[1] Муса т'әмамийа щьвина зар'ед Исраел щьванд у готә wан: «Әв ьн әw тьштед кӧ Хӧдан т'ами да кӧ wан бьqәдиньн:
[2] шәш р'ожа хәбата хwә бькьн, ле р'ожа һ'әфта wәр'а бьбә шәмийа р'ьһ'әтийейә пироз бона Хӧдан. К'е wе р'оже шьхӧләки бькә wе бе кӧштьне.
[3] Р'ожа шәмийе һ'әму щи-wаред хwәда агьр венәхьн».
[4] Муса т'әви т'әмамийа щьвина зар'ед Исраел хәбәр да у гот: «Әв ә чь кӧ Хӧдан т'әми да у гот:
[5] ‹Жь нав һәбука хwә һ'әдийе бона Хӧдан дәрхьн. Бьра һәр кәсе р'әзәдьли Хӧданр'а һ'әдийе бинә: Зер', зив у сьфьр,
[6] р'исе шин, ширк, соре гәвәз, к'ьтане зьрав у пьр'ч'а бьзьне,
[7] ч'әрмед бәранайә сор р'әнгкьри, ч'әрмед га-мә'сийа , даред дарщеwийе,
[8] бьзьре бона р'онайийе, бьһарәтед бона р'уне р'ункьрьне у бона бьхура бинхwәш,
[9] кәвьред оникс у кәвьред qимәтә бона qашкьрьна ефод у р'әхтсинг.
[10] Һәр хwәйифьрасәтед ль нав wәда бьра бен у һ'әму тьштед кӧ Хӧдан т'әми данә чекьн:
[11] Коне Шә'дәтийе, сәргьра сәр гьртьна wе у сәрк'еша wе, qәмьтокед wе, читед wе, дәстуйед wе, стунед wе у бьнгәһед wе,
[12] сьндоq у дәстуйед wе, qалп'ахе бахшандьне у п'әр'да навбьр'ийе,
[13] т'әхт дәстуйава у һ'әму дәрданед wе, нане Хwәдер'а дайи,
[14] шәмдана р'онайе у һащәтед wе, ч'ьред wе у р'уне р'онайе,
[15] горигәһа бьхуре у дәстуйед wе, р'уне р'ункьрьне, бьхура бинхwәш у п'әр'да бәр дәре Коне Шә'дәтийе,
[16] горигәһа дийарийа т'әвайишәwате у чита wейә сьфьрин, дәстуйед wе у һ'әму һащәтед wе, т'әшт у бьнгәһа wе,
[17] п'әр'дед һ'әwше, стунед wе бьнгәһава у п'әр'да бәр дәре һ'әwше,
[18] сьнгед кон у сьнгед һ'әwше һәбьнед wанва,
[19] к'ьнщед qӧльхкьрьнейә бона хьзмәтк'арийа Щийе Пирозда, к'ьнщед пирозә к'аһин Һарунр'а, ӧса жи к'ьнщед кӧр'ед wи кӧ к'аһинтийе бькьн›».
[20] Т'әмамийа щьвина зар'ед Исраел жь щәм Муса чу.
[21] Һ'әму бь р'әзәдьлийа хwә у бь дьл-щан һатьн, бона шьхӧлед Коне Щьвине у бона т'әмамийа хьзмәтк'арийа wи у бона к'ьнщед пироз Хӧданр'а һ'әди анин.
[22] Жьне у меред мәр'д һатьн, мәнгьк, гӧһар, гӧстил, хьшьр у һәр щур'ә нәхшед зер'ин анин, һәр кәси һьндава хwәда һ'әдийед зер'ин данә Хӧдан.
[23] У щәм к'е р'исе шин, ширк, соре гәвәз, к'ьтане зьрав, пьр'ч'а бьзьне у ч'әрмед бәранайә сор р'әнгкьри у ч'әрмед га-мә'сийа һәбун анин.
[24] Һәр кәсе кӧ зив, сьфьр һ'әди дьда, чаwа һ'әди Хӧданр'а анин у щәм к'е кӧ даре дарщеwийе бона чекьрьна һ'әму тьшта һәбун анин.
[25] Һ'әму к'ӧлфәтед хwәйифьрасәт бь дәстә'мәлийа хwә р'исе шин, ширк, соре гәвәз у к'ьтане зьрав р'ьстьн у анин.
[26] Һ'әму к'ӧлфәтед кӧ дьле wан дьхwәст бь дәстә'мәлийа хwә пьр'ч'а бьзьне р'ьстьн.
[27] Сәрwера жи кәвьред оникс у кәвьред qимәтә бона qашкьрьна ефод у р'әхтсинг,
[28] ӧса жи бьзьре бона ч'ьре, бьһарәтед бона р'уне р'ункьрьне у бьхура бинхwәш анин.
[29] Һәр жьне у мере зар'ед Исраел кӧ дьле wан дьхwәст, бона һәр тьште кӧ Хӧдан т'әми дабу Муса бе чекьрьне, бь р'әзәдьлийа хwә Хӧданр'а һ'әди анин.
[30] Муса готә зар'ед Исраел: «Дина хwә бьдьне, Хӧдан бь нав гази Бьсалеле кӧр'е Урийе Һур кьр, жь qәбила Щьһуда.
[31] Әw Р'ӧһ'е Хwәдева, бь сәрwахтийе, билантийе, дәстә'мәлийе у фьрасәта һәр п'ешәк'арийева дагьрт,
[32] wәки бь зер', зив у сьфьр тьшта бьһ'ӧньринә
[33] у кәвьра бьк'олә qаш кә, дара бьк'олә у һәр щур'ә шьхӧли бь һостатийе бькә.
[34] Дьле wида жи дани кӧ һин бькә, дьле wи у дьле Оһолиабе кӧр'е Аһисамахе жь qәбила Дан.
[35] Хwәде әw фьрасәтийева дагьртьн, wәки һәр шьхӧле һостатийе, һ'ӧнӧрмәндитийе, нәqьшандитийе бь р'исе шин, ширк, соре гәвәз ль сәр к'ьтане зьрав, шьхӧле ньтьрандьне у һәр щур'ә шьхӧли бькьн.