[1] ࢽغَوُو أَدْیٜࢽْ مَلَیْیَ غَدٜ جَوْرُو کْࢽْدُوُووَ سَمٜلَࢽْ جْࢻْثِ کِرُکُّو، کُورُو دُࢽِیَدْ دَرَجَࢽْجُلَࢽْ وَسْکَدَ؞
[2] مَلَیْیَدْ کُواْ دُࢽُووَرُو سَࢻْثٜ: «سِدْغْࢽَ! بْرْࢽِ کُرَ بَبِلَیٜدْ سِدْغْࢽَ! کْࢽْدْغَیْرَمْ سٜدَࢽَّیٜ یٜ، جُوࢽْغُو کَرُوَ بَتِّ سَمَّیٜ یٜ، جُوࢽْغُو ࢽغُدُو بَتِّ سَمَّیٜ یٜ، جُوࢽْغُو بُࢽْدِ بَتِّ وَادَ سَمَّیٜ یٜرُو وَلْجْࢽَ،
[3] دَلِلْࢽْجُدْ جَمَ دُࢽِیَیٜ سَمَّ یٜ دِبٜࢽْ دُࢽُووَ کْࢽْجْࢽَࢽْجُیٜࢽْ ثَسَࢽَ، مَیْیَ دُࢽِیَیٜ یٜ تِیَ رُوکُّو کْࢽْجْࢽَ ثَدْࢽَ، کُورُو سَوُرْوُ دُࢽِیَیٜ یٜ أَرْسِیࢽْجُ ࢽَ کُوجْࢽَیٜلَࢽْ غَرِوُرُو وَلْجَࢽَ ࢽَࢽْغَرُو،» یٜࢽُو؞
[4] دَجِ کُواْ غَدٜ لَا سَمٜلَࢽْ ࢽُکْثٜ: «جَمَࢽِ، تِلَࢽْ لُوُواْ! بَرٜ بِوُوَࢽْجُرُو مُکُّو یَکُّوِّ بِ مَسِوَࢽْجُ ࢽَیِیَ لٜࢽْجَࢽِّ،
[5] دَلِلْࢽْجُدْ بِوُوَࢽْجُ حَرْ سَمٜرُو تَثَّࢽَ، کُورُو اللَّه یٜ أَیَوْوَࢽْجُدَ تَکْثْࢽَ ࢽَࢽْغَرُو؞
[6] جِرِ ثْدْࢽَدْ غَیْ، تِ یٜرُو یِدُّواْ، کُورُو کْࢽْدُوࢽْجُ کَوَکْیِࢽْدِ تِرُو کَلَکّْغْࢽُواْ، کْࢽْجَرَمْ دِجْࢽَدْلَࢽْ تِرُو کَوَکْیِࢽْدِرُو دِغْࢽُواْ!
[7] جِرِ رُوکُرَ یٜ ثْدْࢽَ، أَرْسِیے یٜ ࢽَ کُوجْࢽَرُو ثَࢻْثْࢽَدْ غَیْ، یَکُّواْ أَجَوُ ثَ دَمَ بَوُورُو کَرْوُࢽْجُ کُتَّجُو! أَوُووَ کَرْوُࢽْجُࢽْ: ‹وُ مَیْ کَمُیٜ، ࢽَࢻْکَدَ کْرْمَیْ ࢽُودْکِّ؞ وُ کَمُ کوَ ࢻَثّْغْࢽَا غْࢽِ، کُورُو لَغَرَࢽْ تْمَّرُو دِکِّوَوُو،› ثْࢽِ؞
[8] أَدْ ࢽَࢽْغَرُو ثُرُو کَوُ ࢻَلّٜࢽْ مَسِوَ تِیَ ثُوَࢽْدِ: کَرْمُووَ کَرْوُکُتَّا کْࢽَا؞ کُورُو کَࢽُّ تِیَ جُوٜ ثُوتُّو سِجِیے؞ ࢽُوࢽُواْ، اللَّه کْمَࢽْدٜ وُواْمْ تِرُو غْࢽَجْغْࢽَدْ کْࢽْدُوُومَ!» ثْࢽِ ࢻَࢽْغٜکُّو؞
