькӧжә, әwи һ'әта жь горигәһа мьн һьлди, кӧ бе кӧштьне.
[15] Йе кӧ де у баве хwә хә, ә'сә гәрәке бе кӧштьне.
[16] Йе кӧ мәрийа бьдьзә, һәгәр әw фьроти бә йан щәм wи бә, ә'сә гәрәке бе кӧштьне.
[17] Йе кӧ де у баве хwә беһӧрмәт кә, ә'сә гәрәке бе кӧштьне.
[18] Гава мәрьв һәвр'а шәр' кьн у йәк бь кәвьр йан к'ӧлме йәки хә у әw нәмьрә, ле әw бьк'әвә щи-ньвине,
[19] паше һәгәр р'абә бь дар бьгәр'ә, йе лехьсти бещәза бә, т'әне гәрәке wе зьрара бехәбатийа wи бьк'ьшинә у wи бьдә qәнщкьрьне.
[20] Һәгәр йәк бь шьвдаре хӧлам йан щарийа хwә хә у әw бьн дәсте wида бьмьрә, ә'сә гәрәке бе щәзакьрьне.
[21] Ле һәгәр әw р'ожәке йан дӧда бьжи, һьнге бьра wи щәза нәкьн, чьмки әw һәqе wи йә.
[22] Гава мәрьв һәвр'а шәр' кьн у дәрб жьна дӧһ'али к'әвә, зар'а wе wә'дә зутьр бьбә у зьрарәкә майин т'ӧнәбә, һьнге бьра мере wе чьqас кӧ жь wан бьхwазә, бь qьрара һ'акьмтийе бе дайине.
[23] Ле һәгәр зьрарәк бьбә, һьнге гәрәке ә'мьр жь бәр ә'мьрва бә,
[24] ч'ә'в жь бәр ч'ә'вва, дьран жь бәр дьранва, дәст жь бәр дәства, ньг жь бәр ньгва,
[25] шәwат жь бәр шәwатева, бьрин жь бәр бьринева, дәрб жь бәр дәрбева бә.
[26] Һәгәр йәк ч'ә'ве хӧламе хwә йан ч'ә'ве щарийа хwә хә кор кә, бьра бона ч'ә'ве wи, wи аза кә.
[27] У һәгәр дьране хӧламе хwә йан щарийа хwә хә бьwаринә, бьра бона дьране wи, wи аза кә.
[28] Һәгәр гайе мәрьвәки мерәки йан жьнәке хә у әw бьмьрә, гәрәке ә'сә wи гайи бьдьнә бәр кәвьра у гоште wи нәйе хwарьне, ле хwәйе wи гайи бещәза бә.
[29] Ле һәгәр бона лехьстьна wи гайи зува хwәйе wир'а һатийә готьне у хwәйе wи хәм нә кьрийә, һьнге әw га мер йан жьнәке хә бькӧжә, бьра wи гайи бьдьнә бәр кәвьра у хwәйе wи жи бе кӧштьне.
[30] Һәгәр бәрвадайин бе qьраркьрьне, һьнге бьра жь бәр ә'мьре хwәва һәq бьде, чьqас кӧ же те хwәстьне.
[31] Һәгәр га кӧр'әки йан qизәке хә хут пе ве qануне жи ле бе ньһер'андьн.
[32] Һәгәр га хӧлам йан щарийәке хә, һьнге хwәйе га гәрәке си шекьл зив бьдә хwәйе wан у га жи бьдьнә бәр кәвьра.
[33] Һәгәр йәк сәр ч'ә'ле вәкә йан ч'ә'ләке бьк'олә у сәр нәгьрә, га йан к'әрәк бьк'әве,
[34] һьнге бьра хwәйе ч'ә'ле щьрме бьк'ьшинә, п'әра бьдә хwәйи у щәндәк жи хwәр'а һьлдә.
[35] Гава гайе йәки, гайе йәки дьн хә у бькӧжә, бьра гайе сах бьфьрошьн у п'әре wи п'арәвәкьн, ӧса жи щәндәке кӧшти п'арәвәкьн.
[36] Ле һәгәр бона лехьстьна wи гайи зува хwәйе wир'а һатийә готьне у wи хәм нәкьрийә, бьра ль бәр wи гайива, гаки бьде у гайе кӧшти жи wир'а бьминә.