[1] دَجِ بُࢽْدِ لَا تٜکُدْلَࢽْ ثُلُوِ کِرُکُّو؞ تِدْ کَࢽْغَدِ مٜوُوَ، کْلَ تُلُرَّ؞ کَࢽْغَدِࢽْجُلَࢽْ أَرِیَوُ مَیْلَ مٜوُوَ، کُورُو کْلَࢽْجُ ࢻِࢽْ یَیٜ کَالَ اللَّهَ بَسْتُیٜ رُوُوَدَ؞
[2] بُࢽْدِ رُکّْࢽَدْ جَجْرْمَ غَیْ، سِࢽْجُ یٜ بُلْدُیٜ غَیْ، ثِࢽْجُ یٜ ࢽغَمْبٜ غَیْ؞ کَدِ مَࢻْࢽْدِدْ تِرُو دُࢽُوࢽْجُوَ کُرِسْࢽْجُوَ کْࢽْدُوُوࢽْجُ کُرَآ کَیْࢽُو؞
[3] کْلَࢽْجُ ࢻَلْ ࢽُࢽَ غَیْرُو لُورُدْࢽَ یَیٜ، ࢽغَجْࢽَ؞ أَمْ دُࢽِیَیٜ سَمَّ بُࢽْدِدَ أَجَࢻْثَࢽٜ جَاࢽٜ
[4] کَدِدْرُو أَمْبْتْکٜىٰرَ، بُࢽْدِدْرُو کْࢽْدُوُو ثِࢽَ ࢽَࢽْغَرُو؞ کُورُو بُࢽْدِدْ یٜرُو أَمْبْتْکٜىٰرَ، تَیِیٜ: «وُࢽْدُ بُࢽْدِدْ غَیْ وُو؟ کُورُو وُࢽْدُ تِیَ رَکْثٜ لَوَلَجِ؟» ثَࢽِ؞
[5] تِرُو ثِ مَࢽَ رُوکُرَیٜ دِمٜ اللَّهَ بَسْتُیٜ کٜدُو، کُورُو تِرُو أَمَرِ کْࢽْدَوُ ࢻِدٜوُࢽْ یِࢽْدِࢽُّو کْرْمَیْ ࢽُودُویٜ کٜدُو؞
[6] دَجِ بُࢽْدِدْ ثِࢽْجُ کَجٜ اللَّهَ بَسْتُ بَدِیٜࢽُو؞ اللَّهیٜ ثُࢽْجُوَ کْࢽْدْغَیْرَمْࢽْجُوَ أَمْࢽْجُ سَمٜࢽْ دَسَاࢽَآ بَسْکٜࢽُو؞
[7] تِرُو أَمَرِ مُمِࢽَّرُو کْرِوُ یِکَّدْمٜ کْࢽَّسَرْ کْلَࢽْجَࢽْ ࢻَࢽْدُویٜ کٜدُو، کُورُو تِرُو کْࢽْدُوُو کْلَ جِرِ سُو، جَمَ سُو، تْلَمْ سُو، لَرْدُ سُو ࢻِیٜࢽْ یَیٜ کٜدُو؞
[8] أَدْغَیْمَ أَمْ دُࢽِیَࢽْ دَسَاࢽَ سَمَّ بُࢽْدِدْرُو أَمْبْثَّغَیْ، أَمْ دُوُوࢽْ ثُࢽْجَ تْࢽْ دُࢽِیَ أَلَکْتْࢽَیٜࢽْ ثُرُو کِتَوُ رُویٜ تَمَ دُوَادَدْیٜࢽْ رُوُدْࢽِّدْ؞
[9] کَمْ سْمُوࢽْجُوَمَدْ ࢻَࢽْجُو!
[10] کَمْ کَدَرَࢽْجُ کَرٜیَرُو وَلْدُدْ ࢻَغَتُّو تِیَ ثَدَࢽٜ کَرٜیَرُو کَلَکْثَیْ؞ کَمْ کَدَرَࢽْجُ کَشَغَرْلَࢽْ تِیَ ࢽجٜجُودْ ࢻَغَتُّو کَشَغَرْلَࢽْ تِیَ ثٜىٰسِ؞ أَکُّو سَ ࢽٜتُّوَ کَمْبْرْسٜیَ مُمِࢽَّیٜ؞
[11] دَجِ بُࢽْدِ غَدٜ لَا ثِدِدْࢽْ ثُلُوِ کِرُکُّو؞ تِدْ کَࢽْغَدِ یِࢽْدِیَ ࢽغْلَرُو غَیْ، کُورُو کَدِ مَࢻْࢽْدِ غَیْ مَࢽَجِ؞
[12] کْࢽْدُوُو بُࢽْدِ بُرْوُویٜ سَمَّلَࢽْ ࢻُوُࢽْجُࢽْ ࢻَیْدَدٜ دُࢽِیَا أَمْ تِلَࢽْ دَسَاࢽَآ ثَکّٜ بُࢽْدِ بُرْوُویٜ لُورُࢽْجُ کَرْمُویٜࢽْ ࢽغَجْࢽَدْرُو أَمْبْثَّغَیْ؞
[13] کُورُو أَلَمَ أَجَبَّ أَجَبَّ ثْدٜ، حَرْ ثَکّٜ کَࢽُّ سَمٜلَࢽْ ثِدِرُو ࢻُوُ أَمْبٜࢽْ جْࢻْثِیے؞
[14] أَمْ دُࢽِیَࢽْ دَسَاࢽَرُو بُࢽْدِ کَشَغَرْلَࢽْ لُورُوَدَ رُووَ دْغَࢽَدْرُو غُمْکِ ثَدَࢽْدُو ثْࢽٜ أَلَمَ ࢻُوُࢽْجُࢽْ تِرُو أَمَرْجَغَࢽٜ ثْدِدْلَࢽْ تَیِیَ جَمْبَجِ؞
[15] بُࢽْدِ یِࢽْدِیٜدْرُو أَمَرِ ثَدٜ غُمْکِ بُࢽْدِ بُرْوُویٜدْرُو رُو ثَکّٜ حَرْ مَࢽَ ثْدٜ أَمْ تِرُو أَمْبْتُّوُ وَجَࢽَ سَمَّا ثَکّٜ ثٜىٰسِ؞
[16] کُورُو بُࢽْدِ یِࢽْدِیٜدْ ثَکّٜ أَمْ کُرَࢽْ غَࢽَࢽْ سُو، غَرِوُࢽْ ࢽغُدِࢽْ سُو، کَمْبٜࢽْ کَرٜیَࢽْ سُو سَمَّیٜ مُکُّو کْمْبُورَمْبُو بِ ࢽغُمْبُو تَوَ غْࢽَجَغَیْ؞
[17] ࢽغَیْࢽِࢽْ کَمْ تَوَدَ ثْدَࢽَ غْࢽِیَ، وُࢽْدُمَ رَکْثٜ ثُوُیْوَوُو بِ ثْلَدِوَوُو؞ تَوَ أَدْ ثُ بُࢽْدِدْیٜ بِ لَمْبَ ثُࢽْجُیٜ؞
[18] أَکُّو لَمَرْ ࢽَࢽْرَشِدُیٜ: کَمْ حَࢽْغَلْ کْجِیَدْ لَمْبَ بُࢽْدِدْیٜیَ غَیِرْجُو! لَمْبَ أَدْ لَمْبَ کَمْبٜ، کُورُو لَمْبَࢽْجُ یٜرْ أَرَکُّࢽْ ࢻِرَکُّࢽْ لُکُّو أَرَکُّࢽْ؞