[9] دَجِ مَیْیَ دُࢽِیَیٜ تِیَ رُوکُّو کْࢽْجْࢽَ ثَدٜ کْجِ أَرْسِیࢽْجُ دَمَ بَوُووَیٜ ࢻَࢽْجَࢽَدْ کَࢽْغٜ کَࢽُّ تِیَ جُوُیْیٜدَ ثَرُیْیَ، کْلَ تِیٜࢽْ تَیْ دَجَࢽٜ بُرْوُ ثَسَکّٜ ثَسِرِ؞
[10] أَجَوُ تِیَ ثُوَࢽْدْࢽَدَ رِجَࢽَ ࢽَࢽْغَرُو، تِࢽْ کُرُوُࢽِࢽْ دَجَࢽٜ: «کُتُّ! کُتُّ! بْرْࢽِ کُرَ، بْرْࢽِ کْࢽْدُوُووَ بَبِلَیٜ! أَوُووَ ثُرُو سَ ࢻَلّٜࢽْ شَرَࢽْمْ إِسْࢽَ،» ثَࢽِ؞
[11] سَوُرْوُ دُࢽِیَیٜسُو یٜ کْلَ تِیٜࢽْ تَیْ دَجَࢽٜ بُرْوُ ثَسَکّٜ ثَسِرِ، وُࢽْدُمَ کَرٜࢽْجَ غَدٜرُو ثُوُیْوَوُو ࢽَࢽْغَرُو؞
[12] کَرٜدْ دِࢽَرْ، رِوُلَّ، جْمَّ، مُرْسَمْ، یَدِ لِࢽّٜ ࢽغَلْوُو، بَتَّ کِمٜ، شَدَّ، بَتَّ کِمٜ ثِتْ، کْسْکَوَ بُوُثَّیْ جِرِ جِرِ، أَوُو شٜرِ کْمَغْࢽّٜ سُو، کْسْکَ تَمَࢽَّ سُو، کُلُّو سُو، سُ سُو، کَوْ شَوَ سُولَࢽْ تْغَرْࢽَ جِرِ جِرِ،
[13] أَوُووَ جَوْرُو بُوُثَّیْ، کَرٜ یَجِیٜ، کَوُدِ سُو، ࢻُلَ سَمْدُیٜ سُو، کَاجِ سُو، کُورُو دِبٜࢽْ، کْࢽْدَوُ جَیْتُࢽّٜ، رُࢽْغُو، أَلْغَمَ، دَلُو، ࢽغْلَرُو، ࢻْرْ، أَمَلٜࢽْکٜ، کَرٜیَ، رُو کَمْبٜ؞
[14] تَیِیٜ: «أَوُو کْجِ ثُوࢽْ رُوࢽْمْ ثْرَاࢽَ سَمَّ بَوُو ࢻَثَّاࢽَ؞ کَرٜࢽْمْ تَمَࢽَّ تَمَࢽَّ یِیلْجَیْدْ ࢻَثَّاࢽَ، کُورُو غَدٜرُو ࢻَࢽْدْمْبَوُو،» ثَࢽِ؞
[15] سَوُرْوُ کَرٜدْیٜسُو بَرْغَ بْرْࢽِ أَدْیٜࢽْ غَرِوُرُو وَلْجَࢽَدْ أَجَوُ تِیَ ثُوَࢽْدْࢽَدَ رِجَࢽَ ࢽَࢽْغَرُو، تِࢽْ کُرُوُࢽِࢽْ دَجَࢽٜ کْلَ تِیٜࢽْ تَیْ دَجَࢽٜ بُرْوُ ثَسَکّٜ ثَسِرِ:
[16] «کُتُّ، کُتُّ، بْرْࢽِ کُرَ، بْرْࢽِ دُوُوࢽْ کَجْمُ لِࢽّٜ ࢽغَلْوُووَ کِمٜیَ کِمٜ ثِتَّا لُجْࢽَ، کَرٜ کَوَرَیٜ دِࢽَرْ سُو، کَرِ سُو، مُرْسَمْ سُولَࢽْ تْدْࢽَ ثَکّْࢽَدْ!
