<Дәрк'әтьн 6

[1] Хӧдан готә Муса: «Те ньһа бьбини, кӧ әзе чь сәре Фьрәwьн бькьм. Wе wан бь дәсте зор бәр'дә у wе wан бь дәсте зор жь wәлате хwә дәрхә».

[2] Хwәде т'әв Муса хәбәр да у готә wи: «Әз Хӧдан ьм.

[3] Әз чаwа Хwәдейе Һәри Зор, Бьраһим, Исһаq у Аqубва хӧйа бумә, ле бь наве хwә Хӧдан wанва хӧйа нәбумә.

[4] Мьн т'әви wан пәймана хwә гьреда, кӧ wәлате Кәнане бьдьмә wан, wәлате wани хәрибийе, wе дәра кӧ фьрари дәрбаз кьрьн.

[5] Мьн заринийа зар'ед Исраел бьһист кӧ мьсьрийа әw кьрьнә хӧлам у мьн пәймана хwә бир ани.

[6] Аwа бежә зар'ед Исраел: ‹Әз Хӧдан ьм! Әзе wә жь бьн баред мьсьрийайә гьран дәрхьм у wә жь хӧламтийа wан аза кьм, пе зәнда бәрбьр'и wә дьрежкьри у диwанед гьран хьлаз кьм.

[7] У әзе wә бькьмә щьмә'та хwә у бьбьмә Хwәдейе wә. У һьнге һуне бьзаньбьн кӧ Хӧдан Хwәдейе wә әз ьм, йе кӧ һун жь бьн баред мьсьрийайә гьран дәрхьстьн.

[8] У әзе wә бьбьмә wи wәлати, бона к'ижани мьн сонд хwар кӧ бьдьмә Бьраһим, Исһаq, Аqуб, әзе wи чаwа wар бьдьмә wә. Әз Хӧдан ьм›».

[9] Муса әв йәк зар'ед Исраелр'а гот, ле wан жь дьлтәнгийе у жь дәст шьхӧлед гьран гӧһдарийа Муса нәкьрьн.

[10] Хӧдан т'әв Муса хәбәр да у готе:

[11] «Һәр'ә щәм Фьрәwьне п'адше Мьсьре бежә кӧ зар'ед Исраел жь wәлате хwә бәр'дә».

[12] Һьнге Муса ль бәр Хӧдан хәбәр да у готе: «Ва йә, зар'ед Исраел гӧһдарийа мьн накьн, иди к'ӧ ма кӧ Фьрәwьн гӧһдарийа мьн бькә? Әз жи зьменда гьран ьм».

[13] У Хӧдан бона зар'ед Исраел у Фьрәwьне п'адше Мьсьре т'әви Муса у Һарун хәбәрда у ә'мьри сәр wан кьр кӧ зар'ед Исраел жь Мьсьре дәрхьн.

[14] Пешийед малбәтед wан әв ьн. Кӧр'ед Р'убен, ньхӧрийе Исраел, әв ьн: Һәнох, Паллу, Һәсрун у К'арми. Әв ьн малбәтед Р'убен.

[15] Кӧр'ед Шьмһ'ун әв ьн: Йәмуел, Йамин, Оһад, Йахин, Соһар у кӧр'е к'ӧлфәта кәнани Шаwул. Әв ьн малбәтед Шьмһ'ун.

[16] Навед кӧр'ед Леwи, ль гора сәрәщәма р'ьк'ьнйатед хwәва, әв ьн: Гершон, Qоһат' у Мерари. Т'әмамийа салед ә'мьре Леwи сәд си у һ'әфт сал бун.

[17] Кӧр'ед Гершон, ль гора малбәтед хwә, әв ьн: Либни у Шими.

[18] Кӧр'ед Qоһат' әв ьн: Ә'мрам, Исһар, Һеброн у Узиел. Т'әмамийа салед ә'мьре Qоһат' сәд си у се сал бун.

[19] Кӧр'ед Мерари әв ьн: Маһ'ли у Муши. Әв ьн малбәтед Леwи ль гора сәрәщәма р'ьк'ьнйатед хwәва.

[20] Ә'мрам мәт'а хwә Йок'әбәд станд у әwе wир'а Һарун у Муса анин. Салед ә'мьре Ә'мрам сәд си у һ'әфт сал бун.

[21] Кӧр'ед Исһар әв ьн: Qорах, Нәфәг у Зик'ри.

[22] Кӧр'ед Узиел әв ьн: Мишаел, Әлсафан у Сит'ри.

[23] Һарун Әлишәба, qиза Аминадав хушка Нәһшон станд. Әwе wир'а Надаб, Абиһу, Елазар у Ит'амар анин.

[24] Кӧр'ед Qорах әв ьн: Ассир, Әлqанаһ у Абиасаф. Әв ьн малбәтед qорахи.

[25] Елазаре кӧр'е Һарун жь нав qизед Путиел йәк хwәр'а жьн хwәст, әwе жи wир'а Пинһас ани. Пешийед леwийа ль гора малбәтед хwәва әв ьн.

[26] Әв ьн әw Муса у Һаруне, к'ижанар'а кӧ Хӧдан гот: «Зар'ед Исраел, р'әфед wанва жь wәлате Мьсьре дәрхьн».

[27] Әwед кӧ т'әв Фьрәwьн п'адше Мьсьре хәбәр дьн у бона зар'ед Исраел жь Мьсьре дәрхьн әв ьн: Муса у Һарун.

[28] Чахе кӧ Хӧдан wәлате Мьсьреда т'әви Муса хәбәр да,

[29] wе һьнге Хӧдан Мусар'а хәбәр да у готе: «Әз Хӧдан ьм! Һәр тьште кӧ әз тәр'а дьбежьм, бежә Фьрәwьне п'адше Мьсьре».

[30] Муса жи ль бәр Хӧдан гот: «Ва йә әз зьменда гьран ьм, Фьрәwьне чаwа гӧһдарийа мьн бькә?»