[1] Хӧдан т'әви Муса хәбәр да у готе:
[2] «Р'ожа йәкейә мәһа пешьн, Коне Шә'дәтийе, аwа готи Коне Щьвине вәгьри.
[3] Сьндоqа Шә'дәтийе бьби һьндӧр' у п'әр'де к'аши бәр ки.
[4] Т'әхт бини һьндӧр' у һәр тьште wи сәр щи бь щи р'ез ки, шәмдане бини һьндӧр', ч'ьрайед wе вехи у дайни сәр шәмдане.
[5] Горигәһа бьхурейә зер'ин дайни пешбәри Сьндоqа Шә'дәтийе у п'әр'де бавежи бәр дәре Коне Шә'дәтийе.
[6] Горигәһа дийарийа т'әвайишәwате дайни ль бәр дәре Коне Шә'дәтийе, аwа готи Коне Щьвине.
[7] Т'әште дайни ль навбәра Коне Щьвине у горигәһе, аве дагьри.
[8] Дора wе һ'әwше чекә у п'әр'де бавежә бәр дәре һ'әwше.
[9] Р'уне р'ункьрьне һьлди, Коне Шә'дәтийе у һ'әму чь кӧ һьндӧр'да һәйә р'ун ки, wе у һ'әму нав мала wе пироз ки, wәки әw пироз бә.
[10] Ӧса жи горигәһа дийарийа т'әвайишәwате у һ'әму һащәтед wе р'ун ки, горигәһе пироз ки, wәки горигәһ бьбә йа һәрә пироз.
[11] Т'әште у бьнгәһа wе р'ун ки у wе пироз ки.
[12] Һарун у кӧр'ед wи бини ль бәр дәре Коне Щьвине у wан бь аве бьшойи.
[13] К'ьнщед пироз Һарун ки, wи р'ун ки у wи пироз ки, кӧ к'аһинтийе мьнр'а бькә.
[14] Кӧр'ед wи жи бини у кьраса ль wан ки.
[15] Wан жи ӧса р'ун ки, чаwа тә баве wан р'ун кьр, кӧ әw мьнр'а к'аһинтийе бькьн. Әв р'ункьрьна wан ль нав ньсьлед wанда бьбә бона к'аһинтийа wанә һ'әта-һ'әтайе».
[16] Муса һәр тьшт чаwа кӧ Хӧдан т'әми дабу ӧса жи кьр.
[17] Сала дӧда, йәке мәһа пешьн, Коне Шә'дәтийе һатә вәгьртьне.
[18] Муса Коне Шә'дәтийе вәгьрт, бьнгәһед wан данин, читед wан данин, дәсту дәрбаз кьрьн у стун данә сәкьнандьне.
[19] Сәргьр авитә сәр Коне Шә'дәтийе у сәрк'еш жорда к'ьшандә сәр кон, чаwа кӧ Хӧдан т'әми дабу Муса.
[20] Шә'дәти һьлда у кьрә сьндоqе, дәсту хәлаqед сьндоqер'а дәрбаз кьрьн у qалп'ахе бахшандьне жорва дани ль сәр сьндоqе.
[21] Сьндоq бьрә һьндӧр'е Коне Шә'дәтийе, п'әр'дә к'аши бәр кьр у Сьндоqа Шә'дәтийе вәшарт, чаwа кӧ Хӧдан т'әми дабу Муса.
[22] Т'әхт дани һьндӧр'е Коне Щьвине, алийе бакӧра кон ви алийе п'әр'де дәр.
[23] У сәр wе ль бәр Хӧдан нан щи бь щи р'ез кьр, чаwа кӧ Хӧдан т'әми дабу Муса.
[24] Шәмдан дани һьндӧр'е Коне Щьвине, пешбәри т'әхт алийе башура кон
[25] у ль бәр Хӧдан ч'ьра вехьстьн у данинә сәр шәмдане, чаwа кӧ Хӧдан т'әми дабу Муса.
[26] Горигәһа зер'ин дани һьндӧр'е Коне Щьвине пешбәри п'әр'де
[27] у ль сәр wе бьхура бинхwәш агьршәwати кьр, чаwа кӧ Хӧдан т'әми дабу Муса.
[28] П'әр'дә авитә ль бәр дәре Коне Шә'дәтийе.
[29] Горигәһа дийарийа т'әвайишәwате дани ль бәр дәре Коне Шә'дәтийе, аwа готи Коне Щьвине у ль сәр wе дийарийа т'әвайишәwате у дийарийа нани да, чаwа кӧ Хӧдан т'әми дабу Муса.
[30] Т'әшт дани ль навбәра Коне Щьвине у горигәһе у бона шуштьн-вәшуштьне ав дагьрт.
[31] Муса, Һарун у кӧр'ед wи дәст у п'ийед хwә жь wе дьшуштьн.
[32] Гава кӧ дьк'әтьнә Коне Щьвине у незики горигәһе дьбун хwә дьшуштьн, чаwа кӧ Хӧдан т'әми дабу Муса.
[33] Һ'әwша дорбәре Коне Шә'дәтийе у горигәһе дада у п'әр'дә авитә ль бәр дәре һ'әwше. Бь ви аwайи Муса шьхӧл хьлаз кьр.
[34] Ә'wр Коне Щьвине ньхамт у р'умәта Хӧдан Коне Шә'дәтийе дагьрт.
[35] Муса нькарьбу бьк'әта Коне Щьвине, чьмки ә'wр данибу ль сәр кон у р'умәта Хӧдан Коне Шә'дәтийе дагьртьбу.
[36] Һәр гава ә'wр жь сәр Коне Шә'дәтийе р'адьбу, һьнге зар'ед Исраел т'әмамийа р'еwитийа хwәда р'едьк'әтьн,
[37] ле һәгәр ә'wр р'анәдьбу әw р'е нәдьк'әтьн, һ'әта wе р'ожа кӧ ә'wр р'абуйа.
[38] Ә'wре Хӧдан р'оже ль сәр Коне Шә'дәтийе бу, шәв жи ә'wрда агьр һәбу, ль бәр ч'ә'ве т'әмамийа мала Исраел, нава т'әмамийа р'еwитийа wанда.