[1] وُمَ یَحُسَ وُولُودِ عِیسَى أَلْمَسِیوُیٜ یٜ، یَاࢽَ یَعْࢼُوبَیٜ یٜدْ أَمْ دُوُوࢽْ اللَّه بَوَ تَیِیَ ثْرَاࢽَ یٜ، عِیسَى أَلْمَسِیوُرُو تَیِیَ رُوجْࢽَ یٜ، تَیِ بُواْوَدَ یٜدْرُو:
[2] کَࢽْجِمَرِیَ ࢽَࢽْلٜوَا کْرَوُووَ ࢽَیِࢽْ ࢽغْوُجَ!
[3] کْرَوُووُࢽِ، کْلَ ࢽجْکَّوُو أَࢽْدِ سَمَّیٜدْیٜࢽْ ࢽَیِرُو کَسَدُوَرُو رُوُدُوُ رَاکّْࢽَ دُوُوࢽْ، ࢽَیِرُو رُوُࢽْمٜ کَمْبْرْسٜ مُمِࢽَّرُو تِلُو لُوࢽُّو تِࢽَدْرُو مْلْدْࢽُواْرُو لُواْدُ وَجِمْسْغْࢽَ؞
[4] أَوُووَ أَمْ لَا أَسْرْلَࢽْ ࢽغَسَاࢽَ، وُواْمْ أَدْ تْࢽْ کُرٜࢽْ تَیِرُو کَدَرْغَادَدْ؞ تَیِدْ غَࢽَمْبُوُ، سٜرْ اللَّهࢽْدٜىٰیَ ࢽَࢽْجَࢽٜرُو کَلَکْثَࢽٜ عِیسَى أَلْمَسِیوُ تِ مَیْࢽْدٜ تِلُو لُوࢽْ یٜ، کْمَࢽْدٜ یٜدَ أَࢽْغْرْجَیْ؞
[5] ࢽَیِدْ، أَوُو أَࢽِ سَمَّا ثَمَࢽْ ࢽُوࢽُوَّ یَیٜ، ࢽَیِرُو إِسَتَࢽّجَغَکِّیَ، رَاکُّو: کْمَࢽْدٜ ࢽغَوُو جَمَدَ ثْکَّیٜ لَرْدُ مَسَرّٜࢽْ ثُتُّلُوُࢽَدْࢽْ تَیِ کَمْبْرْسٜࢽَمْبُوُدَ سِیٜىٰࢽُو؞
[6] کُورُو مَلَیْیَوَ کَالَࢽْجَࢽْ دَجَࢽِّ کْࢽْدْغَیْرَمْ کْلَࢽْجَیٜ کُولْجَࢽَدْ، کْمَࢽْدٜ تَیِیَ سَرْغَ سَوِسُویٜࢽْ ثُرُو دُوُیٜࢽْ شَرَ یِمْ کُرَیٜدْرُو رُوجْࢽَ؞
[7] جِرِ أَدْغَیْࢽِࢽْ أَمْ بْرْࢽِ سُودُومْبٜیَ غُومُورّٜیَ بْلَمَسْکِࢽْجَیٜیَ کْلَࢽْجَا کْࢽْجْࢽَرُو سْرْثَّغَࢽٜ ࢽَࢽْجَࢽٜ جِرِ غَدٜیَ جَاࢽٜ مِسَلْ أَمْ وُواْمْ کَࢽُّ سَوِسُویٜ ثَسَیْدْرُو وَلْجَࢽَ؞
[8] ࢽغَیْمَ دُوُوࢽْ غَࢽَمْبُوُ أَࢽِ یٜ کْلَ کْࢽَّسِمْࢽْجَیٜࢽْ تِیࢽْجَ تَیِرْ غْࢽِرُو کَلَکْثَیْ، کْࢽْدُوُووُوَ وَجَیْ، کُورُو دَرَجَمَسُووَ بَسَّیْ؞
[9] تِ مَلَیْیَ کُرَ مِکَیْلَدْمَ، سَ کَمْبِوُجٜ إِوُلِیسَّ کْلَ کَمِࢽْ ࢽَوِ مُوسَیٜࢽْ لَوَلَجَࢽَدْࢽْ، ثِࢽْجُ مُدُ کَجٜ شَرَ رَدُوَ تِرُو ثْدّْࢽِّ، أَمَّ تِیٜ: «کْمَࢽْدٜ ࢽجْکَّدُو!» یٜࢽُو؞
[10] أَمَّ أَمْ أَࢽِ أَوُو ࢽُوجَࢽِّ سَمَّا بَسَّیْ، کُورُو أَوُو سَمَّ حَلْࢽْجَیٜࢽْ لْمَࢽَّ حَࢽْغَلْ بَوُووَ غَیْ ࢽُوجَࢽَدْ، تِمَ تَیِیَ سِجِیے؞
[11] کُتُّࢽْجَ، جَوَلْ کَابِلَیٜ یٜیَ جَاࢽَ، أَلْوَسِ ࢻَࢽْدُورُو بِوُ بَلَامبٜ یٜرُو کْلَࢽْجَ ثَسَکّْࢽَ، کُورُو تُرُ کُورَیٜ یٜࢽْ سِدَاࢽَ ࢽَࢽْغَرُو؞