[17] أَوُووَ ثُرُو سَ ࢻَلّٜࢽْ أَرْسِیࢽْجُ أَࢽِ سَمَّا ثُوتُّو سِدْغْࢽَ!» أَدْغَیْمَ وُرَوَ مَارَ إِࢽْغِیٜ سُو، بْلَوُرُووُ سُو، مَارَوُ سُو، أَمْ بَرْغَ إِࢽْغِیٜࢽْ مَࢽْمْبُیْ ثَدِ سَمَّ تِࢽْ کُرُوُࢽِࢽْ دَجَࢽٜ
[18] کَࢽْغٜ کَࢽُّ تِیَ جُوُیْیٜدَ ثَرُیْیَ، یِلْجَࢽٜ: «بْرْࢽِ ࢻِ بْرْࢽِ کُرَ أَدَ ثَمُࢽْ وُو؟» ثَࢽِ؞
[19] کَتِّ کْلَࢽْجَرُو ࢻِجَغَࢽٜ کْلَ تِیٜࢽْ تَیْ دَجَࢽٜ بُرْوُ ثَسَکّٜ ثَسِرِ: «کُتُّ، کُتُّ، بْرْࢽِ کُرَ، أَرْسِیࢽْجُ دُوُوࢽْ أَمْ تٜکُلَࢽْ مَارَࢽْجَا سَمَّا غَرِوُرُو ثْدْࢽَدْ! أَوُووَ ثُرُو سَ ࢻَلّٜࢽْ تِیَ ثُوتُّو سِجَاࢽَ!»
[20] «ࢽِ سَمٜ یٜ، ࢽَیِ مُمِࢽَّ سُو، کْࢽْغَیَمْبَ سُو، ࢽَوِیَ سُو یٜ، کْلَ تِیٜࢽْ کْجِ ࢻَࢽُّواْ، اللَّه ࢽَیِرُو شَرَ کْلَ تِیٜࢽْ ࢽجَدّْࢽَ ࢽَࢽْغَرُو؞»
[21] دَجِ مَلَیْیَ دُࢽُووَ لَا کَوْ لَا کَوْ ࢽٜدُرَمْ مَࢻْࢽْدِ غَیْ ࢽغُوجٜ تٜکُرُو غْࢻْثِیٜ: «أَدْغَیْࢽِࢽْ بْرْࢽِ کُرَ بَبِلَیٜدَ دُࢽُو بُلْ ࢻُوکْࢽِࢽْ غْࢻْثَیْ، کُورُو غَدٜرُو تُوَࢽْدِوَوُو؞
[22] کُمْبِ جَدُ سُو، أَیْیَ یٜدُ سُو، أَلْغَیْدَا کَࢽْغَدِیَ ࢻُدُ سُو غَدٜرُو ثُرُوࢽْمْࢽِࢽْ ࢻَࢽْدِوَوُو، سَࢽِیَمَ مُکُّویٜ جِرِ ࢻِمَ غَدٜرُو ثُرُوࢽْمْࢽِࢽْ تُوَࢽْدِوَوُو، کُواْ کَوْ ࢽٜدُرَمْبٜ غَدٜرُو ثُرُوࢽْمْࢽِࢽْ ࢻَࢽْدِوَوُو،
[23] ࢽُرْ ࢻَتْلَیٜ غَدٜرُو ثُرُوࢽْمْࢽِࢽْ وَسِّوَوُو، کُورُو کُواْ مَیْ لَرُسَیٜ سُو، ࢽجُدُیٜ سُو غَدٜرُو ثُرُوࢽْمْࢽِࢽْ ࢻَࢽْدِوَوُو؞ أَوُووَ ثَلَࢽْ سَوُرْوُࢽْمْدْ وُرَوَ دُࢽِیَیٜ، کُورُو سَغَوُࢽْمْلَࢽْ جَمَ دُࢽِیَیٜ سَمَّا جَمْبَࢽْمٜ جَوَلَّࢽْ تُلُوُمَّ،
[24] کُورُو ثُرُوࢽْجُمَࢽْ بُ ࢽَوِیَیٜیَ مُمِࢽَّیٜیَ أَمْ دُࢽِیَ ࢽغَࢽْ رُوࢽْجَ ثَتُّلُوُࢽَیٜیَدْ تُوَࢽْدْࢽَ،» یٜࢽُو؞