[1] Хӧдан готә Муса: «Дӧ сәлед кәвьри хwәр'а бьбьр'ә мина йед пешийе у әзе ль сәр wан сәла бьньвисьм wан хәбәра, йед кӧ ль сәр сәлед пешийе бун, к'ижан тә һурдәхwәши кьрьн.
[2] Бона сәре сьбәһе һазьр би. Сәре сьбәһе һьлк'ьши ч'ийайе Синайе у wе дәре ль сәр ч'ийе бәр мьн бьсәкьни.
[3] Т'ӧ кәс т'әви тә һьлнәк'ьшә у т'ӧ кәс ль сәр т'әмамийа ч'ийе нәйе к'ьфше, нә жи пәз у дәwар незики ч'ийе бьч'ерә».
[4] Муса дӧ сәлед кәвьри мина йе пешийе бьр'ин. Әw сәре сьбәһе р'абу, һәр дӧ сәлед кәвьри дестда һьлк'ьшийа сәр ч'ийайе Синайе, чаwа кӧ Хӧдан т'әми дабу wи.
[5] У Хӧдан пе ә'wр пәйа бу, ль wьр щәм wи сәкьни у наве Хӧдан ә'лам кьр.
[6] Хӧдан ль бәр wир'а дәрбаз бу у ә'лам кьр: «Хӧдан, Хӧдан ьм! Хwәдейе р'ә'м у к'әрәме, сәбьр-ськ'ане, бь һ'ӧб у амьнийеда хьнейо,
[7] кӧ бона һ'әзара хwәйе һ'ӧба амьн ә, нәһәqийе, нәр'астийе у гӧна дьбахшинә, ле сущдара бе щәза наһелә, нәһәqийа бава тинә сәре кӧр'а у кӧр'е-кӧр'а, һ'әта ньсьле сьсийа у чара».
[8] Муса бь ләз дәвәр'уйа чу ә'рде у һ'әбанд,
[9] у гот: «Хwәйе мьн, әва мьләтәки сәрһ'ьшк ә, ле һәгәр мьн ль бәр ч'ә'вед тә к'әрәм дитийә, һиви дькьм, бьра Хwәйе мьн т'әви мә бе. Нәһәqи у гӧнед мә бьбахшинә у мә бькә wаре хwә».
[10] У Хӧдан готе: «Ва йә әз пәймане гьредьдьм, ль бәр ч'ә'ве т'әмамийа щьмә'та тә к'әрәмәтед ӧса әзе бькьм, к'ӧ ль сәр р'убари дьне у ль нав һ'әму мьләтада тьштед ӧса нә бунә. Һ'әму мьләтед дор-бәред тә, wе кьрьнед Хӧдан бьбиньн, чьмки әзе бона тә кьрьнед һ'әйрә-хоф бькьм.
[11] Бира хwәда хwәй кә чь т'әмийе әз иро дьдьм тә, ва йә әзе ль бәр тә әморийа, кәнанийа, пьриззийа, һ'итийа, һ'иwийа у йәбусийа р'аqәтиньм.
[12] Мьqати хwә би, әw wәлате кӧ те һәр'и нәбә кӧ пәймане т'әви бьнәлийед wи гьреди у әw тәр'а бьбә т'әлә.
[13] Ле һун горигәһед wан wеран кьн, һ'әйкәлед wан һурдәхwәши кьн у Ашераһед wан жи бьбьр'ьн.
[14] Тӧ хwәдейе башqә нәһ'әбини, чьмки наве Хӧдан К'ӧмр'әш ә, әw Хwәдеки к'ӧмр'әш ә.
[15] Нәбә кӧ тӧ т'әви бьнәлийед wи wәлати пәймане гьреди, гава әw пәй хwәдейед хwә һәр'ьн беә'сьлийе бькьн, qӧрбана хwәдейед хwәр'а бьдьн у тә т'әглиф кьн, тӧ жи жь wе qӧрбана wан бьхwи,
[16] qизед wан кӧр'ед хwәр'а бьхwази у гава qизед wан пәй хwәдейед хwә һәр'ьн беә'сьлийе бькьн, wе кӧр'ед тә жи беә'сьлийе бьдьнә кьрьне у ль пәй хwәдейед хwә бьдьнә бьрьне.
[17] Хwәдейа хwәр'а р'онәки.
