[1] مَلَیْیَ أُوُیٜدْ ࢻُیٜࢽُو، کُورُو سِلُّووُ لَا سَمٜلَࢽْ ثِدِرُو ثُکُّرْࢽَ کِرُکُّو؞ ثُوُرَمْ ثِ بْلَا دَدُرَمْ بَوُووَیٜدَ تِرُو کٜدُو؞
[2] بْلَا دَدُرَمْ بَوُووَدَ کَجٜ کَࢽْغٜ کَغْلْمَدِ کُرَیٜ غَیْ تْرْࢽْ ثِجٜ کَࢽْغٜ بْلَایٜدْ کْࢽْغَلَّ کَسَمْبَا ثَکّٜ دُوُرُو وَلْیٜرَ؞
[3] دَجِ ثُرُو کَࢽْغٜدْیٜࢽْ کَوِیَ ثَلُوٜ دُࢽِیَرُو تَتَرْغَادَرَ؞ تَیِرُو دُࢽُو کٜدُو، دُࢽُو کْلَࢽْجِ دُࢽِیَیٜ غَیْ،
[4] کُورُو تَیِرُو أَمْ دُوُوࢽْ تَوَ اللَّهیٜ ࢽغُمْࢽْجَࢽْ بَوُووَدَ غْࢽِیَ، بَرٜ کَجِمْ دُࢽِیَیٜیَ کْرِجُوُووَ کْسْکَا ࢻِمَا بَࢽَّجَࢽِّ یٜرَ؞
[5] تَیِرُو أَمْ أَࢽِیَ ࢽجٜجُورُو غْࢽِ، کْࢽْدَوُ أُوُرُو أَجَوُ غْࢽَدُوُرُو أَمَرِ کٜدُو؞ جَوْ أَجَوُࢽْجَیٜدْ أَلَمَ جَوْ کْلَࢽْجِیٜ کَمْبَ جْغْرْࢽَ غَیْ؞
[6] یِمْ أَࢽِࢽْ أَمْسُو کَرْمُو مَجَیْ، أَمَّ ثَوَࢽْدِوَوُو؞ سَࢽُیْیَ، ثَرَیِ، أَمَّ کَرْمُودْ تَیِࢽْ کُرُوُࢽُّو ثْغَسِ؞
[7] کَوِیَ أَࢽِ ࢻْرَّ کْرِوُرُو دَبَّرْغَدَا ثَمُࢽْ؞ کْلَࢽْجَࢽْ أَوُو لَا أَرِیَوُ کْرْمَیْیٜ دِࢽَرّٜ غَیْیَ، ࢻْکَّࢽْجَ یٜ ࢻْکَّ کَمْبٜیَ ثَمُࢽْ؞
[8] کَࢽْدُرِࢽْجَ کَࢽْدُرِ کَمُیٜ غَیْ، کُورُو شٜرِࢽْجَ یٜ شٜرِ ࢽغَمْبٜ غَیْ؞
[9] ࢽغَࢽْجِࢽْجَ سُلْوٜ سُیٜࢽْ جَکَّدَ غَیْ، کُورُو کَلَلَ ࢻٜࢻٜدُووَࢽْجَیٜ أَمَلٜࢽْکٜیَ کْرِوُیٜ ࢻْرْ ࢽغْوُ غْرْجَࢽَ لَوَلَرُو ثَکَّسِ غَیْ؞
[10] ࢽغَوَرٜࢽْجَ أَلَمَ ࢽغَوَرٜ کْلَࢽْجِیٜ غَیْ کَرِیَ، کُورُو ࢽغَوَرٜࢽْجَدْࢽْ کْࢽْدُوُو کْࢽْدَوُ أُوُرُو أَمْبَ بَسَرْدُیٜ ثَدَࢽَ؞
[11] مَلَیْیَ بْلَا دَدُرَمْ بَوُووَیٜدْ مَیْࢽْجَ، تْلَمْ یَوْدِیَوْدِࢽْ ثُࢽْجُ أَبَدُّوࢽْ، تْلَمْ غْرٜسّٜلَࢽْ أَࢻُولِّیُوࢽْ؞
