[1] دَجِ کِرُکّْࢽِیَ، أَکُّو تَمَدْ کْلَ کَوْ کُرُوُ تِرُو سِیُوࢽْ ثَࢽِدْیٜࢽْ دَادَ، کُورُو رُوکُّوࢽْجُࢽْ أَمْ دْوُ مِیَࢽْ ࢻِدٜوُࢽْ دٜوُࢽْ ࢽغُمْࢽْجَࢽْ ثُࢽْجُوَ ثُ بَوَࢽْجُیٜیَ رُوُوَدَا؞
[2] کُواْ لَا إِࢽْغِ ࢽغْوُ دُࢽُووَرُو ثْغَسِ سُو، کٜىٰرَ جَوْرُو غْغْرْجِ سُو غَیْ سَمٜلَࢽْ ࢽُکْثِ ࢻَࢽْغٜکُّو، کُورُو کُواْ ࢻَکّْࢽَدْ أَلَمَ کُمْبِوُ کُمْبِࢽْجَ جَجَیْ غَیْ؞
[3] ࢻُوُ کُرِسْ کْرْمَیْیٜدَ أَلَوْ رُووَ دٜوُدَ أَمْوُرَوَدَیٜࢽْ أَیْیَ بْرِࢽْ یٜجَیْ؞ تَیِ دْوُ مِیَࢽْ ࢻِدٜوُࢽْ دٜوُࢽْ دُࢽِیَࢽْ مٜرُجَࢽَدْرُو کَجِیَ، وُࢽْدُمَ رَکْثٜ أَیْیَ أَدَ ثْرِوَوُو؞
[4] تَیِمَ أَمْ کَمُلَࢽْ کَدَوُ ࢽغُوجَࢽِّدْ وُو، تَیِدْ تَیِرْ ࢽَࢽْغَرُو؞ کُورُو تَیِمَ أَمْ تَمَدَ ࢽَ لٜجِ سَمَّرُو جَغَیْدْ وُو؞ ࢽٜمَ بُرْوُویٜ اللَّهَ تَمَدَرُو ثَدِدْرُو وَلْجَرُو ثُرُو أَدَمْغْࢽَیٜࢽْ أَمْ أَࢽِیَ مٜرُجَࢽَ،
[5] کُورُو ثِࢽْجَلَࢽْ کَتُّوُ ࢻِمَ ثُلُوُࢽِّ، تَیِلَࢽْ أَوُو وَادَ بَوُو؞
[6] دَجِ مَلَیْیَ غَدٜ لَا سَمٜ کُرُوُࢽْ ࢻَرْجِ کِرُکُّو، ࢽَࢽْجُࢽْ کَوُرِ کْجِ سَوِسُویٜ أَمْ دُࢽِیَࢽْ دَسَاࢽَرُو ࢽجْدُّورُو مبٜجِ، وُوتّٜ أَمْ لَرْدُ سُو، جِرِ سُو، تْلَمْ سُو، جَمَ سُو سَمَّیٜ؞
[7] کُواْ دُࢽُووَرُو سَࢻْثٜ: «اللَّهَ رِࢽُواْ، تِرُو دَرَجَ یُواْ، سَࢽْجُ شَرَ ࢽجْدُّویٜ ثْدْࢽَ ࢽَࢽْغَرُو؞ تِ دُوُوࢽْ سَمٜیَ ثِدِیَ تٜکُوَ سِمْ إِࢽْغِیٜیَا أَلَکْثْࢽَدْرُو أَمْبْتْکْࢽُواْ!» یٜࢽُو؞
[8] مَلَیْیَ یِࢽْدِیٜ لَا یٜ تِیَ جْغَࢽٜ: «سِدْغْࢽَ! بْرْࢽِ کُرَ بَبِلَیٜدْ سِدْغْࢽَ، تِ دُوُوࢽْ جَمَ دُࢽِیَیٜ سَمَّا ثَکّٜ دِبٜࢽْ کْࢽْجْࢽَࢽْجُ سُکْثْࢽَ یٜیَ ثَسَࢽَدْ،» یٜࢽُو؞
[9] مَلَیْیَ یَکُّیٜ لَا یٜ تَیِیَ جْغَࢽٜ کُواْ دُࢽُووَرُو سَࢻْثٜ: «وُࢽْدُ دُوُوࢽْ بُࢽْدِدَ غُمْکِࢽْجُوَرُو أَمْبْثِّیٜ تَوَ ࢽغُمْࢽْجُرُو بِ مُکُّوࢽْجُرُو غْࢽَجَغَیْدْ،
[10] تِ یٜ دِبٜࢽْ دُࢽُووَ إِࢽْغِلَࢽْ تُسَدْࢽِّ ثُرُو کْࢽْجَرَمْ غْرْغَدُ اللَّهیٜرُو ࢻِجَاࢽَ کٜࢽْ ثَیْ، کُورُو ࢻُوُ مَلَیْیَوَ اللَّهیٜیَ تَمَدَیٜࢽْ کَࢽُّوَ کَوْ کَࢽُّ کِمٜجْغْࢽَا کَمْدَ جَوُࢽٜ أَجَوُ ثَیْ؞
