[1] دَجِ أَلَمَ جَوْمَرُو أَجَبَّ لَا سَمٜلَࢽْ ࢻْلٜیَادَ: کَمُ کْࢽْغَلَّࢽْ جَکْتْࢽَ، ثِدِیَ سِࢽْجُیٜࢽْ کُمْبَلَّ، کُورُو کْلَࢽْجُرُو أَرِیَوُ کْرْمَیْیٜ سِلُّووُ مٜوُࢽْ یِࢽْدِࢽّٜیَ؞
[2] کَمُدْ ثُرُووَ، ثُرُودْ تِیَ لٜجْࢽَ ࢽَࢽْجَوْرُو بُرْوُ ثَکِّ؞
[3] کُورُو أَلَمَ لَا غَدٜ سَمٜلَࢽْ ࢻْلٜیَادَ: کَدِ مَࢻْࢽْدِ کِمٜ ثِتْ کْلَ تُلُرَّ، کَࢽْغَدِ مٜوُوَ، کُورُو کْلَࢽْجُ سَمَّࢽْ أَرِیَوُ مَیْلَ تُلُرَّ؞
[4] ࢽغَوَرٜࢽْجُ سِلُّووُوَ سَمٜىٰ ثِ ࢻَلْ ثُرُو یَکُّیٜࢽْ ࢻْرَجٜ دُࢽِیَرُو غْࢻْکٜىٰࢽُو؞ کَدِدْ إِسٜ کَمُ ثُرُو لٜجْࢽَدْ ثَمْبِیَمَ، تَدَࢽْجُدَ ثُࢽْدِ ثْࢽٜ ࢻُوُࢽْجُࢽْ دَیٜࢽُو؞
[5] کَمُدْ تَدَ کُوࢽغوَ کٜمْبُو، تَدَ دُوُوࢽْ جَمَ دُࢽِیَیٜ سَمَّا کَ سُیٜࢽْ ثُࢽُودِدْ؞ کُورُو تَدَدَ ثَدَࢽٜ ࢽَ اللَّهیٜیَ کُرِسْࢽْجُ کْرْمَیْیٜیَرُو کٜسَدُو؞
[6] دَجِ کَمُدْ کَرَا دْرِرُو ࢽغْرْمْغٜࢽُو، ࢽَ دُوُوࢽْ اللَّه کَوُ دْوُࢽْ یٜرْ یِࢽْدِࢽْ ࢻِرَکُّࢽُّو تِرُو کِسْتُوُیٜرُو دَبَّرْجْغْࢽَدْ؞
[7] دَجِ کْرِوُ لَا سَمٜلَࢽْ وَکَّیٜࢽُو؞ مِکَیْلَا مَلَیْیَوَࢽْجُوَ کَدِدَ لَوَلَیٜرَ؞ کَدِدَ مَلَیْیَوَࢽْجُوَ یٜ تَیِیَ لَوَلَیٜرَ،
[8] أَمَّ رَکْثَࢽٜ ࢽَسَرْدَࢽِّ، کُورُو غَدٜرُو سَمٜلَࢽْ ࢽَ ثَوَࢽْدْࢽِّ؞
[9] کَدِ مَࢻْࢽْدِدَ دُࢽِیَرُو غْࢻْکٜىٰرَ، تِ دُوُوࢽْ کَدِ کُرٜىٰ تِرُو سٜدَࢽْ کُورُو إِوُلِیسْ ثَࢽِ، أَمْ دُࢽِیَیٜ سَمَّا جَمْبَدُمَدْ؞ تِیَ دُࢽِیَرُو غْࢻْکٜىٰرَ، مَلَیْیَوَࢽْجُوَ تِࢽْ کُࢽْدٜࢽُّو غْࢻْکٜىٰرَ؞
[10] دَجِ کُواْ دُࢽُووَ لَا سَمٜلَࢽْ ࢽُکْثٜ ࢻَࢽْغٜکُّو؞ تِیٜ: «کْرْمَ ࢽجْکَّوُووَ دُࢽُووَ کْرْمَیْیَ اللَّهیٜ یٜ، کْࢽْدُوُو أَلْمَسِیوُࢽْجُیٜ یٜدْ إِسْࢽَ، دَلِلْࢽْجُدْ ࢽغَدَرْدُمَ تِ دُوُوࢽْ بُࢽٜیَ کَوْسُوَرُو کْرَمِیَࢽْدٜیَ ࢻُوُ اللَّهیٜࢽْ ࢽغَدَرْجِدَ ثِدِرُو غْࢻْثَاࢽَ ࢽَࢽْغَرُو؞
[11] کْرَمِیَࢽْدٜدْ بُ تَمَدْیٜیَ مَࢽَ شٜدَࢽْجَیٜیَلَࢽْ کْࢽَّسَرْ کْلَࢽْجُࢽْ ثَوَࢽْدْࢽَ، کُورُو حَرْ کَرْمُورُو رُوࢽْجَ ࢽجُو وَجَࢽِّ؞
[12] أَدْمَ ࢽَࢽْغَرُو، ࢽِ سَمٜیَ ࢽَیِ سَمٜلَࢽْ دْغَوَّاسُو، کْجِ ࢻَࢽُّواْ! أَمَّ کُتُّࢽْدُو، ࢽَیِ ثِدِیَ تٜکُوَسُو، دَلِلْࢽْجُدْ إِوُلِیسْ جَوْرُو غْرْغَادَ ࢽَࢽْدُورُو جْࢻْثْغْࢽَ، کَوُ غَࢽَمَ تِرُو غَࢻْثُوُورُو ࢽُوجْࢽَ ࢽَࢽْغَرُو،» یٜࢽُو؞
[13] کَدِ مَࢻْࢽْدِدْ تِیَ دُࢽِیَرُو غْࢻْثَاࢽَرُو کِرُࢽِّیَ، کَمُ تَدَ کُوࢽغوَ ثَمْبْࢽَدَ کَدُدُ بَدِیٜࢽُو؞
[14] أَمَّ کَمُدْ کَرَا دْرِ ࢽَ کَدِدْࢽْ کُرُوُࢽُّو ࢻَرْجُو لٜجُورُو، ࢻٜࢻٜدُو یِࢽْدِ ࢽغَرْمُ جَوْرُو کُرَیٜ تِرُو کٜدُو، ࢽَ دُوُوࢽْ تِرُو کْرْوُ یَکُّ رٜدَارُو کِسْتُوُیٜ دَبَّرْدْغْࢽَدْ؞
[15] دَجِ کَدِدْ ثِࢽْجُࢽْ إِࢽْغِ کُلُوُ ثْغَسِ غَیْ کَمُدَ ثَدُورُو ࢽغَوُوࢽْجُࢽْ ࢻِیٜࢽُو؞
[16] أَمَّ ثِدِدْ کَمُدْرُو بَࢽَجِیٜ ࢻْرْمْدٜ کُلُوُ کَدِ ثِࢽْجُࢽْ ࢻِجْࢽَدَ کِیَࢽُو؞
[17] کَدِدْ کَمُدْرُو جَوْرُو غْرْغَجِیٜ ثِجٜ کَدُوُࢽْجُ غَࢻْثَࢽَ، وُوتّٜ تَیِ وَدَ اللَّهیٜ جَاࢽَا عِیسَىٰ شٜدَجَࢽَادْرُو کْرِوُ ࢽجْکَّدُورُو لٜىٰࢽُو؞
[18] کُورُو کْلَ ثِدِ کٜسَ ثِ تٜکُیٜࢽْ دَیٜࢽُو؞