[1] Коне Шә'дәтийе жь дәһә тәжед к'ьтане зьрав-бадайи у р'исе шин, ширк у соре гәвәз чеки, сәр wан жи бь хәбата ньтьрандьне херуба дәрхи.
[2] Дьрежайийа һәр тәжи бист у һ'әйшт зәнд бә у бәрайийа һәр тәжи чар зәнд бә, чапа һ'әму тәжа wәкә һәв бә.
[3] Пенщ тәж һәвва бьн у пенщ жи һәвва.
[4] Жь р'исе шин п'әвгьрека бавежи ль кәвийа кәре тәжед пешьн ль сәр лева һәввабуне, ӧса жи бавежи лева кәвийа кәре тәжед майини һәввабуне.
[5] Пенщи п'әвгьреки бавежи сәр п'арч'е һәр пенщ тәже ә'wльн, пенщи п'әвгьреки жи бавежи сәр лева п'арч'е һәр пенщ тәже дӧда, wәки һ'әму п'әвгьрек һәвр'а хәбәр дьн.
[6] Пенщи qәмьтокед зер'ин чеки у һәр дӧ п'арч'ед пенщ тәжи пе wан qәмьтока һәвва ки, wәки Коне Шә'дәтийе бьбә йәк.
[7] Бона сәргьртьна Коне Шә'дәтийе жь пьр'ч'а бьзьне йанздәһ тәжа чеки.
[8] Дьрежайийа һәр тәжи си зәнд бә у бәрайийа һәр тәжи чар зәнд бә, ӧса кӧ чапа һәр йанздәһ тәжа жи wәкә һәв бә.
[9] Пенщ тәжа башqә һәвва ки у шәш тәжа жи башqә. Тәже шәша жи нә'тька конва сәр пьштева qатки.
[10] Пенщи п'әвгьрека бавежи ль кәвийа кәре п'арч'е пенщтәжейи пешьнә ль сәр лева һәввабуне, пенщи п'әвгьрека жи бавежи ль кәвийа кәре п'арч'е шәштәжейи майини ль сәр лева һәввабуне.
[11] Пенщи qәмьтокед сьфьрин чеки у qәмьтока бавежи п'әвгьрека, п'әр'да һәвва ки кӧ бьбә конәк.
[12] Бәрмайийе тәже сәр кон, аwа готи ниве тәжа зедәбуйи пьшта конва дардакьри бә.
[13] Жь сәрк'еша сәр конә зедәмайи, зәндәк ви алийива зәндәк жи алийе дьнва һәр дӧ к'еләкава дардакьри бә, кӧ һәр дӧ к'еләкед Коне Шә'дәтийе бенә ньхамтьне.
[14] Жь ч'әрмед бәранайә сор р'әнгкьри сәргьрәке чеки бона сәргьртьна кон, жь ч'әрмед га-мә'сийа жи сәрк'ешәке чеки, бона к'ьшандьна ль сәр wе.
[15] Бона Коне Шә'дәтийе жь дара дарщеwийе читед сәкьнанди чеки.
[16] Дьрежайийа һәр чити дәһә зәнд у бәрайийа wан жи зәнд у нивәк бә.
[17] Сәре һәр чити бьра дӧ к'әрт һәбьн, кӧ һәвда р'унен, һ'әму читед Коне Шә'дәтийе жи ӧса чеки.
[18] Коне Шә'дәтийер'а, бона алийе кӧ дьк'әвә башуре бист чита чеки,
[19] жь зив чьл бьнгәһа бона бист чита чеки, дӧ бьнгәһа чите ә'wльнр'а бона һәр дӧ к'әрта, ӧса жи бона йед майин.
[20] Бона алийе дьн бакӧра Коне Шә'дәтийе бист чита чеки,
[21] бона wан чьл бьнгәһед зивин чеки, дӧ бьнгәһ бьн чите ә'wльнр'а, дӧ бьнгәһ жи бьн һәр читед майинр'а.
[22] Бона пьшта Коне Шә'дәтийе алийе р'оавайева шәш чита чеки.
[23] Алийе пьштева бона ә'нишкед Коне Шә'дәтийе дӧ чита чеки.
[24] Әw алийе жерева щот бьн у жорва жи пе хәлаqәке һәввакьри бьн. Бона һәр дӧ ә'нишка һәр дӧйа жи ӧса чеки.
[25] Бьра һ'әйшт чит т'әви һәр шанздәһ бьнгәһед хwәйә зивинва бьн. Дӧ бьнгәһ бьн чите ә'wльнда бьн, дӧбьнгәһ-дӧбьнгәһ жи бьн һәр читед майинда бьн.
[26] Жь дара дарщеwийе дәстуйа чеки. Пенща бона читед алики Коне Шә'дәтийе,
[27] пенща бона читед алийе дьнейи Коне Шә'дәтийе у пенщ дәстуйа жи алийе р'оавайева бона читед пьшта Коне Шә'дәтийе.
[28] Дәстуйе наведа гәрәке нава читар'а жь ви сәри һ'әта сәре дьн дәрбаз бә.
[29] Чита зер' ки, хәлаqед wан, аwа готи щийед кӧ дәстуйед тер'а дәрбаз бьн, бь зер' чеки. Дәстуйа жи зер' ки.
[30] Коне Шә'дәтийе щур'е wеда бьди сәкьнандьне, чаwа кӧ ль сәр ч'ийе тәр'а һатә нишанкьрьне.
[31] Жь р'исе шин, ширк у соре гәвәз у жь к'ьтане зьрав-бадайи п'әр'дәке бь хәбата ньтьрандьне херуба ль сәр чеки,
[32] wе бавежи сәр чар стунед дарщеwийейә зер'кьри, кӧ чәнгәлед wан зер' бьн у бьнгәһед wан жи зив бьн.
[33] П'әр'де бь qәмьтока дардаки у Сьндоqа Шә'дәтийе бьби һьндӧр' wи алийе п'әр'де. Әw п'әр'дәйе wәр'а навбьр'ийе бьдә ль нав Щийе Пироз у Щийе Һәри Пироз.
[34] Qалп'ахе бахшандьне бьди сәр Сьндоqа Шә'дәтийейә Щийе Һәри Пирозда.
[35] Т'әхт дайни ви алийе п'әр'де дәр. Шәмдане жи алийе башура Коне Шә'дәтийева дайни пешбәри т'әхт, т'әхт кӧ дьк'әвә алийе бакӧре.
[36] Бона дәре кон п'әр'дәке жь р'исе шин, ширк, соре гәвәз у жь к'ьтане зьрав-бадайи бь хәбата нәqьшандитийе чеки.
[37] Бона п'әр'де жь дара дарщеwийе пенщ стуна чеки у wан зер' ки, чәнгәлед wан жи зер' бьн у бона wан пенщ бьнгәһед сьфьр р'оки.