[1] دَجِ مَلَیْیَ لَا مُکُّوࢽْجُࢽْ ثُوُرَمْ ثِ بْلَا دَدُرَمْ بَوُووَیٜدَ سَرْغَ جَوْرُو مَࢻْࢽْدِیَا سَمٜلَࢽْ جْࢻْثِ کِرُکُّو؞
[2] کَدِ مَࢻْࢽْدِ، وُوتّٜ کَدِ کُرٜىٰ، تِ دُوُوࢽْ تِرُو سٜدَࢽْ کُورُو إِوُلِیسْ ثَࢽِدَ ثْدَࢽٜ کْرْوُ دْوُرُو سَرْغَدْلَࢽْ کِکّٜرُو؞
[3] تِیَ بْلَا دَدُرَمْ بَوُووَدْرُو غْࢻْثِیٜ جَکْثٜ کْلَدْرُو تَوَا غْࢽَیٜىٰࢽُو، بَرٜ حَرْ کْرْوُ دْوُدْ کُوجِرُو إِوُلِیسْ جَمَ دُࢽِیَیٜیَ غَدٜرُو جَمْبَجٜ جَوَلَّࢽْ ثَتُّلُوُࢽِّرُو؞ ࢽغَوُو أَوُو أَࢽِیٜࢽْ دُولٜ سَ غَࢽَرُو تِیَ کُولْجَࢽٜ ثُلُوِ؞
[4] دَجِ کُرِسَّ کْرْمَیْیٜیَ کِرُکُّو، کُورُو کْلَࢽْجَࢽْ أَمْ دُوُوࢽْ تَیِرُو اللَّه کْࢽْدُوُو شَرَ کَمْدُیٜ ثِࢽَدْ ࢽَࢻْکَدَا؞ أَمْ دُوُوࢽْ شٜدَࢽْجَ عِیسَیٜیَ مَࢽَ اللَّهیٜیَ ࢽَࢽْغَرُو کْلَࢽْجَ کَمْجَࢽَدْ یٜیَ کِرُکُّو؞ أَمْ أَࢽِ بُࢽْدِدَ غُمْکِࢽْجُوَرُو أَمْبْثَّغَࢽِّ، کُورُو تَوَ بُࢽْدِدْیٜ ࢽغُمْࢽْجَرُو بِ مُکُّوࢽْجَرُو غْࢽَدْغْࢽِّ؞ رُووَرُو وَلْجَࢽٜ کْرْوُ دْوُرُو أَلْمَسِیوُوَ رُوکُّو کْرْمَیْ کٜࢽُودُو؞
[5] أَمَّ أَمْ سَࢽُࢽَ غَࢻْثَࢽَدْ رُووَرُو وَلْجَࢽِّ، سَیْ ࢽغَوُو کْرْوُ دْوُ أَࢽِ کُوجَࢽَیٜࢽْ؞ أَدْمَ ثِࢽُواْ بُرْوُویٜ وُو؞
[6] بَرْغَࢽْجَ کُورُو تَیِرْ أَمْ ثِࢽُواْ بُرْوُویٜ أَدْࢽْ ࢽُوَࢽْجَاسُودْ! تَیِلَࢽْ کَرْمُو یِࢽْدِیٜدْ کْࢽْدُوُوࢽْجُ بَوُو، أَمَّ رِمَࢽَّ اللَّهَ أَلْمَسِیوُوَیٜرُو وَلْجَࢽٜ کْرْوُ دْوُرُو أَلْمَسِیوُوَ رُوکُّو کْرْمَیْ ثَࢽُودِ؞
[7] کْرْوُ دْوُ أَࢽِ کُوجَیْیَ، إِوُلِیسَّ کُوسُوࢽْجُࢽْ کُولْجَࢽٜ
[8] ثُلُوٜ جَمَ تَلْغْمُو دُࢽِیَیٜ دٜوُلَࢽْ دَسَاࢽَ، وُوتّٜ أَمْ تَیِرُو غُوغَّ مَغُوغَّ ثَࢽِدَ جَمْبَدُرُو لٜجٜ تَیِیَ کْرِوُرُو ثَثَࢻْثِ؞ ࢽَࢽّغْوُࢽْجَدْ ثِدِ کٜسَ ثِ تٜکُیٜ غَیْ؞
[9] دَجِ ثِدِ ࢽغَا جَکْثَࢽٜ إِسَࢽٜ جُوࢽْغُو مُمِࢽَّیٜدَ بْرْࢽِ اللَّه ثْرَاࢽَدَ دِرِجَࢽٜ کْلْیٜرَ، أَمَّ کَࢽُّ سَمٜلَࢽْ جْࢻْثٜ تَیِیَ رْمْسْ غِوُو؞
[10] إِوُلِیسْ تَیِیَ جَمْبَجْࢽَدَ ثَدَࢽٜ بْرْمْ کَࢽُّیٜیَ کَوْ کَࢽُّ کِمٜجْغْࢽَیٜیَ ࢽَ بُࢽْدِدَ ࢽَوِ کَتُّوُیٜدَ دَسَاࢽَدْرُو غْࢻْکٜىٰرَ، کُورُو بُࢽٜیَ کَوْسُوَرُو حَرْ أَبَدَ أَبَدِࢽُّو أَجَوُ ثَسَیْ؞
[11] دَجِ کُرِسْ کْرْمَیْیٜ بُلْ کُرَا تِ کْلَࢽْجُࢽْ ࢽَࢻْکَدَمَدَا کِرُکُّو؞ ࢻُوُࢽْجُࢽْ سَمٜیَ ثِدِیَ ࢻَتْکٜىٰرَ، کُورُو غَدٜرُو ࢽَ ثَوَࢽْدْࢽِّ؞
[12] کُورُو أَمْ سَࢽُࢽَ کُرَࢽْ غَࢽَࢽْ ࢻُوُ کُرِسْدْیٜࢽْ دَادَ کِرُکُّو؞ کِتَوُوَ کَیٜرَ، کُورُو کِتَوُ غَدٜ کَیٜرَ، تِمَ کِتَوُ رُویٜدْ وُو؞ أَمْ سَࢽُࢽَدْرُو کْلَ کْࢽْدُوࢽْجَ کِتَوُوَدْلَࢽْ رُوُوَدَدْیٜࢽْ شَرَ کٜدُّو؞
[13] تٜکُ أَمْ سَࢽُࢽَ ثُرُوࢽْجُࢽْ رُوجْࢽَدَ کُولْجٜ کٜلُوُو، کُورُو کَرْمُووَ لٜیْرَا یٜ أَمْ سَࢽُࢽَ رُوجَࢽَدَ کُولْجَࢽٜ کٜلُوُو؞ وُࢽْدُ یَیٜرُو کْلَ کْࢽْدُوࢽْجَیٜࢽْ شَرَ کٜدُّو؞
[14] دَجِ کَرْمُووَ لٜیْرَآ بْرْمْ کَࢽُّیٜرُو غْࢻْکٜىٰرَ؞ بْرْمْ کَࢽُّیٜدْ، تِمَ کَرْمُو یِࢽْدِیٜدْ وُو؞
[15] وُࢽْدُ دُوُوࢽْ ثُࢽْجُ ثُرُو کِتَوُ رُویٜࢽْ رُوُوَدَ تُوَࢽْدْࢽِّدْ، تِ یٜیَ بْرْمْ کَࢽُّیٜدْرُو غْࢻْکٜىٰرَ؞