[11] أَدْغَیْمَ کَࢽْغٜ أَجَوُࢽْجَیٜدْ حَرْ أَبَدَ أَبَدِࢽُّو ثِجِ؞ بُࢽٜ یٜࢽْ کَلْ، کَوْسُ یٜࢽْ کَلْ، أَࢻُ ثَوَࢽْدِوَوُو، أَمْ دُوُوࢽْ بُࢽْدِدَ غُمْکِࢽْجُوَرُو أَمْبْثَّاࢽَ، کُورُو وُࢽْدُ یَیٜ تَوَ ثُࢽْجُیٜ تِیࢽْجُرُو غْࢽَجَاࢽَدْ!» یٜࢽُو؞
[12] أَکُّو سَ ࢽٜتُّ مُمِࢽَّیٜ، تَیِ دُوُوࢽْ وَدَوَ اللَّهیٜیَ جَاࢽٜ کَمْبْرْسٜࢽْجَ عِیسَلَࢽْ رُوجَࢽَدْ؞
[13] دَجِ کُواْ لَا سَمٜلَࢽْ ࢽُکْثِ ࢻَࢽْغٜکُّو، تِیٜ: «أَدَ رُوُࢽٜ: بَرْغَࢽْجَ أَمْ کْمَࢽْدٜلَࢽْ دَسَاࢽَ أَدْࢽْ ࢻُوُࢽْ سَࢽُیْدْ!» یٜࢽِّیَ، رُحُ اللَّهیٜىٰ: «آه، ࢽغْࢽْوُࢽْجَࢽْ تُسَّ، کْࢽْدُوࢽْجَ تَیِیَ جْغَیْ ࢽَࢽْغَرُو،» یٜࢽُو؞
[14] دَجِ کِرُکّْࢽِیَ، أَکُّو ࢻُوࢻُووْ بُلْ لَا مبٜجِ، کُورُو کْلَ ࢻُوࢻُووْدْیٜࢽْ تِ تَدَ کَمْبٜ غَیْ ࢽَࢻْکَدَ، کْلَࢽْجُࢽْ أَرِیَوُ کْرْمَیْیٜ دِࢽَرّٜیَ، مُکُّوࢽْجُ یٜࢽْ تَیِدَ تِمِیَا؞
[15] مَلَیْیَ غَدٜ لَا ࢻَدُو اللَّهیٜࢽْ ثُلُوٜ کُواْ دُࢽُووَرُو سَࢻْثٜ تِ کْلَ ࢻُوࢻُووْیٜࢽْ ࢽَࢻْکَدَدْرُو: «سَ کَلَیٜ ثْدْࢽَ؞ تَیِدَࢽْمْ ࢽغُوࢽٜ کَلَࢽٜ، ࢽٜمَ دُࢽِیَیٜدْ بَࢻْࢽَ ࢽَࢽْغَرُو،» یٜࢽُو؞
[16] دَجِ تِ کْلَ ࢻُوࢻُووْیٜࢽْ ࢽَࢻْکَدَدْ تَیِدَࢽْجُ دُࢽِیَرُو غْࢻْثِیٜ ࢽٜمَ دُࢽِیَیٜدَ کَلَیٜࢽُو؞
[17] دَجِ مَلَیْیَ غَدٜ لَا ࢻَدُو اللَّهیٜ سَمٜىٰدْࢽْ کِلُوُو، تِ یٜ مُکُّوࢽْجُࢽْ تَیِدَ تِمِیَا؞
[18] مَلَیْیَ غَدٜ لَا ࢽَࢽْجُࢽْ کْࢽْدُوُو کْلَ کَࢽُّیٜࢽْ مبٜجِدْ لَیَ دُوَدُرَمْدْࢽْ ثُلُوٜ کُواْ دُࢽُووَرُو سَࢻْثٜ تِ تَیِدَ تِمِیَا ثْدَࢽَدْرُو: «تَیِدَࢽْمْ ࢽغُوࢽٜ تَدَوَ یَ إِࢽَبّٜ دُࢽِیَیٜدَ کَمّٜ، تَدَوَࢽْجُ بَسَوُࢽَ ࢽَࢽْغَرُو،» یٜࢽُو؞
[19] دَجِ مَلَیْیَدْ تَیِدَࢽْجُ دُࢽِیَرُو غْࢻْثِیٜ تَدَوَ یَ إِࢽَبّٜ دُࢽِیَیٜدَ کَمْجٜ ثُرُو إِࢽَبْ غُوَتُّرَمْ کُرَ غْرْغَدُ اللَّهیٜدْیٜرُو ࢻِیٜىٰࢽُو؞
[20] غُوَتُّرَمْدْࢽْ ࢽغَوُو بْرْࢽِیٜࢽْ غُغُوَثَّࢽٜ بُ تِلَࢽْ کِلُوُو، دَدُࢽْجُ حَرْ رِجَمْ ࢻْرّٜ، ࢽَࢽْکُرُوُࢽْجُ کَ ࢽغَلْدُرَمْلَࢽْ دْوُ ࢻَلْ یٜرْ أَرَکُّوَ؞