[1] رُکِّ ࢽغَیْ دُوُوࢽْ، تَمَدْ کَرَمَ تُلُرْدْیٜ ࢻَلْࢽْجَا کَیٜࢽِّیَ، أَلَوْ دٜوُدْیٜ ࢻَلْࢽْجَ کُواْ دُࢽُووَ غْرْدُ کٜىٰرَیٜ غَیْ: «أَرٜ!» ثْࢽِ ࢻَࢽْغٜکُّو؞
[2] دَجِ ࢻْرْ بُلْ کِرُکُّو؞ کْمْبَمَࢽْجُ مُکُّوࢽْ کَبِّیَ، تِرُو أَرِیَوُ کْرْمَیْیٜ ثَدٜ کْࢽَّسَرْمَ دُوُوࢽْ کْࢽَّسَرْ غَدٜ مَدَرُو لٜىٰࢽُو؞
[3] تَمَدْ کَرَمَ یِࢽْدِیٜدَ کَیٜࢽِّیَ، أَلَوْ یِࢽْدِیٜدْ: «أَرٜ!» ثْࢽِ ࢻَࢽْغٜکُّو؞
[4] دَجِ ࢻْرْ غَدٜ کِمٜ کَدِیُو؞ کْمْبَمَࢽْجُدْرُو کْࢽْدُوُو دُࢽِیَلَࢽْ ࢽَࢽْلٜوَ تُلُوُویٜیَ أَمْبَ یَکّْمٜ کَتّٜࢽْجَࢽْ ࢽجٜجُویٜیَ کٜدُو، کُورُو کَشَغَرْ کُرَ تِرُو کٜدُو؞
[5] تَمَدْ کَرَمَ یَکُّیٜدَ کَیٜࢽِّیَ، أَلَوْ یَکُّیٜدْ: «أَرٜ!» ثْࢽِ ࢻَࢽْغٜکُّو؞ دَجِ ࢻْرْ ثْلْمْ کِرُکُّو؞ کْمْبَمَࢽْجُ مُکُّوࢽْ سِکٜلَّ؞
[6] دَوُ أَلَوْ دٜوُدْیٜࢽْ کُواْ لَا ࢽُکْثٜ: «یَکّٜ کِلُو ࢻَلْ أَلْغَمَیٜ تَمَࢽّجُ دِࢽَرِیُسْ ࢻَلُّو وَلْجُو، کِلُو یَکُّ سَیِرّٜ یٜ تَمَࢽّجُ دِࢽَرِیُسْ ࢻَلُّو وَلْجُو، أَمَّ دِبٜࢽَّ کْࢽْدَوُ جَیْتُࢽّٜیَ بَرٜ لٜࢽْمِّ!» ثْࢽِ ࢻَࢽْغٜکُّو؞
[7] تَمَدْ کَرَمَ دٜوُیٜدَ کَیٜࢽِّیَ، أَلَوْ دٜوُیٜدْ: «أَرٜ!» ثْࢽِ ࢻَࢽْغٜکُّو؞
[8] دَجِ ࢻْرْ بِدُ کِرُکُّو؞ کْمْبَمَࢽْجُیٜ ثُ کَرْمُو، کُورُو لٜیْرَ یٜ تِیَ جْغَیْ؞ تَیِرُو کْࢽْدُوُو کْلَ ࢽَ دُࢽِیَدْیٜ ࢻَلْ ثُرُو دٜوُیٜࢽْ کَشَغَرْ سُو، کْࢽَ سُو، وُووَ سُو، بُࢽْدِیَ کَرَا سُولَࢽْ أَمْبَ رُورُو ࢽجٜجُویٜ کٜدُو؞
[9] تَمَدْ کَرَمَ أُوُیٜدَ کَیٜࢽِّیَ، ثِدِیَ لَیَ دُوَدُرَمْبٜࢽْ رُو أَمْ مَࢽَ اللَّهیٜیَ شٜدَࢽْجَا ࢽَࢽْغَرُو دُوَادَدْیٜیَ کِرُکُّو؞
[10] کُواْ دُࢽُووَرُو سَࢻْثَࢽٜ: «کْمَ تَیِرَّ جِرٜمَا، حَرْ یِمْبِرُو أَمْ دُࢽِیَلَࢽْ دَسَاࢽَدَ شَرَࢽْمٜ ࢽغَیٜ بُࢽْدٜىٰ مُواْمْبَوُودْ؟» ثَࢽٜ کٜوُورُو؞
[11] دَجِ وُࢽْدُࢽْجَ یَیٜرُو غْمَجٜ بُلْ ثَدٜ تَیِرُو غَࢽَ تُسَّ سَیْ أَمَࢽْجَ کِدَوُ، وُوتّٜ کْرَمِیَࢽْجَ تَیِ غَیْ رُورُو ثٜىٰسِدْیٜ ࢽَࢽّغْوُࢽْجَ ثْمْبْرِیَ دُوُوࢽْ یٜرَ؞
[12] رُکِّ ࢽغَیْ دُوُوࢽْ، تَمَدْ کَرَمَ أَرَکُّیٜدَ کَیٜࢽِّیَ، ثِدِ تَیْ دَجٜ لُولُویٜࢽُو؞ کْࢽْغَلْ یٜ ثْلْمْ ࢻْتْ أَجَجَ کَࢽْدُرِلَࢽْ تْدْࢽَ غَیْرُو وَلْیٜࢽُو، کُمْبَلْ سَمَّ یٜ بُ غَیْرُو وَلْیٜࢽُو،
[13] کُورُو کَرُوَ دُࢽُووَ یَ تَرْمُیٜیَ بَکْثٜ تَدَوَࢽْجُ بَࢻْࢽِّدَ ࢻِجِ غَیْ، سِلُّووُوَ سَمٜىٰ یٜ ثِدِرُو کٜسُرُو؞
[14] سَمٜ یٜ بُجِ کْرِجَیْ غَیْ سُلَتْ بَوُورُو وَلْیٜࢽُو، کُورُو کَوْ کُرُوُ کُرُوُوَ ثُکُوَا سَمَّ ࢽَࢽْجَ دَسَاࢽَلَࢽْ سْࢽَکَّدَرَ؞
[15] دَجِ مَیْیَ دُࢽِیَیٜیَ وُرَوَ جَمَیٜیَ کَجَلَّوَ کْرِوُیٜیَ أَرْسِیوُوَ کْࢽْدُوُووُوَ کَرٜیَ سُو، کَمْبٜ سُو سَمَّا ثُرُو کُلْ کَوْیٜسُووَ ࢽَ کَوْ کُرَ کُرَسُووَلَࢽْ غْرَدَࢽٜ
[16] کَوْ کُرُوُ سُو، کُرَ سُودْرُو: «کْلَࢽْدٜرُو ࢻِدْغْࢽُواْ، ࢻْکَّ تِ کْلَ کُرِسْ کْرْمَیْیٜࢽْ ࢽَࢻْکَدَمَدْیٜیَ غْرْغَدُ تَمَدْیٜیَرُو غْرَسَࢽُواْ!
[17] یِمْ کُرَ غْرْغَدُࢽْجَیٜدْ إِسْࢽَ، وُࢽْدُ غْلٜ رَکْثٜ دَجِ؟» ثَࢽِ؞