[1] دَجِ مَلَیْیَ غَدٜ دُࢽُووَ سَمٜلَࢽْ جْࢻْثِ کِرُکُّو؞ ࢻُوࢻُووْلَࢽْ جَکْتْࢽَ، کُورُو مَرَمَلَࢽْ کْلَ کْلٜیَدَا؞ ࢻْکَّࢽْجُ کْࢽْغَلْ غَیْ، سِیٜلْࢽْجُ یٜ تَمَرْمَرِ کَࢽُّیٜ غَیْ؞
[2] مُکُّوࢽْجُࢽْ کِتَوُ تْࢽْغْرِ کَادَا؞ سِࢽْجُ کْمْبُورَمْدَ کْلَ تٜکُیٜࢽْ غْࢽَجٜ وَیْلَدَ ثِدِلَࢽْ غْࢽَیٜࢽُو؞
[3] کُواْ دُࢽُووَرُو سَࢻْثٜ ࢽغَمْ ثِرِ غَیْ بُرْوُ کٜکُّو؞ بُرْوُ کٜکّْࢽِّیَ، رَدُ تُلُرْدْ کُواْࢽْجَ ࢽُکّٜرَ؞
[4] رَدُ تُلُرْدْ ࢽُکّٜرَࢽِّیَ، رُوُدُ مَکِّ دُوُوࢽْ، کُواْ لَا سَمٜلَࢽْ ࢽُکْثٜ وُرُو: «أَوُو رَدُ تُلُرْدْ وُلْجَࢽَدَ أَسْرْلَࢽْ رُوࢽٜ، بَرٜ رُوُࢽْمِّ!» ثْࢽِ ࢻَࢽْغٜکُّو؞
[5] دَجِ مَلَیْیَ کْلَ تٜکُوَ ثِدِیَیٜࢽْ دَادَ رُکّْࢽَدْ مُکُّوࢽْجُ کْمْبُورَمْ سَمٜرُو سَࢻْثٜ
[6] کْلَ تِ حَرْ أَبَدَ أَبَدِࢽُّو دْغَمَ، تِ دُوُوࢽْ سَمٜیَ أَوُووَ ثُرُوࢽْجُࢽْ دَسَاࢽَا ثِدِیَ أَوُووَ ثُرُوࢽْجُࢽْ دَسَاࢽَا تٜکُوَ أَوُووَ ثُرُوࢽْجُࢽْ دَسَاࢽَآ أَلَکْثْࢽَدْیٜࢽْ کَࢽْسِ جُوٜ: «کُوَ أَدْࢽْ ࢻُوُࢽْ غُرٜدُ بَوُو!
[7] یِمْ مَلَیْیَ تُلُرّٜ کُواْ ࢽُکْثِدْࢽْ، کَࢽْغَدِࢽْجُ ࢻُجِیَ، أَسْرْ اللَّهیٜدْ وَکَّجِ، وُولُودِیَࢽْجُ ࢽَوِیَدْرُو وُلْجْغْࢽَدْ غَیْ،» یٜࢽُو؞
[8] دَجِ کُواْ سَمٜلَࢽْ ࢽُکْثٜ ࢻَکّْࢽَدْ وَلْدٜ وُرُو: «لٜࢽٜ، کِتَوُ کَادَ مُکُّو مَلَیْیَ کْلَ تٜکُوَ ثِدِیَیٜࢽْ دَجْࢽَدْیٜدْࢽْ مُویٜ!» یٜࢽُو؞
[9] ࢽَ مَلَیْیَدْیٜرُو لٜکّٜ کِتَوُ تْࢽْغْرِدَ سِیُو ࢽْکّٜ کِوُورْکّْࢽِیَ، وُرُو: «أَکُّو تَیْ ࢽغْرٜ! ثُرُوࢽْمْلَࢽْ ثْمْ ࢻُوکُّو وَلْجِ، أَمَّ ثِࢽْمْلَࢽْ کْجِ ثُوࢽْ کْمَغْࢽْ غَیْ ࢻَࢽّْمِ،» یٜࢽُو؞
[10] کِتَوُ تْࢽْغْرِدَ مُکُّو مَلَیْیَدْیٜࢽْ مُواْکّٜ غِغْرْکُّو؞ ثِࢽِلَࢽْ کْجِ ثُوࢽْ کْمَغْࢽْ غَیْ ࢻَࢽْغٜکُّو، أَمَّ غِغْرْکّْࢽِیَ، ثُرُوࢽِ ثْمْ ࢻُوکُّو وَلْیٜࢽُو؞
[11] دَجِ وُرُو: «کُورُو یَیٜ سَیْ کْلَ جَمَا لَرْدُوَا تْلَمْبَا مَیْیَا غَدٜغَدٜ کَدَیٜࢽْ ࢽَوِࢽَوِ دِمِیَ!» یٜࢽُو؞