[1] دَجِ مُکُّو کْمْبُورَمْ تِ کْلَ کُرِسْ کْرْمَیْیٜࢽْ ࢽَࢻْکَدَمَدْیٜࢽْ کَکَّدُ کُرُوُ کْرِیَدَ ثُرُوࢽْجُوَ ࢽغَوُوࢽْجُوَ ࢽغَࢽْ رُوُوَ ࢽَ تُلُرْلَࢽْ کَرَمَلَࢽْ تْدَࢽَ کِرُکُّو؞
[2] کُورُو مَلَیْیَ کْࢽْدُوُووَ لَا کُواْ دُࢽُووَرُو سَࢻْثٜ: «وُࢽْدُ کَکَّدُدَ کَدُوَ کَرَمَࢽْجُدَ وُیْدُوَرُو مَرْتَوَا وُو؟» ثْࢽٜ ثُوُورِ کِرُکُّو؞
[3] أَمَّ وُࢽْدُمَ سَمٜࢽْ، بِ ثِدِࢽْ، بِ ثِدِیَ ثِدِیٜࢽْ کَکَّدُدَ رَکْثٜ کَجِوَوُو بِ ثُرُیْوَوُو؞
[4] کْلَ وُࢽْدُمَ کَکَّدُدَ کَدُ بِ کُرُورُو مَرْتَوَا تُوَࢽْدْࢽِّدْیٜࢽْ تَیْ دَکّٜ سُو بَدِیٜکُّو؞
[5] دَجِ أَمْوُرَوَدْیٜ ࢻَلْࢽْجَ وُرُو: «بَرٜ یِرْمِّ! أَکُّو ࢽغَمْ جِرِ یَحُدَیٜ، کَدُوُ مَیْ دَاوُدَیٜدْ کْࢽَّسَرْ ثُوَࢽْدْࢽَ، کَکَّدُدَ کَرَمَࢽْجُ تُلُرْدَ کَجِ،» یٜࢽُو؞
[6] دَجِ تَمَ لَا أَلَمَ دُوَادَ غَیْ کَتّٜ کُرِسْ کْرْمَیْیٜدَ أَلَوْ رُووَ دٜوُدَیٜࢽْ دَوُ أَمْوُرَوَدْیٜࢽْ دَادَ کِرُکُّو؞ تَمَدْ کَࢽْغَدِ تُلُرَّ، کُورُو سِمْ تُلُرَّ؞ تَیِمَ رُحُ تُلُرْ اللَّهیٜ دُࢽِیَ ࢽغَرُو جُوَادَدْ وُو؞
[7] تَمَدْ لٜجٜ کَکَّدُدَ مُکُّو کْمْبُورَمْ تِ کْلَ کُرِسْ کْرْمَیْیٜࢽْ ࢽَࢻْکَدَمَدْیٜࢽْ ࢽغُویٜࢽُو؞
[8] کَکَّدُدَ ࢽغُویٜࢽِّیَ، أَلَوْ رُووَ دٜوُدَ أَمْوُرَوَ ࢻِࢽْدِ دٜرِدَ ࢻُوُࢽْجُࢽْ تْمْغَدَرَ؞ وُࢽْدُࢽْجَ یَیٜ کُمْبِیَ تَسَ دِࢽَرّٜ کَاجِࢽْ تْمْبْرْࢽَا مُکُّوࢽْ ثْدَࢽَ؞ کَاجِدْ تِمَ مُودُوَ مُمِࢽَّیٜدْ وُو؞
[9] أَدْغَیْمَ أَیْیَ بْرِࢽْ یٜجَࢽٜ: «ࢽِدْ کَکَّدُدَ ࢽغُوࢽْمٜ کَرَمَࢽْجُدَ کَدُرُو مَرْتَوَا، دَلِلْࢽْجُدْ ࢽِیَ دُوَࢽْجَࢽٜ بُࢽْمْلَࢽْ جِرِ سُو، تْلَمْ سُو، جَمَ سُو، لَرْدُ سُو سَمَّࢽْ أَمْبَ اللَّهرُو مٜرُࢽْمَّ ࢽَࢽْغَرُو؞
[10] اللَّهࢽْدٜرُو تَیِیَ ࢽُودُووُوَ رِمَࢽَّارُو دِمَّ، کُورُو دُࢽِیَلَࢽْ کْرْمَیْ ثَࢽُودِ،» ثَࢽِ؞
[11] ࢽغَیْ رُکِّ دُوُوࢽْ، کُواْ مَلَیْیَوَ کَدَ کَدَمِ کُرِسْدَ أَلَوْوَ رُووَدَ أَمْوُرَوَدَا دِرِجَࢽٜ کْلْجَࢽَیٜ ࢻَࢽْغٜکُّو؞ ࢽَࢽّغْوُࢽْجَدْ دْوُیٜ دْوُࢽْجُیٜ دْوُ؞
[12] کُواْ دُࢽُووَرُو سَࢻْثَࢽٜ: «تَمَ دُوَادَدْ کْࢽْدُوُووَ أَرْسِییَ ࢽَࢽْرَشِدُوَ دُࢽُووَ بْرْسْمْبَ دَرَجَا ࢽجُࢽْغُورُووَ مُواْرُو مَرْتَوَا!» ثَࢽِ؞
[13] دَجِ أَلَوْوَ سَمٜىٰیَ ثِدِیٜیَ ثِدِیَ ثِدِیٜیَ تٜکُیٜیَ سَمَّیٜ: «تِ کْلَ کُرِسْ کْرْمَیْیٜࢽْ ࢽَࢻْکَدَمَدَ تَمَدَرُو ࢽجُࢽْغُورُووَ بْرْسْمْبَ دَرَجَا کْࢽْدُوُووَ حَرْ أَبَدَ أَبَدِࢽُّو تِیُو!» ثَࢽِ ࢻَࢽْغٜکُّو؞
[14] أَلَوْ رُووَ دٜوُدْیٜ: «أَمِࢽْ!» ثَࢽِ، کُورُو أَمْوُرَوَدْ یٜ تْمْدَࢽٜ أَمْبْتْکٜرَ؞