[1] دَجِ کُواْ دُࢽُووَ لَا ࢻَدُو اللَّهیٜࢽْ ࢽُکْثٜ مَلَیْیَ تُلُرْدْرُو: «لٜࢽُواْ، تَسَ تُلُرْ غْرْغَدُ اللَّهیٜدَ دُࢽِیَرُو ࢻِغْࢽُواْ!» ثْࢽِ ࢻَࢽْغٜکُّو؞
[2] بُرْوُویٜدْ لٜجٜ تَسَࢽْجُدَ دُࢽِیَرُو ࢻِیٜىٰࢽُو، کُورُو تُࢽُو کُتُّ یٜ، دِوِ یٜ أَمْ دُوُوࢽْ تَوَ بُࢽْدِدْیٜیَ تَیِرُو غْࢽَجَغَࢽٜ غُمْکِࢽْجُرُو أَمْبْثَّغَیْدْلَࢽْ کٜلُوُو؞
[3] یِࢽْدِیٜدْ تَسَࢽْجُدَ تٜکُرُو ࢻِیٜىٰࢽُو، کُورُو إِࢽْغِدْ بُ أَلَمَ کَمْ ࢽُࢽَیٜ غَیْرُو وَلْجٜ أَلَوْوَ رُووَ ثُرُو تٜکُیٜࢽْ دَسَاࢽَ سَمَّ کَسُࢽُو؞
[4] یَکُّیٜدْ تَسَࢽْجُدَ کُلُوُ سُو، سِمْ إِࢽْغِیٜ سُو سَمَّرُو ࢻِیٜىٰࢽُو، کُورُو إِࢽْغِدْ بُرُو وَلْیٜࢽُو؞
[5] دَجِ مَلَیْیَ إِࢽْغِسُو کُرُومَیٜ: «ࢽِ جِرٜمَ، ࢽِ دُوُوࢽْ کُرٜ یٜࢽْ دْغَمَّ، کْرْمَ یٜࢽْ مبٜجِدْ، ࢽِ تَیِرْدْ، أَوُووَ وُواْمْ أَࢽِیَ کَلْکَلُّو کَمّْمَّ؞
[6] تَیِدْ بُ مُمِࢽَّیٜیَ ࢽَوِیَیٜیَا ࢻِجَࢽَ، کُورُو ثَسَرُو تَیِرُو بُ یِمَّدْ، جُسّْࢽَ،» ثْࢽِ ࢻَࢽْغٜکُّو؞
[7] کُورُو لَیَ دُوَدُرَمْدْࢽْ کُواْ لَایٜ: «آه، اللَّه کْمَࢽْدٜ مَرْتَوَمَ، شَرَࢽْمْ جِرٜ یٜ، کَلْکَلْ یٜ،» ثْࢽِ ࢻَࢽْغٜکُّو؞
[8] دٜوُیٜدْ تَسَࢽْجُدَ کْࢽْغَلُّو ࢻِیٜىٰࢽُو، کُورُو کْࢽْغَلْدْرُو کْࢽْدُوُو أَمْبَ کَࢽُّࢽْ وَرْدُیٜ کٜدُو؞
[9] أَمْدْ کَࢽُّ جَوْ ࢻِتْࢽِࢽْ وَرْغَدَرَ یٜ، ثُ اللَّه کْلَ مَسِوَ أَࢽِیٜࢽْ کْࢽْدُوُووَیٜدَ بَسْکٜرَ یٜ، أَمَّ تُوَ دِمٜ تِرُو دَرَجَ ࢽجُو وَیٜرَ؞
[10] أُوُیٜدْ تَسَࢽْجُدَ کْلَ کُرِسْ کْرْمَیْیٜ بُࢽْدِدْیٜرُو ࢻِیٜىٰࢽُو، کُورُو ࢽَ ثُࢽُودِ سَمَّ دُوُرُو وَلْیٜࢽُو؞ سْرْࢽّجَ ࢽَࢽْغَرُو أَمْدْ تْلَمْࢽْجَا شٜرِࢽْ ࢽَلْجَࢽٜ
