[1] دَجِ مَلَیْیَدْ وُرُو کُلُوُ إِࢽْغِ رُو ࢻَࢽْدُویٜ یِیلْجِ کُدْرَمْ غَیْ تِیٜࢽْ أَوِ یَیٜ تُرُیْ کُرِسْ کْرْمَیْیٜ اللَّهَ تَمَدَیٜࢽْ ثُلُوِدَ ࢻْلٜسٜىٰࢽُو؞
[2] دَوُ ࢻَرْسَمْ بْرْࢽِدْیٜࢽْ ثِ یِࢽْدِ کُلُوُدْیٜࢽْ کْسْکَ رُو ࢻَࢽْدُویٜ مبٜجِ؞ سَا ࢻَلْࢽِࢽْ کْسْکَدْ مٜوُࢽْ یِࢽْدِࢽُّو تَدَ ثَکِّ، کْࢽْدَوُ ࢻِࢽْ یَیٜ تَدَ ثَکِّ، کُورُو کَلُࢽْجُدْ جَمَ دُࢽِیَیٜیَ إِسَࢽْغَدُوُرُو ࢻَیْدَا؞
[3] کُوَ أَدْࢽْ ࢻُوُࢽْ أَوِمَ بَسْکُوَدَ بَوُو؞ کُرِسْ کْرْمَیْیٜ اللَّهَ تَمَدَیٜدْ ࢽَدْࢽْ دْغَیْ، وُولُودِیَࢽْجُ یٜ تِرُو أَمْبْثَّغَࢽٜ
[4] ࢻْکَّࢽْجُ ثَرُیْ، کُورُو ثُࢽْجُ ࢽغُمْࢽْجَࢽْ رُوُوَدَ مبٜجِ؞
[5] کُوَ أَدْࢽْ ࢻُوُࢽْ بُࢽٜ بَوُو، کُورُو ࢽُرْ ࢻَتْلَیٜیَ کْࢽْغَلّٜیَلَࢽْ مْرَدُࢽْجَ بَوُو، أَوُووَ اللَّه کْمَࢽْدٜدْمَ تَیِیَ وَسِّ؞ ࢽغَیْمَࢽْ حَرْ أَبَدَ أَبَدِࢽُّو کْرْمَیْ ثَࢽُودِ؞
[6] دَجِ مَلَیْیَدْیٜ وُرُو: «مَࢽَ أَࢽِ أَوُو مْرْسَدُیٜ یٜ، جِرٜ یٜ؞ کْمَࢽْدٜ اللَّه رُحُࢽْجُ کَرْوُ ࢽَوِیَیٜرُو ࢽجَکُّومَدْ أَوُووَ تُسِّوَوُو دُولٜ وَکَّجَیْدَ وُولُودِیَࢽْجُرُو إِسَࢽُودُوُرُو مَلَیْیَࢽْجُوَ کِࢽُودُو،» یٜࢽُو؞
[7] «أَکُّوࢽِ دُوَࢽْ إِسْکِّ؞ بَرْغَࢽْجُ کَمْ دُوُوࢽْ مَࢽَ ࢽَوِࢽَوِ کِتَوُ أَدْیٜیَ ࢻَࢽْجٜ ࢽغُوجْࢽَمَدْ؞»
[8] وُمَ یَحْیـَى أَوُو أَࢽِیَ ࢻَکّٜ کِرُکُّو؞ ࢻَکّٜ کِرُکّْࢽِیَ، ࢻُوُ مَلَیْیَ أَوُو أَࢽِیَ ࢻْلٜسْغْࢽَدْیٜࢽْ تِرُو أَمْبْتُّوُرُو تْمْغَدَکُّو؞
[9] أَمَّ وُرُو: «بَرٜ دِمِّ! وُ یٜ وُولُودِ اللَّهیٜ، کُورُو وُوَ ࢽِیَ کْرَمِیَࢽْمْ ࢽَوِیَدَ أَمْ مَࢽَ کِتَوُ أَدْࢽْ رُوُوَدَ ࢽغُودَوُوَ سَمَّ تِلُو؞ اللَّهرُو أَمْبْتْکْࢽٜ!» یٜࢽُو؞
[10] کُورُو وَلْدٜ وُرُو: «بَرٜ مَࢽَ ࢽَوِࢽَوِ أَدْیٜدَ غْرَࢽْمِّ، سَࢽْجُ دٜلْ کَرْࢽْجْࢽَ ࢽَࢽْغَرُو؞
