[1] Хwәде готә Муса: «Һьлк'ьшә бәрбь Хӧдан, тӧ, Һарун, Надаб, Абиһу, у һ'әфте р'успийед Исраел у дурва бьһ'әбиньн.
[2] Т'әне бьра Муса незики Хӧдан бә, ле әwана бьра незик нәбьн, нә жи бьра щьмә'т т'әви wи һьлк'ьшә».
[3] Муса вәгәр'ийа һат, һ'әму хәбәр у һ'әму qанунед Хӧдан готьнә щьмә'те. Т'әмамийа щьмә'те бь һәвр'а щаб да у гот: «Һ'әму хәбәред кӧ Хӧдан готийә, әме бькьн!»
[4] Муса һ'әму хәбәред Хӧдан ньвисин. Сәре сьбәһе зу р'абу бьнат'ара ч'ийе горигәһ чекьр, wәкә һ'әсабе донздәһ qәбилед Исраел донздәһ һ'әйкәл данә сәкьнандьне.
[5] У wи жь хортед зар'ед Исраел шандьн, wана Хӧданр'а дийарийед т'әвайишәwате кьрьн у бона дийарийед һәләqәтийе щанәга qӧрбан дан.
[6] Муса ниве хуне һьлда кьрә т'әшта у ниве дьн жи р'әшандә сәр горигәһе.
[7] У к'ьтеба пәймане һьлда бәр щьмә'те хwәнд, wана гот: «Һ'әму чь кӧ Хӧдан гот әме бькьн у гӧр'а wида бьн».
[8] Һьнге Муса хун һьлда р'әшандә сәр щьмә'те у гот: «Ва йә хуна wе пәймане, йа кӧ Хӧдан анәгори ван һ'әму хәбәра т'әви wә гьреда».
[9] Пәй ван йәкар'а Муса, Һарун, Надаб, Абиһу у һ'әфте р'успийед Исраел һьлк'ьшийанә жоре,
[10] һьнге wана Хwәдейе Исраел дит, бьн ньгед wида тьштәки мина к'әлпич'е сафир бу у мина ә'змен зәлал бу.
[11] У әwи дәсте хwә ль сәр зар'ед исраелийайә бьжарти бьльнд нәкьр. Wана Хwәде дит, хwарьн у вәхwарьн.
[12] У Хӧдан готә Муса: «Һьлк'ьшә сәр ч'ийе щәм мьн wе дәре бьсәкьнә у әзе сәлед кәвьри т'әв qанун у т'әмийед кӧ мьн бона һинкьрьна wан ньвисин бьдьмә тә».
[13] Муса у бәрдәстийе wи Йешу р'абун, Муса кӧ wе һьлк'ьшийа сәр ч'ийайе Хwәде,
[14] һьнге готә р'успийа: «Һун вьр һивийа мә бьминьн, һ'әта кӧ әм вәгәр'ьнә щәм wә. Ва Һарун у Һур щәм wә нә, пьрса к'е һәбә бьра һәр'ә щәм wан».
[15] Муса һьлк'ьшийа сәр ч'ийе у ә'wр ч'ийа ньхамт.
[16] Р'умәта Хӧдан пәйайи сәр ч'ийайе Синайе бу у ә'wр шәш р'ожа ч'ийа ньхамт, Хӧдан р'ожа һ'әфта жь нав ә'wрда гази Муса кьр.
[17] Р'умәта Хӧдан ль бәр ч'ә'ве зар'ед Исраел мина агьре п'әр'ьтандьне бу ль сәр сәре ч'ийе.
[18] Муса к'әтә ль нава ә'wр у һьлк'ьшийа ч'ийе. Муса чьл р'ож у чьл шәви сәре ч'ийе ма.