[1] ࢽغَوُو أَدْیٜࢽْ کُواْ کُرَ لَا أَلَمَ أَمْ کَدَ کَدَمِ ثَࢻْتَࢽَیٜ غَیْ سَمٜلَࢽْ ࢽُکْثِ ࢻَࢽْغٜکُّو؞ تَیِیٜ: «أَلّٜلُیَ! ࢽجْکَّوُووَ دَرَجَا کْࢽْدُوُووَ اللَّهیٜ،
[2] أَوُووَ شَرَࢽْجُ جِرٜ یٜ، کَلْکَلْ یٜ؞ جَوَرْ کُرَ کْࢽْجْࢽَࢽْجُلَࢽْ دُࢽِیَدَ بَࢽَّجْࢽَدْرُو اللَّه شَرَ کَمْجْغْࢽَ، کُورُو بُ وُولُودِیَࢽْجُیٜ تِیَ ثُوُورٜ ࢽغَیٜࢽْجَ ثْمُواْࢽَ،» یٜرَ؞
[3] کُورُو ثَیٜ غَیْ کُواْ سَࢻْثَࢽٜ: «أَلّٜلُیَ! کَࢽْغٜࢽْجُ حَرْ أَبَدَ أَبَدِࢽُّو سَمٜرُو تْرْࢽْ ثِجِ،» یٜرَ؞
[4] دَجِ أَمْوُرَوَ ࢻِࢽْدِ دٜرِدَ أَلَوْ رُووَ دٜوُدَ تْمْدَࢽٜ اللَّه کْلَ کُرِسْࢽْجُ کْرْمَیْیٜࢽْ ࢽَࢻْکَدَمَدْرُو أَمْبْثَّغَࢽٜ: «أَمِࢽْ؞ أَلّٜلُیَ!» یٜرَ؞
[5] کُرِسْ کْرْمَیْیٜدْࢽْ کُواْ لَا ࢽُکْثٜ: «اللَّهࢽْدٜیَ یُࢽْغُورُواْ، وُولُودِیَࢽْجُ سَمَّ، ࢽَیِ دُوُوࢽْ تِیَ رِࢽُوِ کُرَࢽْ غَࢽَࢽْسُودْ!» یٜࢽُو؞
[6] دَجِ کُواْ کُرَ لَا أَلَمَࢽْجُ جَمَ کَدَ کَدَمِ ثَࢻْتَࢽَ سُو، إِࢽْغِ ࢽغْوُ دُࢽُووَرُو ثْغَسِ سُو، غْرْدُ دُࢽُووَ کٜىٰرَیٜ سُویٜ غَیْ ࢽُکْثِ ࢻَࢽْغٜکُّو؞ تَیِیٜ: «أَلّٜلُیَ! اللَّه کْمَࢽْدٜ مَرْتَوَمَ کْرْمَیْ ثُࢽُودِ، دِیٜ!
[7] کْجِ ࢻَࢽِّیُو، کَرْوُ کْجِیَرُو وَلِّیُو، تِرُو دَرَجَ یِیُو، دَلِلْࢽْجُدْ سَ لَرُسَ تَمَدْیٜ ثْدْࢽَ، تْمَجِࢽْجُ یٜ دَبَّرْدْࢽَ ࢽَࢽْغَرُو؞
[8] تِرُو کَجْمُ لِࢽّٜ ࢽغَلْوُو بُلْ ࢻُوکْ یِیلْجِ ثَدٜ لُجْࢽَ،» یٜرَ؞ أَوُووَ کَجْمُ لِࢽّٜ ࢽغَلْوُودْ کْࢽْدُو ࢽَࢽْجِرٜىٰ مُمِࢽَّیٜ؞
[9] دَجِ مَلَیْیَدْیٜ وُرُو: «رُوُࢽٜ: بَرْغَࢽْجَ أَمْ دُوُوࢽْ مَسْکَرُ لَرُسَ تَمَدْیٜرُو تَیِیَ دُوجَࢽَدْ!» یٜࢽُو؞ کُورُو وَلْدٜ: «مَࢽَ أَدْ جِرٜمَرُو اللَّهیٜ،» یٜࢽُو؞
[10] دَجِ تِرُو أَمْبْتُّوُرُو ࢻُوُࢽْجُࢽْ تْمْغَدَکّْࢽِیَ، وُرُو: «بَرٜ دِمِّ! وُ یٜ وُولُودِ اللَّهیٜ، ࢽِیَ کْرَمِیَࢽْمْ شٜدَوُ عِیسَیٜیَ غَیْ؞ اللَّهرُو أَمْبْتْکْࢽٜ! أَوُووَ شٜدَ عِیسَیٜدْمَ مَࢽَ دُوُوࢽْ ࢽَوِیَدَ سِمُوجْغْࢽَدْ وُو،» یٜࢽُو؞