[11] جَوْࢽْجَا تُࢽُوࢽْجَا ࢽَࢽْغَرُو اللَّه مَیْ سَمٜمَا بَسْکٜرَ، أَمَّ کْلَ کْࢽْدُوࢽْجَیٜࢽْ تُوَ ثَدْࢽِّ؞
[12] أَرَکُّیٜدْ تَسَࢽْجُدَ بْرْمْ کُرَ یُࢻَرَتّٜدْرُو ࢻِیٜىٰࢽُو، کُورُو جَوَلْ مَیْیَ أَدِࢽَّمْبٜدْرُو دَبَّرْدُوُرُو إِࢽْغِࢽْجُ ࢽغَمْغٜࢽُو؞
[13] دَجِ ثِ کَدِ مَࢻْࢽْدِدْیٜࢽَّ ثِ بُࢽْدِدْیٜࢽَّ ثِ ࢽَوِ کَتُّوُیٜدْیٜࢽَّ سٜدَࢽْ یَکُّ کُوکُووَ ثَمُࢽْ ثَلُوِ کِرُکُّو؞
[14] تَیِدْ سٜدَࢽَّ أَلَمَ أَجَبَّ أَجَبَّ دِیُووُ، ࢽَ مَیْیَ دُࢽِیَیٜ سَمَّیٜرُو لٜجَࢽٜ تَیِیَ کْرِوُ یِمْ کُرَ اللَّه مَرْتَوَمَیٜدْرُو ثَࢻْثَغَیْ؞
[15] «أَکُّو بَرْوُ غَیْ ࢽَࢽْمْبُو إِسْکِّ! بَرْغَࢽْجُ کَمْ دُوُوࢽْ بَرٜ تِیࢽْجُ دٜیَ دَدَجٜ جَمَ أَسْرْࢽْجُ ثَرُࢽِّرُو ࢻَادَرُو دْغَࢽٜ کَجْمُࢽْجُ لُجْࢽَمَدْ!»
[16] دَجِ سٜدَࢽَّدْ مَیْیَدَ ࢽَ تِرُو تْلَمْ یَوْدِیَوْدِࢽْ أَرْمَغٜدُوࢽْ ثَࢽِدْلَࢽْ ثَࢻْکٜرَ؞
[17] تُلُرّٜدْ تَسَࢽْجُدَ کَسَمْبُو ࢻِیٜىٰࢽُو، کُورُو کُواْ دُࢽُووَ لَا کُرِسْ کْرْمَیْیٜ ࢻَدُو اللَّهیٜدْࢽْ ࢽُکْثٜ: «ثٜرْࢽَ!» یٜࢽُو؞
[18] دَجِ ࢻْرَلْمَ ثُلُوٜ غْغْࢻْتِ، کُواْ کٜىٰرَ غْغْرْجِیٜ یٜ ࢻَࢽْدِ، ثِدِ دَمَ بَوُورُو کَوُ أَدَمْغْࢽَ أَلَکْتْࢽَمَࢽْ ࢽغَلْتٜمَ لُولُوجْࢽِّرُو لُولُویٜࢽُو؞
[19] بْرْࢽِ کُرَدْ یَکُّرُو یَکْتٜ بْرْࢽِیَ جَمَ دُࢽِیَیٜ سَمَّ یٜ وُرْغَدَرَ؞ أَدْغَیْمَ اللَّه بْرْࢽِ کُرَ بَبِلَیٜدَ تَکْثٜ کْࢽْجَرَمْ دِبٜࢽْ غْرْغَدُࢽْجُ جَوْ ࢻِتّٜدَ تِرُو کَیْࢽُو؞
[20] ثُکُ سَمَّ بَوُورُو وَلْیٜرَ، کُورُو کَوْ کُرُوُ ࢻِمَ غَدٜرُو تُرُࢽِّ؞
[21] مَࢻِ مَࢻْࢽْدِ مَࢻْࢽْدِ جَوْمَرُو کُرْوُووُ سَمٜلَࢽْ کْلَ أَمْبٜرُو ثُدُرْࢽَ، کُورُو مَسِوَ مَࢻِیٜدْرُو أَمْدْ اللَّهَ بَسْکٜرَ، مَسِوَ أَدْ جَوْرُو جَوْ ࢽَࢽْغَرُو؞