[1] «مَلَیْیَ جَمَ وُوَ غَوُ بْرْࢽِ أَࢻِسَیٜࢽْ دَسَاࢽَدْیٜرُو أَوُو أَࢽِیَ رُوُغْࢽٜ: أَکُّو کَوُرِ تِ دُوُوࢽْ مُکُّوࢽْجُ کْمْبُورَمْلَࢽْ سِلُّووُ تُلُرْ ثْدَࢽَمَدْ، کُورُو دَوُ ࢻَتْلَ دِࢽَرّٜ تُلُرّٜࢽْ دَدَجِمَدْیٜدْ؞
[2] کْࢽْدُوࢽْمْبَ ࢽغْࢽْࢻْتُوُࢽْمْبَ ࢽٜتُّࢽْمْبَ ࢽُوکّْࢽَ، کُورُو أَمْ دِوِیَ کَسَدّْمْبَوُورُو ࢽُوکّْࢽَ؞ تَیِ دُوُوࢽْ کْلَࢽْجَا کْࢽْغَیَمْبَرُو ࢽغُوجَࢽَ، أَمَّ ࢽغَیْ غْࢽِدَ رِجَمّْمٜ جِرٜ غْࢽِرُو رُمَّ؞
[3] کْلَ ثُࢽِیٜࢽْ ࢽٜدّْمَّ ࢽغَوُورُو وَلْدْمِّ، کُورُو یِمْبَرْمِّ؞
[4] أَمَّ دِوِࢽْمْ لَا ࢽِرُو وُلْࢽْجْغْکِّ، کْرَوُوࢽْمْ بُرْوُویٜدَ کُولّْمَّ؞
[5] أَدْ ࢽَࢽْغَرُو ࢽَ یُرُمَّدَ تَࢽْغٜ، تْمّٜ، کْࢽْدُو بُرْوُوࢽْ دِمِدَ دٜ! تْمّْمْبَوُووَ، ࢽَࢽْمْبُو إِسْکّٜ ࢻَتْلَࢽْمْدَ ࢽَࢽْجُلَࢽْ ࢽغُوکِّ؞
[6] أَدْ یَیٜ ࢽَشَࢽْمْ لَا ࢽغْلَ مبٜجِ، کْࢽْدُو أَمْ ࢽِکُولَوُسَّ غَوُیٜدَ وَࢽْمَّ، وُ یٜ وَکّْࢽَ؞
[7] کَمْ سْمُوࢽْجُوَمَدْ أَوُو رُحُ اللَّهیٜ جَمَ وُوَ غَوُ سَمَّرُو وُلْجِیدَ ࢻَࢽْجُو! کَمْ کْࢽَّسَرْ ثُوَࢽْدْࢽَمَدْرُو أَمَرِ تَدَ کْسْکَ رُو ࢻَࢽْدُویٜ جَࢽَّ اللَّهیٜࢽْ دْغَࢽَدَ ࢽغْرُویٜ یِکِّ؞»
[8] «مَلَیْیَ جَمَ وُوَ غَوُ بْرْࢽِ سِمِرْࢽَیٜࢽْ دَسَاࢽَدْیٜرُو أَوُو أَࢽِیَ رُوُغْࢽٜ: أَکُّو کَوُرِ تِ بُرْوُویٜ یٜ، دَرْیٜىٰ یٜ، تِ ࢽُࢽَ دُوُوࢽْ رُووَرُو وَلْجْࢽَمَدْیٜدْ؞
[9] بُوࢽٜࢽْمْبَ ࢽَࢽْتَلَاࢽْمْبَ ࢽُوکّْࢽَ، أَمَّ ࢽِ أَرْسِیمَ؞ أَمْ لَا بَسْࢽْجَیْرُو ࢽُوکّْࢽَ، کْلَࢽْجَا یَوْدِیَرُو ࢽغُوجَࢽَ، أَمَّ تَیِ ࢽغَیْ غْࢽِ، تَیِ جَمَ دَࢽْدَلْ إِوُلِیسّٜ؞
[10] بَرٜ بُوࢽٜ ࢻُوُࢽْ یَمِدَ رِࢽْمِّ؞ أَکُّو إِوُلِیسْ ࢽَیِیَ رِجَࢻْتُرُو ثَکّٜ أَمْࢽْدُو لَآ کُوسُورُو ثَسَکّٜ کَوُ مٜوُرُو بُوࢽٜ یَوِ؞ کَمْبْرْسٜࢽْمْدَ حَرْ کَرْمُورُو تَیْ، أَرِیَوُ رُویٜ ࢽجِکِّ؞
