[1] ࢽغَوُو أَدْیٜࢽْ مَلَیْیَ دٜوُ تَلْغْمُو دٜوُ دُࢽِیَیٜࢽْ دَادَ کَرُوَ دٜوُ دُࢽِیَیٜدَ بَرٜ کْلَ ثِدِیٜࢽْ بِ تٜکُیٜࢽْ بِ کْسْکَ ࢻِیٜمَࢽْ ࢻُجَࢽِّرُو رُوجَࢽَ کِرُکُّو؞
[2] مَلَیْیَ غَدٜ لَا یٜ مُکُّوࢽْ تَوَ اللَّه کْࢽْدْغَیْمَیٜیَ أَدِࢽَّمْبٜࢽْ سَمٜرُو تَتُّ ثْدِ کِرُکُّو؞ دَجِ کُواْ دُࢽُووَرُو سَࢻْثٜ مَلَیْیَ دٜوُ کْࢽْدُوُو ثِدِیَ بْرْمْبَ بَࢽَّدُیٜ ثَوَࢽْدْࢽَدْرُو:
[3] «بَرٜ ثِدِیَ تٜکُوَ کْسْکَادَ بَࢽَّࢽُوِّ، سَیْ وُولُودِیَ اللَّهࢽْدٜىٰرُو ࢽغُمْࢽْجَࢽْ تَوَ غْࢽَیِیٜیَ دُوُوࢽْ!» یٜࢽُو؞
[4] دَجِ أَمْ تَیِرُو تَوَ غْࢽَجَاࢽَدْیٜ ࢽَࢽّغْوُࢽْجَ ࢻَࢽْغٜکُّو: جِرِیَ سَمَّ کَدُوُ إِسْرَاءِیلَیٜࢽْ أَمْ دْوُ مِیَࢽْ ࢻِدٜوُࢽْ دٜرِرُو تَوَ غْࢽَجَاࢽَ؞
[5] جِرِ یَحُدَیٜࢽْ دْوُ مٜوُࢽْ یِࢽْدِࢽُّو تَوَ غْࢽَیٜىٰرَ، جِرِ رُبٜࢽّٜࢽْ دْوُ مٜوُࢽْ یِࢽْدِࢽْ، جِرِ غَدّٜࢽْ دْوُ مٜوُࢽْ یِࢽْدِࢽْ،
[6] جِرِ أَشٜرّٜࢽْ دْوُ مٜوُࢽْ یِࢽْدِࢽْ، جِرِ ࢽَࢻْتَلِیٜࢽْ دْوُ مٜوُࢽْ یِࢽْدِࢽْ، جِرِ مَࢽَسٜىٰࢽْ دْوُ مٜوُࢽْ یِࢽْدِࢽْ،
[7] جِرِ سِمِیُوࢽّٜࢽْ دْوُ مٜوُࢽْ یِࢽْدِࢽْ، جِرِ لٜوِیٜࢽْ دْوُ مٜوُࢽْ یِࢽْدِࢽْ، جِرِ إِسَّکَرّٜࢽْ دْوُ مٜوُࢽْ یِࢽْدِࢽْ،
[8] جِرِ جَبُلُوࢽّٜࢽْ دْوُ مٜوُࢽْ یِࢽْدِࢽْ، جِرِ یُوسُࢻُیٜࢽْ دْوُ مٜوُࢽْ یِࢽْدِࢽْ، جِرِ بِلِیَمِࢽُیٜࢽْ دْوُ مٜوُࢽْ یِࢽْدِࢽْ؞
[9] ࢽغَوُو أَدْیٜࢽْ جَمَ کَدَ کَدَمِ وُࢽْدُمَ رَکْثٜ کُومْجِوَوُو کِرُکُّو؞ تَیِدْ أَمْ لَرْدُوَ سُو، جِرِیَ سُو، جَمَ سُو، تْلَمْبَ سُو سَمَّیٜ ࢻُوُ کُرِسْ کْرْمَیْیٜدَ تَمَدَیٜࢽْ دَادَ کَجْمُ بُلْ لُجَࢽَ یٜ، مُکُّوࢽْ ࢽغْلَیْ ثَدَࢽَ یٜ،