[12] مَسِوَ بُرْوُویٜدْ کُوجْࢽَ، أَکُّو ࢽغَوُو أَدْیٜࢽْ مَسِوَ غَدٜ یِࢽْدِ غَࢻْثُو؞
[13] مَلَیْیَ أَرَکُّیٜدْ ࢻُیٜࢽُو، کُورُو کُواْ لَا کُویُو دٜوُ لَیَ دُوَدُرَمْ دِࢽَرّٜ ࢻُوُ اللَّهیٜࢽْ دْغَࢽَدْیٜࢽْ ࢽُکْثِ ࢻَࢽْغٜکُّو؞
[14] مَلَیْیَ أَرَکُّیٜ کَࢽْغَدِࢽْجُوَدْرُو: «مَلَیْیَ دٜوُ ثِ بْرْمْ کُرَ یُࢻَرَتّٜࢽْ تِکّٜرْࢽَدَ وُیْࢽٜ!» یٜࢽُو؞
[15] أَدْغَیْمَ مَلَیْیَ دٜوُ حَرْ سَ أَدَ یِمْ أَدَ کْࢽْدَوُ أَدَ سَا أَدَرُو ثَمَࢽْ دَبَّرْغَدَدَ لٜجَ أَدَمْغْࢽَ سَمَّیٜ ࢻَلْ ثُرُو یَکُّیٜࢽْ ثٜىٰسُورُو وُیْیٜرَ؞
[16] سُوجِیَࢽْجَ ࢻْرْوُدْیٜ ࢽَࢽّغْوُࢽْجَدْ مِلِیُو یٜرْ یِࢽْدِ، ࢽَࢽّغْوُࢽْجَدَ ࢻَࢽْغٜکُّو؞
[17] أَکُّو أَلَمَ ࢻْرَّا ࢻْرْوُࢽْجَا وَحَیِلَࢽْ رُکّْࢽَیٜدْ: ࢻْرْوُدْ سُلْوٜ کِمٜ ثِتْ سُو، رِوُلَّ سُو، کُرْࢽُمْ سُو ثَسَکّْࢽَ؞ کْلَ ࢻْرَّدْیٜدْ کْلَ ࢽغَمْبٜیَ ثَمُࢽْ، ثِࢽْجَ یٜࢽْ کَࢽُّوَ کَࢽْغٜیَ کَوْ کَࢽُّ کِمٜجْغْࢽَا ثَلُوِ؞
[18] مَسِوَ یَکُّ أَࢽِلَࢽْ أَدَمْغْࢽَیٜ ࢻَلْ ثُرُو یَکُّیٜࢽْ کٜىٰسُو: کَࢽُّوَ کَࢽْغٜیَ کَوْ کَࢽُّ کِمٜجْغْࢽَا ثِࢽْجَࢽْ ثَلُوِدْ؞
[19] کْࢽْدُوُو ࢻْرَّیٜدْ ثِࢽْجَا ࢽغَوَرٜࢽْجَالَࢽْ کْرْغَ؞ ࢽغَوَرٜࢽْجَدْ کَدِ غَیْ کْلَا، تَیِلَࢽْ أَمْبَ بَسَرْجَیْ؞
[20] أَمَّ أَدَمْغْࢽَ غَࢻْثَࢽَ مَسِوَ أَࢽِࢽْ سَࢽُࢽِّدْ کْلَ أَوُو مُکُّوࢽْجَࢽْ ثَدَࢽْدْࢽَیٜࢽْ تُوَ ثَدْࢽِّ، کُورُو سٜدَࢽَّا غُمْکِیَ دِࢽَرّٜ سُو، رِوُلَّیٜ سُو، کُلُّویٜ سُو، کَوْیٜ سُو، کْسْکَیٜ سُووَرُو أَمْبْثَّغَیْدَ کُولْجَࢽِّ، غُمْکِیَ دُوُوࢽْ رَکْثَࢽٜ کُرُووَ ࢻَࢽْدُوَ لٜدُوَ ثَدِوَوُودْ؞
[21] کُورُو کَمْ ࢽجٜجُو سُو، سَغَوُ دِیُو سُو، کْࢽْجْࢽَ سُو، ࢽَمْبَرْوُ سُویٜࢽْ تُوَ ثَدْࢽِّ؞