[11] کَمْ جِرٜࢽَمْبُمَدْ جِرٜࢽَمْبُࢽْجُࢽْ دْغَ، کَمْ تَیِرْ غْࢽِدْ یٜ تَیِرْࢽَمْبُࢽْجُࢽْ دْغَ؞ کَمْ جِرٜمَدْ یٜ جِرٜࢽْجُࢽْ دْغَ، کَمْ مُمِࢽْدْ یٜ ࢽَࢽْمُمِࢽّجُࢽْ دْغَ،» یٜࢽُو؞
[12] «أَکُّوࢽِ دُوَࢽْ إِسْکِّ؞ أَدْغَیْمَ أَلْوَسِࢽِ کُدْکّٜ وُࢽْدُ یَیٜرُو کْلَ أَوُو ثْدْࢽَدْیٜࢽْ کَلْکَلُّو یِکِّ؞
[13] وُمَ أَلْࢻَ یٜ، أُومٜغَ یٜ وُو؞ وُمَ بُرْوُویٜ یٜ، دَرْیٜىٰ یٜ وُو؞ وُمَ بَدِدُرَمْ یٜ، ࢽجٜرُورَمْ یٜ وُو؞
[14] بَرْغَࢽْجَ أَمْ کَجْمُࢽْجَ تُلْجَࢽَ، ࢽغَیْࢽِࢽْ أَمَرِ کْسْکَ رُو ࢻَࢽْدُویٜࢽْ ࢽغْرُویٜیَ بْرْࢽِدْرُو ثِࢽَّࢽْجُیٜࢽْ ࢽغَوُویٜیَ ثَوَࢽْدِدْ!
[15] تَوَرْ سُو، سَغَوُوُ سُو، کْࢽْجْࢽَوُ سُو، کَمْثٜجِ سُو، سْࢽْمْغُ سُو، أَمْ جِرٜࢽَمْبُوُ کَتُّوُ رَوُووُ سَمَّ سُو دٜیَࢽْ؞
[16] «وُمَ عِیسَى، ࢽَیِ جَمَ وُوَ غَوُرُو أَوُو أَࢽِیَ إِسَࢽُوࢽْجَارُو مَلَیْیَࢽِیَ کِࢽُودْکُّو؞ وُمَ مَیْ دَاوُدَیٜ ࢻْرْدُࢽْجُ یٜ، کَدُوُࢽْجُ یٜدْ وُو، وُمَ سِلُّووُ ࢻَجَرّٜ بُلْ ࢻُوکْدْ وُو؞»
[17] رُحُ اللَّهیٜیَ ࢽجُدُدَیٜ: «أَرٜ!» ثَࢽِ؞ کَمْ ࢻَࢽْجْࢽَمَدْیٜ: «أَرٜ!» وُلْجُو؞ کَمْ ࢽغُدُࢽْجُوَمَدْ إِسُو، کُورُو کَمْ ثْرَاࢽَمَدْ إِࢽْغِ رُو ࢻَࢽْدُویٜ دٜرُو ثَ!
[18] وُࢽْدُ دُوُوࢽْ مَࢽَ ࢽَوِࢽَوِ کِتَوُ أَدْیٜدَ ࢻَࢽْجِدْرُو شٜدَغْکِّ، کَمْ لَا أَوُو لَآ مَࢽَ أَدْرُو ثْرْغَیْیَ، اللَّه تِرُو مَسِوَ کِتَوُ أَدْࢽْ رُوُوَدَدَ غْرْجِیے؞
[19] کُورُو کَمْ لَا أَوُو لَآ مَࢽَ ࢽَوِࢽَوِ کِتَوُ أَدْیٜدْࢽْ ثُتُّلُوِیَ، اللَّه ࢽُوَࢽْجُ کْسْکَ رُو ࢻَࢽْدُویٜیَ بْرْࢽِ دَرَجَادْیٜیَ کِتَوُ أَدْࢽْ رُوُوَدَدَ ثُتُّلُوِ؞
[20] تِ أَوُو أَࢽِیَ شٜدَجِدْیٜ: «آه، دُوَࢽْ إِسْکِّ،» ثْࢽِ؞ أَمِࢽْ؞ أَرٜ، کْمَ عِیسَى!
[21] سٜرْ کْمَ عِیسَیٜ أَمْ سَمَّلَࢽْ دْغَ! أَمِࢽْ؞