[12] أَمْ أَࢽِ مَسْࢽَࢽْدُو ࢽَࢽْیَاࢽَیٜࢽْ تُرْࢽُو، ࢽَࢽْغُجَࢽِّࢽْ ࢽَیِیَ رُوکُّو جَوُࢽٜ ثَسَیْیَ، تَیِ کْلَࢽْجَ أَمْبَدَیْ؞ تَیِدْ ࢻُوࢻُووْ إِࢽْغِ بَوُووَ کَرُوَیٜ تْمْبَلْجِ غَیْ، کْسْکَوَ بِیلَࢽْ تَدَ بَوُو مْکْتَࢽٜ تْغْمْبُو سَࢽُࢽَ غَیْ؞
[13] کُورُو تَیِدْ تْمْبَرِیَ جَوْ تٜکُیٜ ثَوُلْکْثَیْ غَیْ بِلْوُ ࢽَࢽْغُࢽْجَیٜ ࢻِجَیْ، سِلُّووُوَ ࢻُوࢻُومْجَیْ غَیْ دُوُ ثْلْمْ ࢻْتْ حَرْ أَبَدَرُو تَیِرُو غْࢽَادَ؞
[14] ࢽَوِ إِدْرِسَ تِ دُوُوࢽْ ࢽَوِ آدَمْࢽِࢽْ تَمِیَ کَدُوُ کْࢽْتُلُرّٜدْ کْلَࢽْجَࢽْ ࢽَوِࢽَوِ ثْدٜ: «أَکُّو کْمَࢽْدٜ جَمَࢽْجُ مُمِࢽْ دْوُ کَدَ کَدَمِیَ رُوکُّو إِسِ،
[15] أَمْ سَمَّرُو شَرَ کَمْجِیٜ کْࢽْدُوࢽْجَ غَࢽَمْبُلَࢽْ ثَدْࢽَا مَࢽَ رَدُیٜ سَمَّا بِوُوُ غَࢽَمْبُوُ کْلَࢽْجُࢽْ وُلْجَࢽَآ بِوُرُو وُواْمْجِ،» ثْࢽَّ؞
[16] أَمْ أَࢽِ کَرْوُوَدَمَسُو، کَرْوُکُتَّࢽْجَ ࢻْلٜجَࢽٜ مَࢽْغَرْࢽْجَ دِوِ جَغَیْ، ثِࢽْجَ یٜࢽْ مَࢽَ رُوکُرَیٜ وُلْجَࢽٜ رِوَ کْلَࢽْجَیٜ ࢻَࢽْدُورُو أَمْبَ جَجَکْثَیْ؞
[17] أَمَّ ࢽَیِدْ، کْرَوُووُࢽِ، أَوُو کْࢽْغَیَمْبَ کْمَࢽْدٜ عِیسَى أَلْمَسِیوُیٜ وَکَّجِ ثْࢽٜ ثَلَࢽْ وُلْجَࢽَدَ تَࢽْغُواْ،
[18] ࢽَیِرُو: «جَمَࢽْ دَرْیٜىٰࢽْ أَمْ رُدُ غْࢽَدُوُمَسُو إِسَࢽٜ مَࢽْغَرْࢽْجَ دِوِ جَغَیْ،» یٜرَ؞
[19] أَمْ أَࢽِمَ یَکْتُ کُدُووُ وُو، رُحُ اللَّهیٜ ثَدَࢽِّ، حَلْ أَدَمْغْࢽَیٜ جَغَیْ؞
[20] أَمَّ ࢽَیِدْ، کْرَوُووُࢽِ، کَمْبْرْسٜࢽْدُو جَوْرُو تَیِرْدْلَࢽْ کْلَࢽْدُو دُࢽُووَغْࢽُواْ، اللَّهَ رُحُلَࢽْ کُورُواْ،
[21] کْرَوُو اللَّهیٜࢽْ کْلَࢽْدُو رُوࢽُواْ، کَࢽْجِمَرِ کْمَࢽْدٜ عِیسَى أَلْمَسِیوُیٜ رُو سَوِسُویٜ کُدُومَدَ غُرٜࢽُواْ؞
[22] أَمْ شٜکُّࢽْجَادَ ࢽجُࢽُوࢽُواْ،
[23] أَمْ لَآ کَࢽُّࢽْ تَیْوُو تُلُوُواْ یْکَّوُواْ، لَا یٜیَ اللَّه رِدَلَࢽْ ࢽجُࢽُوࢽُواْ، غْمَجٜࢽْجَ حَلْ تِییٜࢽْ کَدَوُوَدْمَا وَࢽُواْ؞
[24] تُو، تِ دُوُوࢽْ ࢽَࢽْجُࢽْ کْࢽْدُوُو ࢽَیِیَ ࢽجُرُوࢽْ کَدُیٜ یٜ، ࢻُوُ دَرَجَࢽْجُیٜࢽْ کَرْوُکْجِ دَمَ بَوُووَا سَرِوُ بَوُووَالَࢽْ سَدُوُیٜ یٜ مبٜجِدْ،
[25] وُوتّٜ اللَّه تِلُو ࢽجْکَّیِمَࢽْدٜدْ، کْمَࢽْدٜ عِیسَى أَلْمَسِیوُیٜࢽْ تِرُو دَرَجَا مَرْتَوَا کْرْمَیْیَ کْࢽْدُوُووَ تِیُو، تْࢽْ کَوُ جَمَࢽْ بُرْوُویٜࢽْ، کْرْمَ یٜ، حَرْ أَبَدَ یٜرُو! أَمِࢽْ؞