[11] دَجِ سَمٜ ࢻْرْمْغَدَ کِرُکُّو؞ أَکُّو ࢻْرْ بُلْ مبٜجِ؞ کْمْبَمَࢽْجُدَ أَمَࢽْمَا جِرٜمَالَࢽْ بُواْجَیْ، کُورُو جَوَلْ جِرٜىٰࢽْ شَرَ یٜ کَمْجِ، کْرِوُ یٜ ثَدِ؞
[12] سِمْࢽْجُ تْلَمْ کَࢽُّ ثَمْبِیٜ غَیْ، کُورُو کْلَࢽْجُࢽْ أَرِیَوُ مَیْلَ کَدَا؞ ثُ لَا تِ غْࢽِیَ وُࢽْدُمَ ࢽُوجْࢽِّ رُوُوَدَا؞
[13] کَجْمُ بُلَࢽْ دَلَّادَ لُجْࢽَ، کُورُو ثُ کَلْمَ اللَّهیٜدْلَࢽْ تِیَ بُواْجَیْ؞
[14] کْرِوُوُ سَمٜىٰ کَجْمُ لِࢽّٜ بُلْ ࢻُوکْ کَدَوُ بَوُووَ لُجَࢽَ، کُورُو کْلَ ࢻْرَّ بُلّٜࢽْ تِیَ جَغَیْ؞
[15] ثِࢽْجُࢽْلَࢽْ کَشَغَرْ تِمِیَ ثُلُوِ، ࢽغَیْࢽِࢽْ تِلَࢽْ جَمَ دُࢽِیَیٜ سَمَّا ثَثَلْجِ؞ تَیِیَ کَ سُیٜࢽْ کْࢽْدُوُووَرُو ثُࢽُودِ، کُورُو إِࢽَبْ غُوَتُّرَمْ دِبٜࢽْ غْرْغَدُ جَوْ ࢻِتْ اللَّه مَرْتَوَمَیٜدْࢽْ غُغُوَثِّ؞
[16] کْلَ کَجْمُࢽْجُوَ دُࢽُوࢽْجُوَیٜࢽْ ثُ أَدْ رُوُوَدَ: «مَیْ مَیْیَیٜ، کُورُو کْمَ کْمَوَیٜ؞»
[17] دَجِ مَلَیْیَ لَا کْلَ کْࢽْغَلّٜࢽْ دَادَ کِرُکُّو؞ کُواْ دُࢽُووَرُو سَࢻْثٜ ࢽغُدُووَ سَمٜࢽْ مَرٜیَجَیْ سَمَّرُو: «أَرُواْ، مَسْࢽَ کُرَ اللَّهیٜدْرُو ثَࢻْتْࢽُواْ!
[18] دَ مَیْیَیٜیَ دَ کَجَلَّوَ کْرِوُیٜیَ دَ کْرِوُوُ کُرَ کُرَیٜیَ دَ ࢻْرَّیٜیَ ࢻْرْوُࢽْجَیٜیَ دَ کَمْبٜىٰ یٜࢽْ کَلْ، کَرٜیَیٜ یٜࢽْ کَلْ، کُرَࢽْ غَࢽَࢽْ أَمْ سَمَّیٜیَا ࢽغْرُواْ!» یٜࢽُو؞
[19] دَجِ بُࢽْدِدَ مَیْیَ دُࢽِیَیٜیَ کْوُوَࢽْجَ کْرِوُیٜیَ ثِجَࢽٜ تِ کْلَ ࢻْرّٜࢽْ ࢽَࢻْکَدَمَا کْرِوُوُࢽْجُوَرُو کْرِوُ ࢽجْکَّدُورُو ثَࢻْتَࢽَ کِرُکُّو؞
[20] بُࢽْدِدَ کٜدَ، ࢽَوِ کَتُّوُیٜدَ تِیَ رُوکُّو، تِ دُوُوࢽْ ࢻُوُ بُࢽْدِدْیٜࢽْ أَلَمَ أَجَبَّ أَجَبَّ ثْدْࢽَ یٜ، أَمْ تَیِرُو تَوَ بُࢽْدِدْیٜ غْࢽَجَغَࢽٜ غُمْکِࢽْجُرُو أَمْبْثَّاࢽَدَ جَمْبَجْࢽَ یٜدْ وُو؞ تَیِ یِࢽْدِسُو رُوࢽْجَا بْرْمْ کَࢽُّیٜ کَوْ کَࢽُّیٜ کِمٜجْغْࢽَارُو غْࢻْکٜىٰرَ؞
[21] تَیِ غَࢻْثَࢽَدَ کَشَغَرْ دُوُوࢽْ ثِ تِ کْلَ ࢻْرّٜࢽْ ࢽَࢻْکَدَدْیٜࢽْ ثُلُوِمَدْࢽْ کٜىٰسُو، کُورُو ࢽغُدُووَ ࢽغَ دَࢽْجَ جَغَرٜ کُلْیٜرَ؞