[10] کُواْ دُࢽُووَرُو سَࢻْثَࢽٜ: «ࢽجْکَّوُودْ ࢽَ اللَّهࢽْدٜ تِ کْلَ کُرِسْ کْرْمَیْیٜࢽْ ࢽَࢻْکَدَمَدَ تَمَدَیٜࢽْ إِسِ!» ثَࢽِ؞
[11] مَلَیْیَوَ سَمَّ دَادَ کُرِسْدَ أَمْوُرَوَدَ أَلَوْ دٜوُدَا دِرِجَࢽٜ کْلْجَࢽَ دُوُوࢽْ، ࢻُوُ کُرِسْدْیٜࢽْ تْمْدَࢽٜ ࢽغُمْࢽْجَ ثِدِࢽْ غْࢽَجَࢽٜ اللَّهرُو أَمْبْثَّغَࢽٜ:
[12] «أَمِࢽْ! اللَّهࢽْدٜرُو ࢽجُࢽْغُورُووَ دَرَجَا ࢽَࢽْرَشِدُوَ وُسٜدُوَ بْرْسْمْبَ کْࢽْدُوُووَ دُࢽُووَ حَرْ أَبَدَ أَبَدِࢽُّو تِیُو! أَمِࢽْ!» یٜرَ؞
[13] دَجِ أَمْوُرَوَدْیٜ ࢻَلْࢽْجَ وُرُو: «أَمْ کَجْمُ بُلْ لُجَࢽَ أَࢽِ وُࢽْدُسُو؟ کُورُو ࢽدَرَࢽْ کَدِرَ؟» ثْࢽٜ سِوُورُو؞
[14] تِرُو: «کْمَࢽِ، ࢽِمَ ࢽُوࢽْمَّ وُو!» یٜکّْࢽِیَ، وُرُو: «أَمْ أَࢽِ، تَیِمَ ثُرُو بَسَرِ کُرَ دُࢽِیَیٜدْیٜࢽْ ثَلُوُࢽَسُودْ وُو؞ بُ تَمَدْیٜلَࢽْ کَجْمُࢽْجَا تُلْجَࢽٜ بُلُّو کٜدُو؞
[15] أَدْمَ ࢽَࢽْغَرُو ࢻُوُ کُرِسْ کْرْمَیْیٜ اللَّهیٜࢽْ دَادَ بُࢽٜیَ کَوْسُوَرُو ࢻَدُو اللَّهیٜࢽْ تِرُو أَمْبْثَّغَیْیَرُو دَسَیِ، کُورُو تِ کْلَ کُرِسْ کْرْمَیْیٜࢽْ ࢽَࢻْکَدَمَدْ کْࢽْدْغَیْرَمْࢽْجُࢽْ تَیِیَ جَکْثِ؞
[16] کُوَ أَدْࢽْ ࢻُوُࢽْ کْࢽَ سُو، ࢽغُدُ سُو غَدٜرُو ࢻَࢽْجَیْوَوُو، بِ کْࢽْغَلْ سُو، بِ کَوْسُ جَوْ ࢻِتْ سُو تَیِیَ لٜجَیْوَوُو،
[17] دَلِلْࢽْجُدْ تَمَ دَوُ کُرِسْ کْرْمَیْیٜࢽْ دْغَࢽَدْ سْࢽِࢽْجَرُو وَلْجٜ تَیِیَ سِمْ إِࢽْغِ رُو ࢻَࢽْدُویٜدْرُو ثَدِ، کُورُو اللَّه یٜ سِمَلُو سَمَّا سُلَتْ بَوُورُو سِمْࢽْجَࢽْ ثِࢽْجِ؞»