[1] Ва йә чь кӧ тӧ гәрәке т'әви wан бьки, кӧ әw бӧһӧрти-жьбарә бьн у мьнр'а бьбьнә к'аһин. Щанәгаки у дӧ бәранед беqӧсур,
[2] нане бе һәвиртьр'шк, к'атед бе һәвиртьр'шк пе р'ун стьрайи у лоше бе һәвиртьр'шк сәр р'ункьри һьлди. Вана жь аре гәньмийи хас чеки.
[3] У wан бьки сәләке, wан ль сәр сәле т'әви щанәге у һәр дӧ бәрана һ'әди бьди.
[4] Һарун у кӧр'ед wива жи бини ль бәр дәре Коне Щьвине у wан пе аве бьшойи.
[5] К'ьнща һьлди, аwа готи кьрас, чӧхе ефод, ефод у р'әхтсинг Һарун ки, бь бәнпьште ефод жи пьшта wи гьреди.
[6] П'ап'ах бьди сәре wи у сәр п'ап'ахда жи к'офийа пироз дайни.
[7] Р'уне р'ункьрьне һьлди, сәр сәре wида ки у wи р'ун ки.
[8] Кӧр'ед Һарун жи бини кьраса ль wан ки,
[9] бәнпьшта бьди пьшта wан у к'олоза ль сәре wан бьп'еч'и, к'аһинти бона wан бьбә ә'рф-ә'дәте һ'әта-һ'әтайе. Бь ви аwайи Һарун у кӧр'ед wи хьзмәтк'арийа wанда qәwин-qәдим ки.
[10] Щанәге бини ль бәр Коне Щьвине у Һарун кӧр'ед хwәва бьра дәстед хwә дайньнә ль сәр сәре щанәге.
[11] У ль бәр дәре Коне Щьвине ль бәр Хӧдан щанәге сәржеки.
[12] Жь хуна щанәге һьлди у бь т'ьлийа хwә стьруйед горигәһе хи, һ'әму хуна майин бьр'ежи бьне горигәһе.
[13] Һ'әму бәзе сәрзьк, бәтане щәгәре, һәр дӧ гӧр'ч'ька бәзе wанва һьлди у ль сәр горигәһе агьршәwати ки.
[14] Ле гоште щанәге, ч'әрме wи у ә'дәба wи жь зоме дәрхи у бьшәwьтини. Әва дийарийа жь гӧнә паqьжбуне йә.
[15] Жь бәрана йәки һьлди, бьра Һарун у кӧр'ед wи дәстед хwә дайньнә ль сәр сәре бәрен.
[16] Wи бәрани сәржеки, хуна wи һьлди у ль сәр һәр чар к'еләкед горигәһеда бьр'әшини.
[17] Бәрен һур ки, дьлһ'ьнава у ньгед wи бьшойи у wан дайни ль сәр гоште һуркьри у сәре wи.
[18] Т'әмамийа бәрен ль сәр горигәһе агьршәwати ки, әва дийарийа т'әвайишәwате йә бона Хӧдан. Дийарийа шәwатейә бинхwәш ә бона Хӧдан.
[19] Бәране дьн жи һьлди, бьра Һарун у кӧр'ед wи дәстед хwә дайньнә ль сәр сәре бәрен.
[20] Бәрен сәржеки, жь хуна wи һьлди гӧпька гӧһе Һарунә р'асте у гӧпька гӧһе кӧр'ед wийә р'асте хи, ӧса жи печ'ийа мәзьнә дәсте wани р'асте у печ'ийа мәзьнә ньге wани р'асте хи. Хуна майин ль сәр һәр чар к'еләкед горигәһеда бьр'әшини.
[21] Жь wе хуна сәр горигәһе у жь р'уне р'ункьрьне һьлди, бьр'әшини ль сәр Һарун, к'ьнщед wи у ль сәр кӧр'ед wи у к'ьнщед кӧр'ед wи. Һьнге Һарун, к'ьнщед wи у кӧр'ед wийә т'әви wи у к'ьнщед кӧр'ед wи wе пироз бьн.
[22] Паше бәзе бәрен, даwе, бәзе сәрзьк, бәтане щәгәре, һәр дӧ гӧр'ч'ька бәзе wанва у пила р'асте һьлди, чьмки әва бәране qәwин-qәдимкьрьне йә.
[23] Жь сәла нане бе һәвиртьр'шкә ль бәр Хӧдан, бок'онәки, к'атәки бь р'ун чекьри у лошәки һьлди
[24] у wан дайни ль сәр дәстед Һарун у дәстед кӧр'ед wи у wан ль бәр Хӧдан чаwа дийарийа һ'әжандьне бьһ'әжини.
