[1] Хӧдан т'әви Муса хәбәр да у готе:
[2] «Ва йә мьн бь нав гази Бьсалеле кӧр'е Урийе Һуре жь qәбила Щьһуда кьр.
[3] Мьн әw Р'ӧһ'е Хwәдева, бь сәрwахтийе, билантийе, дәстә'мәлийе у фьрасәта һәр п'ешәк'арийева дагьрт,
[4] wәки бь зер', зив у сьфьр тьшта бьһ'ӧньринә,
[5] у кәвьра бьк'олә qаш кә, дара бьк'олә у һәр щур'ә шьхӧли бькә.
[6] Ва йә мьн Оһолиабе кӧр'е Аһисамахе жь qәбила Дан чаwа к'омәкдар да wи у фьрасәти кьрийә дьле хwәйифьрасәта, wәки һәр тьште кӧ мьн т'әми ль тә кьрьнә бькьн.
[7] Коне Щьвине, Сьндоqа Шә'дәтийе, qалп'ахе бахшандьнейи сәр wе у һ'әму навмала кон,
[8] ӧса жи т'әхт дәрданед wева, шәмдана хальс һ'әму һащәтед wева у горигәһа бьхуре,
[9] горигәһа дийарийа т'әвайишәwате у һ'әму һащәтед wе, т'әшт у бьнгәһа wе,
[10] к'ьнщед qӧльхкьрьне, к'ьнщед пирозә к'аһин Һарунр'а у к'ьнща кӧр'ед wир'а бона хьзмәтк'арийе,
[11] р'уне р'ункьрьне у бьхура бинхwәш бона Щийе Пироз, ван һ'әмуйа ӧса чекьн чаwа кӧ мьн т'әми да тә».
[12] Хӧдан т'әви Муса хәбәрда у готе:
[13] «Тӧ т'әви зар'ед Исраел хәбәр дә у бежә: ‹Һун гәрә ә'сә шәмийед мьн хwәй кьн, чьмки әва нишанәкә ль нава мьн у wә ньсьлед wәда, кӧ һун бьзаньбьн wәки әз Хӧдан ьм, йе кӧ wә бӧһӧрти-жьбарә дькьм.
[14] Аwа шәмийе хwәй кьн, чьмки әw бона wә пироз ә, к'е кӧ wе бьһ'әр'ьминә гәрәке бе кӧштьне. Һәгәр йәк wе р'оже шьхӧләки бькә, бьра әw мәрьва жь нав щьмә'та хwә бе р'аqәтандьне.
[15] Бьра шәш р'ожа хәбат бе кьрьне, ле р'ожа һ'әфта шәмийа р'ьһ'әтийе йә, пироз ә бона Хӧдан. К'е кӧ р'ожа шәмийе шьхӧләки бькә гәрәке бе кӧштьне.
[16] Бьра зар'ед Исраел шәмийе хwәйи кьн, wәки шәми ль нав ньсьлед wанда бе хwәйикьрьне, чаwа пәймана һ'әта-һ'әтайе.
[17] Әw нишана һ'әта-һ'әтайе йә ль нав мьн у зар'ед Исраелда, чьмки Хӧдан ль нава шәш р'ожада ә'рд у ә'зман ә'фьрандьн у р'ожа һ'әфта дәсте хwә жь хәбате кьр у р'ьһ'әт бу›».
[18] Гава Хwәде ль сәр ч'ийайе Синайе хәбәрдана хwәйә т'әви Муса сәр һәвда ани, дӧ сәлед Шә'дәтийе данә wи. Сәлед кәвьрийә бь т'ьлийа Хwәде ль сәр ньвисар.