[18] Щәжьна Нане Шкәва хwәй ки. Wи wә'де к'ьфшкьрийә мәһа Абибеда , һ'әфт р'ожа нане шкәва бьхwи, чаwа кӧ мьн т'әми дайә тә, чьмки тӧ мәһа Абибеда жь Мьсьре дәрк'әти.
[19] Һәр ньхӧрийе жь дийа хwә дьк'әвә п'ара мьн ә, ӧса жи һәр ньхӧрийе нерини ль нав һ'әйwанед тәда, һәгәр дәwар бә йан жи пәз бә.
[20] Жь бәр ньхӧрийе к'әрева бәрхәки бьди, ле һәгәр бәрва нәди, стуйе wи бьшкени. Жь бәр һәр ньхӧрийе кӧр'ед хwәва жи бьди. Бьра qәт йәк дәствала дәрнәк'әвә ль бәр мьн.
[21] Шәш р'ожа бьхәбьти у р'ожа һ'әфта р'ьһ'әт би, wә'де чандьн у дьруне жи р'ьһ'әт би.
[22] Щәжьна Һ'әфтийа пе бәре нандьруна ә'wльн у Щәжьна Бәрт'опкьрьна хьлазийа сале хwәй ки.
[23] Сале се щара һ'әму qьсьме тәйә нерин бьра ль бәр Хӧдан Хwәде, Хwәдейе Исраел бьсәкьньн.
[24] Чьмки әзе ль бәр тә мьләта р'аqәтиньм у синоре тә бәрфьрә кьм. Wә'де кӧ тӧ сале се щара ль бәр Хӧдан Хwәдейе хwә бьсәкьни, т'ӧ кәсе ч'ә'в нәвежә wәлате тә.
[25] Хуна qӧрбана мьн т'әв нане пе һәвиртьр'шк нәди у нә жи qӧрбана Щәжьна Дәрбазбуне һ'әта сәре сьбәһе бьминә.
[26] Бәред дәрәмәта пешьнә ә'рдед хwәда йә һәрә qәнщ бинә мала Хӧдан Хwәдейе хwә. Каре ль нав шире македа нәк'әлини».
[27] Хӧдан готә Муса: «Ван хәбәра хwәр'а бьньвисә, чьмки мьн анәгори ван хәбәра пәйман т'әви тә у т'әви Исраел гьреда».
[28] Муса wе дәре ль щәм Хӧдан чьл р'ожи у чьл шәви ма, нә нан хwар у нә жи ав вәхwар. Ль сәр wан сәлед кәвьри хәбәред пәймане ньвисин, аwа готи һәр дәһә т'әми.
[29] Гава Муса һәр дӧ сәлед Шә'дәтийе дестда жь ч'ийайе Синайе дьһатә хwаре. Муса ньзаньбу кӧ жь wе хәбәрдана хwәйә т'әви Хӧдан, р'уйе wи дьч'ьруси.
[30] Һарун у һ'әму зар'ед Исраел ч'ә'в Муса к'әтьн, ва йә р'уйе wи дьч'ьрусә, әw тьрсийан кӧ незики wи буна.
[31] Һьнге Муса гази wан кьр, Һарун у һ'әму сәрwеред щьвине вәгәр'ийан һатьнә щәм wи у Муса т'әви wан хәбәрда.
[32] Пәй ве йәкер'а һ'әму зар'ед Исраел һатьнә незик. Әwи һ'әму т'әмийед кӧ Хӧдан сәр ч'ийайе Синайе т'әви wи хәбәр дабу, данә wан.
[33] Муса хәбәрдана т'әви wан хьлаз кьр, әwи хели авит ль сәр р'уйе хwә.
[34] Ле чахе Муса дьчу ль бәр Хӧдан кӧ т'әви wи хәбәр да, әwи хели жь сәр р'уйе хwә һьлдьда, һ'әта кӧ wе дәрк'әта, паше дәрдьк'әт у чь т'әми wир'а һатьбунә дайине, зар'ед Исраелр'а дьгот.
[35] Зар'ед Исраел ч'ә'в Муса к'әтьн, дина хwә дане кӧ р'уйе Муса дьч'ьрусә. Муса хели давитә ль сәр р'уйе хwә, һ'әта кӧ дьчу бәр Хӧдан кӧ т'әви wи хәбәр да.