[25] Паше ван жь дәстед wан бьгьри, ль сәр горигәһе т'әви дийарийа т'әвайишәwате агьршәwати ки, бона бинхwәшийе ль бәр Хӧдан. Әва дийарийа шәwатейә бона Хӧдан.
[26] Wи сәрсинге бәране кӧ бона qәwин-qәдимкьрьна Һарун бу һьлди у ль бәр Хӧдан чаwа дийарийа һ'әжандьне бьһ'әжини. Әве бьбә п'ара тә.
[27] Сәрсинге һ'әжандьне у пила жорбьльндкьрьне жь бәране qәwин-qәдимкьрьне кӧ һатьбун һ'әжандьне у жорбьльндкьрьне, бона Һарун у кӧр'ед wи пироз ки,
[28] бьра әв йәк алийе зар'ед Исраелда бона Һарун у кӧр'ед wи бьбә qануна һ'әта-һ'әтайе. Әва дийарийа жорбьльндкьрьне йә у wе бьбә дийарийа жорбьльндкьрьне жь qӧрбанед һәләqәтийе кӧ зар'ед Исраел дийарийа жорбьльндкьрьне бьдьнә Хӧдан.
[29] Пәй Һарунр'а к'ьнщед wийә пироз кӧр'ед wир'а бьминьн, wәки гава әw бенә р'ункьрьне у бенә qәwин-qәдимкьрьне әw к'ьнщ ль wан бьн.
[30] Жь зар'ед wи, йе кӧ wе дәwса wи бьбә к'аһин у бьк'әвә Коне Щьвине кӧ хьзмәтк'арийе Щийе Пирозда бькә, бьра һ'әфт р'ожа wан к'ьнща хwә кә.
[31] Бәране бона qәwин-qәдимкьрьне һьлди у щики пироз гоште wи бьк'әлини.
[32] Һарун у кӧр'ед wи ль бәр дәре Коне Щьвине wи гоште бәрен у нане сәледа бьхwьн.
[33] Әwана wан тьшта бьхwьн, бь чь һатьнә гӧнәк'әwандьне бона qәwин-qәдими у бӧһӧрти-жьбарәбуна wан. Кәсәки дьн гәрәке нәхwә, чьмки пироз ьн.
[34] Ле һәгәр жь гошт у нане бона qәwин-qәдимкьрьне һ'әта сәре сьбәһе бьминә, әwед бәрмайи бьшәwьтини. Гәрә әw нәйенә хwарьне, чьмки пироз ьн.
[35] Һ'әму т'әмийед кӧ мьн чаwа бона Һарун у кӧр'ед wи данә тә ӧса бьки, нава һ'әфт р'ожда wан qәwин-qәдим ки.
[36] Р'оже щанәгаки qӧрбан бьди бона гӧнәк'әwандьне. Бь ве йәке горигәһе паqьж ки. Сәрда жи wе р'ун ки wәки пироз бә.
[37] Һ'әфт р'ожа бона горигәһе к'әwандьне бьки wе пироз ки у горигәһе бьбә йа һәрә пироз. Һ'әму чь кӧ горигәһе к'әвә wе пироз бә.
[38] Ва йә чь кӧ тӧ гәрәке һәр т'ьм ль сәр горигәһе бьди, р'оже дӧ бәрхед йәк сали.
[39] Бәрхәки сәре сьбәһе бьди, йе дьн жи бәре еваре.
[40] Т'әви бәрхе ә'wльн п'арәкә чапе жь дәһа йәк аре хаси стьрайи т'әви п'арәкә һине жь чара йәк р'уне ледайи у п'арәкә һине жь чара йәк шәрав, чаwа дийарийа сәрдакьрьне бьди.
[41] Бәрхе дӧда жи бәре еваре бьди. Мина wе дийарийа нанийә сәре сьбәһе у мина дийарийа сәрдакьрьне. Әва дийарийа шәwатейә бинхwәш ә бона Хӧдан.
[42] Бьра әва ль нав ньсьлед wәда бьбә дийарийа т'әвайишәwатейә һәр т'ьм ль бәр Хӧдан, бәр дәре Коне Щьвине, wи щийе кӧ әзе р'асти wә бем, т'әви тә хәбәр дьм.
[43] Wе дәре әзе р'асти зар'ед Исраел бем у бь р'умәта мьнва әw щийе пироз бә.
[44] Әзе Коне Щьвине у горигәһе пироз кьм, ӧса жи Һарун у кӧр'ед wи пироз кьм, wәки мьнр'а к'аһинтийе бькьн.
[45] Әзе ль нав зар'ед Исраелда бьминьм у бьбьмә Хwәдейе wан.
[46] Һьнге әwе бьзаньбьн кӧ әз Хӧдан ьм, Хwәдейе wан, кӧ мьн әw жь wәлате Мьсьре дәрхьстьн, wәки ль нава wанда бьминьм. Әз Хӧдан ьм, Хwәдейе wан.