[1] دَجِ سَمٜلَࢽْ أَلَمَ غَدٜ کُرَ یٜ، أَجَبَّ یٜیَ کِرُکُّو: مَلَیْیَ تُلُرْ مَسِوَ دَرْیٜىٰ تُلُرَّ، مَسِوَ دُوُوࢽْ تَیِلَࢽْ غْرْغَدُ اللَّهیٜ ثٜرِدْ؞
[2] کُورُو أَوُو لَا تٜکُ کُدْرَمْبٜ کَࢽُّوَ تُسَادَ غَیْ کِرُکُّو، کُورُو کْلَ تٜکُدْیٜࢽْ أَمْ دُوُوࢽْ کْلَ بُࢽْدِدَ غُمْکِࢽْجُوَ لَمْبَ ثُࢽْجُیٜیَیٜࢽْ کْࢽَّسَرْ ثَوَࢽْدْࢽَدْ مُکُّوࢽْجَࢽْ کُمْبِیَ اللَّهیٜیَ دَادَ؞
[3] أَیْیَ ࢽَوِ مُوسَى وُولُودِ اللَّهیٜدَ أَیْیَ تَمَدْیٜدَا یٜجَࢽٜ: «اللَّه کْمَ مَرْتَوَمَ، کْࢽْدُوࢽْمْ دَرَجَا جَوْرُو أَجَبَّ أَجَبَّ! اللَّه مَیْ جَمَ دُࢽِیَ سَمَّیٜ، جَوَلْࢽْمْ ࢽَࢽْعَدَلَّ جِرٜیَا!
[4] کْمَࢽْدٜ، وُࢽْدُ ࢽِیَ رِࢽْجٜ ࢽِرُو دَرَجَ ࢽجِوَوُودْ؟ أَوُووَ ࢽِ تِلُوࢽْمَّ تَیِرْ وُو؞ جَمَ دُࢽِیَیٜ سَمَّ إِسَࢽٜ ࢻُوُࢽْمْلَࢽْ أَمْبْࢽّجَغَیْ، کْࢽْدُوࢽْمْ ࢽَࢽْجِرٜىٰ ࢻْلٜیَادَ ࢽَࢽْغَرُو،» ثَࢽِ؞
[5] ࢽغَوُو أَدْیٜࢽْ ࢻَدُو اللَّهیٜ، وُوتّٜ لٜیْمَ شٜدَیٜ سَمٜلَࢽْ دْغَࢽَدْ ࢻْرْمْغَدَ کِرُکُّو،
[6] کُورُو مَلَیْیَ تُلُرْ مَسِوَ تُلُرَّدْ ࢻَدُو اللَّهیٜدْࢽْ کٜلُوُو؞ کَجْمُ لِࢽّٜ بُلْ ࢻُوکْ لُجَࢽَ، ࢽغَࢽْجِࢽْجَرُو بٜلْ دِࢽَرّٜ تِکّٜرْࢽَ؞
[7] أَلَوْ دٜوُ رُووَدْیٜ ࢻَلْࢽْجَ مَلَیْیَ تُلُرْدْرُو تَسَ دِࢽَرّٜ تُلُرْ غْرْغَدُ اللَّه حَرْ أَبَدَ أَبَدِࢽُّو دْغَمَیٜࢽْ ࢻٜرْ ثَسَمْبْرْࢽَ کَیْࢽُو؞
[8] أَدْغَیْمَ دَرَجَ اللَّهیٜیَ دُࢽُوࢽْجُوَ ࢽَࢽْغَرُو ࢻَدُو اللَّهیٜدْ کَࢽْغٜࢽْ کِمْبْرُو، کُورُو وُࢽْدُمَ رَکْثٜ ࢻَدُو اللَّهیٜدْرُو ࢽغَیِوَوُو، سَیْ مَسِوَ تُلُرْ مَلَیْیَ تُلُرّٜدْ وَکَّجَࢽٜ ثٜسٜرِیَ؞