[11] کَمْ سْمُوࢽْجُوَمَدْ أَوُو رُحُ اللَّهیٜ جَمَ وُوَ غَوُ سَمَّرُو وُلْجِیدَ ࢻَࢽْجُو! کَمْ کْࢽَّسَرْ ثُوَࢽْدْࢽَمَدَ کَرْمُو یِࢽْدِیٜدْ لٜجِوَوُو؞»
[12] «مَلَیْیَ جَمَ وُوَ غَوُ بْرْࢽِ بِرْغَمُسّٜࢽْ دَسَاࢽَدْیٜرُو أَوُو أَࢽِیَ رُوُغْࢽٜ: أَکُّو کَوُرِ کَمْ دُوُوࢽْ کَشَغَرْ تْلَمْ یِࢽْدِیَ ࢽغْلَرُو غَلَّدَ ثْدَࢽَمَدْیٜدْ؞
[13] ࢽَࢽْمْ دْغَمَّا ࢽُوکّْࢽَ، ࢽَ کُرِسْ إِوُلِیسّٜدْ؞ ثُࢽِ ࢽغْلَرُو تَمَّ، کُورُو جَمَࢽْ دُوُوࢽْ دَوُࢽْدُوࢽْ ࢽَ إِوُلِیسْ دْغَࢽَلَࢽْ شٜدَمَࢽِ أَمَࢽَّ أَࢽْتِࢻَسَّ رُورُو ثٜىٰسْࢽَدْمَࢽْ وُوَ مْرْسَدُࢽْمْ کُولّْمِّ؞
[14] أَمَّ دِوِࢽْمْ لَا ࢽِرُو وُلْࢽْجْغْکِّ، ࢽَࢽْمْࢽِࢽْ أَمْ لَا أَلَمْدُ بَلَامبٜ جَغَیْ مبٜجِ، کَمْ دُوُوࢽْ إِسْرَاءِیلَوُ دَ سْࢽْمْسُورُو تِࢽَ جَغَرُو یٜ، کْࢽْجْࢽَ ثَدُو یٜرُو مَیْ بَلَکُّو بْلَا تَیِرُو لَدُوُرُو أَلَمْجْغْࢽَدْ؞
[15] ࢽغَیْمَ ࢽَࢽْمْ یٜࢽْ أَمْ لَا أَلَمْدُ أَمْ ࢽِکُولَوُسَّ غَوُیٜدَ جَغَیْ مبٜجِ؞
[16] أَدْ ࢽَࢽْغَرُو تْمّٜ! أَدْ غْࢽِیَ، تُسّْࢽِّࢽْ ࢽَࢽْمْبُو إِسْکّٜ کَشَغَرْ ثِࢽِلَࢽْ ثُلُوِدْلَࢽْ تَیِیَ لَوَلَکِّ؞
[17] کَمْ سْمُوࢽْجُوَمَدْ أَوُو رُحُ اللَّهیٜ جَمَ وُوَ غَوُ سَمَّرُو وُلْجِیدَ ࢻَࢽْجُو! کَمْ کْࢽَّسَرْ ثُوَࢽْدْࢽَمَدْرُو کْمْبُو غْرَادَ تِرُو مَࢽْ ثَࢽِدَ یِکِّ؞ تِرُو کَوْ بُلْ لَا یٜ کْلَدْࢽْ ثُ بْرِࢽْ رُوُوَدَ، ثُ دُوُوࢽْ کَمْ ثُوَࢽْدْࢽَ غْࢽِیَ، کَمْ غَدٜ ࢽُوجْࢽِّدَ یِکِّ؞»
[18] «مَلَیْیَ جَمَ وُوَ غَوُ بْرْࢽِ تِیَتِرَیٜࢽْ دَسَاࢽَدْیٜرُو أَوُو أَࢽِیَ رُوُغْࢽٜ: أَکُّو کَوُرِ تَدَ اللَّهیٜ، تِ دُوُوࢽْ سِمْࢽْجُ تْلَمْ کَࢽُّیٜ غَیْ، سِࢽْجُ یٜ کُلُّو کَغْلْمَدِࢽْ ثِࢽْغَدَ غَیْدْ؞
