[1] أَکُّو وَحَیِ عِیسَى أَلْمَسِیوُیٜ، وَحَیِ دُوُوࢽْ اللَّه تِرُو أَوُو تُسِّوَوُو ࢻَغَتْ وَکَّجِدَ أَمْ تِیَ غَوُرُو ࢻْلٜجُوُورُو ثِࢽَدْ؞ تِ یٜ مَلَیْیَࢽْجُ لَآ ثُࢽُودٜ وُولُودِࢽْجُ یَحْیـَرُو إِسَࢽُویٜىٰࢽُو؞
[2] یَحْیـَى یٜ أَوُو کْلَ مَࢽَ اللَّهیٜیَ شٜدَ عِیسَى أَلْمَسِیوُیٜیَیٜࢽْ ثُرُࢽَ سَمَّا شٜدَیٜࢽُو؞
[3] بَرْغَا کَمْ مَࢽَ کَوُرِ ࢽَوِࢽَوِ أَدْیٜیَ کْرَجِدْ، کُورُو بَرْغَا یٜ تَیِ أَوُو تِلَࢽْ رُوُوَدَدَ ࢻَࢽْجَࢽٜ ࢽغُوجَیْدْ، دَلِلْࢽْجُدْ سَࢽْجُ کَرْࢽْجْࢽَ ࢽَࢽْغَرُو؞
[4] وُمَ یَحْیـَدْ جَمَ تُلُرْ عِیسَىٰ غَوُ ثِدِ أَسِیَیٜرُو: سَلَمْ! اللَّه دُوُوࢽْ کْرْمَ یٜ مبٜجِ، کُرٜ یٜࢽْ دْغَࢽَ، ࢻُوُ یٜࢽْ دْغَیْدْ سٜرَّ ࢽَࢽْلٜوَا ࢽجَدُو! رُحُ تُلُرْ ࢻُوُ کُرِسْࢽْجُ کْرْمَیْیٜࢽْ دَسَاࢽَدْ یٜ سٜرَّ ࢽَࢽْلٜوَا ࢽجَدُو!
[5] کُورُو عِیسَى أَلْمَسِیوُ شٜدَمَ أَمَࢽَّ، کَرْمُولَࢽْ بُرْوُوࢽْ ثِدُمَ، کُورُو مَیْیَ دُࢽِیَ سَمَّیٜیَ ࢽُودُومَدْ یٜ سٜرَّ ࢽَࢽْلٜوَا ࢽجَدُو! عِیسَى أَلْمَسِیوُ تِ دُوُوࢽْ أَࢽْدِیَ سَرَاࢽَ یٜ، بُࢽْجُیٜࢽْ بِوُوَࢽْدٜلَࢽْ سَکَّاࢽَ یٜ،
[6] کُورُو أَࢽْدِیَ ࢽُودُووُوَ رِمَࢽَّا اللَّه بَوَࢽْجُیٜرُو سَدْࢽَ یٜدْ، تِرُو دَرَجَا کْࢽْدُوُووَ حَرْ أَبَدَ أَبَدِࢽُّو تِیُو! أَمِࢽْ؞
[7] أَکُّو ثُرُو ࢻُوࢻُووْیٜࢽْ کْࢽْدٜ ثْدِ؞ وُࢽْدُ یَیٜ سِمْࢽْجُࢽْ تِیَ ثُرُیْ، حَرْ أَمْ تِیَ سُکْثَࢽَدْ، کُورُو جَمَ دُࢽِیَیٜ سَمَّ کْلَ تِیٜࢽْ ثَسِرِ؞ أَدْغَیْمَ؞ أَمِࢽْ؞
[8] اللَّه کْمَࢽْدٜىٰ: «وُمَ بُرْوُویٜ وُو، دَرْیٜىٰ یٜ وُو، مَرْتَوَمَ دُوُوࢽْ کْرْمَ یٜ مبٜجِ، کُرٜ یٜࢽْ دْغَࢽَ، ࢻُوُ یٜࢽْ دْغَیْدْ وُو!» یٜࢽُو؞
[9] وُ یَحْیـَى کْرَمِࢽْدُو یٜ، کَمَࢽْدُو یٜ ثُرُو بُوࢽٜ ࢽجَا ࢽُودُو بَرْغَآ ࢽٜتُّوَ عِیسَلَࢽْ دَسَاࢽَدْیٜࢽْ، کْلَ مَࢽَ اللَّهیٜیَ شٜدَ عِیسَیٜیَیٜࢽْ ثُکُ بَتْمُوسْ ثَࢽِلَࢽْ کْرْغَکُّو؞
