[1] Хӧдан т'әв Муса хәбәр да у гот:
[2] «Нав зар'ед Исраелда, жь һәр ньхӧрийе кӧ бәт'ьне вәдькә, һәгәр мәри бә йан һ'әйwан, мьнр'а нәдьр кә. Әw п'ара мьн ә».
[3] Муса готә щьмә'те: «Бир биньн ве р'оже, гава кӧ һун жь Мьсьре, wе мала хӧламтийе дәрк'әтьн, чьмки Хӧдан бь дәсте хwәйи зор һун жь wьр дәрхьстьн. Нане һьлати нәхwьн.
[4] Һун иро мәһа Абибеда дәрдьк'әвьн.
[5] У гава Хӧдан тә бьбә wәлате кәнанийа, һ'итийа, әморийа, һ'иwийа у йәбусийа, чаwа кӧ wи кал-бавед тәр'а сонд хwар кӧ wи wәлати бьдә тә, к'идәре шир у һьнгьв же дьк'ьшә, ве мәһеда әве дәрәще дәрбаз ки.
[6] Һ'әфт р'ожа нане шкәва бьхwи, р'ожа һ'әфта бьра щәжьна Хӧдан бә.
[7] Wан һ'әфт р'ожада, гәрәке нане шкәва бе хwарьне, тьштед һәвиртьр'шккьри гәрәке щәм тә т'ӧнә бә, нә жи нава т'әмамийа т'опраха тәда щәм тә һәвиртьр'шк һәбә.
[8] Wе р'оже гәрәке зар'е хwәр'а гьли ки бежи: ‹Әв бона wе йәке йә кӧ чь Хӧдан мьнр'а кьр, гава әз жь Мьсьре дәрк'әтьм›.
[9] Бьра әв ль сәр дәсте тә чаwа нишан бә у ль сәр ә'нийа тә жи бона биранине бә, wәки һинкьрьна Хӧдан сәр заре тә бә, чьмки бь дәсте зор Хӧдан тӧ жь Мьсьре дәрхьсти.
[10] Ви ә'рф-ә'дәти сал-сал wә'дәда дәрбаз ки.
[11] У гава Хӧдан тә бьбә wәлате кәнанийа, чаwа тә у кал-бавед тәр'а сонд хwарийә кӧ wи бьдә тә,
[12] һьнге һәр ньхӧрийе кӧ бәт'ьне вәдькә, бьдә Хӧдан. Һәр ньхӧрийе нерин жь һ'әйwанед тә, п'ара Хӧдан бә.
[13] Ле жь бәр һәр ньхӧрийе к'әрева бәрхәки бьди, ле һәгәр бәрва нәди, стуйе wи бьшкени. Ль нав зар'ед хwәда жь бәр һәр ньхӧрийе мәрьвайева бьди.
[14] У гава зар'а тә сьбе жь тә бьпьрсә у бежә: ‹Әв чь йә?› жер'а бежи: ‹Хӧдан бь дәсте зор әм жь Мьсьре, жь мала хӧламтийе дәрхьстьн.
[15] Гава Фьрәwьн бу кәвьр у нәхwәст мә бәр'дә, Хӧдан һәр ньхӧрийед wәлате Мьсьреда, жь ньхӧрийе мерьвда гьрти һ'әта ньхӧрийед һ'әйwен кӧштьн, бона wе йәке жи әз һәр ньхӧрийе нерини кӧ бәт'ьне вәдькә Хӧданр'а qӧрбан дькьм у жь бәр ньхӧрийед зар'ед хwәва дьдьм›.
[16] Бьра әв йәка нишанәк бә ль сәр дәсте тә у бәрә'ник бә ль бәр ч'ә'ве тә, чьмки бь дәсте зор Хӧдан әм жь Мьсьре дәрхьстьн».
[17] Гава Фьрәwьн щьмә'т бәр'да, Хwәде әw ль р'ийа wәлате фьльстинийар'а нәбьрьн, ле бәле әw һе незик бу, Хwәде гот: «Кӧ нәбә щьмә'т ч'ә'в шер' к'әвә п'ошман бә, пашда вәгәр'ә Мьсьре».
[18] Ле Хwәде щьмә'т дора бәр'ийева зьвьр'анд у бьрә алийе Бә'ра Сор , зар'ед Исраел сильһ'кьри жь wәлате Мьсьре дәрк'әтьн.
[19] Муса һәстуйед Усьв жи т'әви хwә һьлдан, чьмки Усьв зар'ед Исраел дабунә сонде у готьбу: «Ә'сә Хwәде wе сәр wәда бе, һьнге һәстуйед мьн жи т'әви хwә жь вьр һәвраз бьбьн».
[20] Әwана жь Сукоте р'ек'әтьн Ет'амеда, хьлазийа бәр'ийе конед хwә вәгьртьн.
[21] У Хӧдан пешийа wанва дьчу, р'оже пе стунәкә ә'wр р'е нишани wан дькьр, ле шәве жи пе стунәкә агьр р'онайи дькьр, кӧ әw шәв у р'ож р'е һәр'ьн.
[22] Р'оже стуна ә'wр, шәве жи стуна агьр жь бәр ч'ә'ве щьмә'те дур нә дьк'әтьн.