[19] کْࢽْدُوࢽْمْ ࢽُوکّْࢽَ: کْرَوُوࢽْمْ سُو، کَمْبْرْسٜࢽْمْ سُو، بَࢽَࢽْمْ سُو، ࢽٜتُّࢽْمْ سُو؞ کُورُو کِدَࢽْمْ کْرْمَیٜدْ بُرْوُویٜیَ کُوجْࢽَرُو ࢽُوکّْࢽَ؞
[20] أَمَّ دِوِࢽْمْ لَا ࢽِرُو وُلْࢽْجْغْکِّ، جٜجَبٜلْ کَمُ کْلَࢽْجُ ࢽَوِرُو ࢽغُوجْࢽَدَ کُولّْمٜ وُولُودِیَࢽِیَ أَلَمْجٜ کْࢽْجْࢽَ ثَدُو دَ سْࢽْمْسُورُو تِࢽَدَ جَغَرُو ثْࢽٜ تَیِیَ جَوَلْࢽِࢽْ ثُتُّلُوِ؞
[21] تِرُو دَمَ تُوَ دِیُویٜ یِکّْࢽَ، أَمَّ کْلَ کْࢽْجْࢽَࢽْجُدْیٜࢽْ تُوَ دِیُورُو ثْرَاࢽِّ؞
[22] أَکُّو تِیَ دْغْلْ کَسُوَیٜرُو ࢻِغْکِّ، کُورُو أَمْ تِیَ رُوکُّو کْࢽْجْࢽَ ثَدِدْ، کْلَ کْࢽْدُوࢽْجُیٜࢽْ تُوَ ثَدِوَوُووَ، تَیِ یٜیَ یَکّْکّٜ بُوࢽٜ جَوْ ࢻِتْ ثَسَیْ،
[23] کُورُو تَدَوَࢽْجُ یٜیَ رُورُو یٜجْکِّ؞ ࢽغَیْࢽِࢽْ جَمَ وُوَ غَوُ سَمَّ وُوَ أَوُو کَرْوُࢽْ دْغَࢽَ کُرُومَرُو ࢽُوسَیْ، کُورُو وُࢽْدُࢽْدُو یَیٜرُو کْلَ کْࢽْدُوࢽْجُیٜࢽْ کَلْکَلُّو یِکِّ؞
[24] أَمَّ ࢽَیِ بْرْࢽِ تِیَتِرَیٜ غَمُّوَّ دُوُوࢽْ أَلَمْدُ دِوِ أَدَ غَوِّ، کُورُو أَوُو أَسْرْ إِوُلِیسّٜلَࢽْ بُواْجَیْدَ ࢽغُوࢽُوِّدْ، ࢽَیِرُو وُلْࢽْجَغَکِّ، کُرْوُووُ غَدٜ غْࢽَࢽْجَغَکِّوَوُو،
[25] أَمَّ أَوُو تَوَّدَ حَرْ إِسْکِّرُو ࢽغْلَرُو رُوࢽُواْ!
[26] کَمْ کْࢽَّسَرْ ثُوَࢽْدٜ کْࢽْدُوࢽِ حَرْ ࢽجٜرُورَمْبُو ثْدِمَدْرُو کْࢽْدُوُو کْلَ جَمَ دُࢽِیَیٜࢽْ یِکّٜ،
[27] بُلٜیَ ࢻَࢻَلْدَیْ غَیْ، کَ سُیٜیَ تَیِیَ ثُࢽُودِ،
[28] وُ یٜ کْࢽْدُوُو ࢽَ بَوَࢽِیٜࢽْ مُواْکّْࢽَدْ غَیْ، کُورُو سِلُّووُ ࢻَجَرّٜدْ یٜیَ تِرُو یِکِّ؞
[29] کَمْ سْمُوࢽْجُوَمَدْ أَوُو رُحُ اللَّهیٜ جَمَ وُوَ غَوُ سَمَّرُو وُلْجِیدَ ࢻَࢽْجُو!»