[10] ࢽغَیْ دُوُوࢽْ، یِمْ کْمَیٜیَ رُحُ اللَّهیٜ وُرُو جْمْسِیٜ کُواْ کُرَ کَࢽْغَدِیٜ غَیْ ࢽغَوُوࢽِࢽْ ࢽُکْثِ ࢻَࢽْغٜکُّو؞
[11] کُواْدْیٜ وُرُو: «أَوُو رُمِدَ کِتَوُلَࢽْ رُوُࢽٜ جَمَ تُلُرْ عِیسَىٰ غَوُ بْرْࢽِ أَࢽِیٜرُو جُوَغْࢽٜ: أَࢻِسَ، سِمِرْࢽَ، بِرْغَمُسْ، تِیَتِرَ، سَرْدِسْ، ࢻِلَدٜلْࢻِیَ، لَوُدِکِیَ؞»
[12] دَجِ وُࢽْدُ وُرُو مَࢽَسِیرُو کُرُورُو سُوُورْغَدَکُّو؞ سُوُورْغَدَکّْࢽِیَ، ࢻَتْلَ دِࢽَرّٜ تُلُرْ کِرُکُّو،
[13] کُورُو دَوُࢽْجَࢽْ أَوُو لَا أَدَمْغْࢽَا ثَمُࢽْ دَادَ مبٜجِ؞ کَجْمُ کُرُوُ لُوَدَ، کُورُو بٜلْ دِࢽَرّٜ ࢽغَࢽْجِࢽْجُرُو تِکّٜرْࢽَ؞
[14] کْلَࢽْجُوَ کَࢽْدُرِࢽْجُوَ بُلْ ࢻُوکْ وُلُ بُلْ غَیْ، سِمْࢽْجُ یٜ تْلَمْ کَࢽُّیٜ غَیْ؞
[15] سِࢽْجُ یٜ کُلُّو کَغْلْمَدِࢽْ ثِࢽْغَدَ یِیلْجِرُو کَلَکْثْࢽَدْ غَیْ، کُواْࢽْجُ یٜ إِࢽْغِ ࢽغْوُ دُࢽُووَرُو ثْغَسِ غَیْ؞
[16] مُکُّوࢽْجُ کْمْبُورَمْلَࢽْ سِلُّووُ تُلُرَّ، ثِࢽْجُلَࢽْ کَشَغَرْ تْلَمْ یِࢽْدِیَ ࢽغْلَرُو غَلَّدَ لُوُو ثْدِ؞ ࢻْکَّࢽْجُ یٜ جَوْرُو ࢽُرَّ کْࢽْغَلْ کَوْسُ کْلَ دَوُیٜ غَیْ؞
[17] تِیَ کِرُکّْࢽِیَ، ࢻُوُࢽْجُࢽْ ࢽُکّْࢽَ غَیْ بْࢻْ کِرُکُّو؞ دَجِ مُکُّوࢽْجُ کْمْبُورَمْ غْࢽَسِیٜ وُرُو: «بَرٜ رِࢽْمِّ! وُمَ بُرْوُویٜ وُو، وُمَ دَرْیٜىٰ یٜ وُو،
[18] وُمَ کْࢽْدْغَیْمَدْ وُو؞ ثَلَࢽْ ࢽُکّْࢽَ، أَمَّ أَکُّوࢽِ حَرْ أَبَدَ أَبَدِࢽُّو رُووَ کْرْغَکُّو؞ أَدْغَیْمَ مُکُّوࢽِࢽْ ثُوُرَمْ کَرْمُووَ لٜیْرَایٜیَ تَکّْࢽَ؞
[19] أَدْ ࢽَࢽْغَرُو أَوُو رُمَّدَ رُوُࢽٜ، أَوُو دُوُوࢽْ کْرْمَ مبٜجِ، کُورُو أَوُو ࢽغَوُو أَوُو أَࢽِیٜࢽْ وَکَّجَیْدْ؞
[20] أَکُّو مَاࢽَ أَسْرْ سِلُّووُ تُلُرْ مُکُّوࢽِ کْمْبُورَمْلَࢽْ رُمَّدَ ࢻَتْلَ دِࢽَرّٜ تُلُرْدَیٜدْ: سِلُّووُ تُلُرْ أَࢽِ تَیِمَ مَلَیْیَوَ جَمَ تُلُرْ وُوَ غَوُدْیٜ وُو، ࢻَتْلَ تُلُرْ أَࢽِ یٜ تَیِمَ جَمَ تُلُرْدْ وُو،» یٜࢽُو؞