[1] دَجِ مَلَیْیَ تُلُرْ تَسَ تُلُرَّدْیٜ ࢻَلْࢽْجَ ࢽَࢽِرُو إِسٜ وُرُو: «أَرٜ، ࢽِرُو وُواْمْ دُوُوࢽْ جَوَرْ کُرَ کْلَ إِࢽْغِ ࢽغْوُیٜࢽْ ࢽَࢻْثْࢽَمَدْرُو غْࢽَجَغَیْدَ ࢻْلٜࢽْجْغْکِّ؞
[2] مَیْیَ دُࢽِیَیٜدْ تِیَ رُوکُّو کْࢽْجْࢽَ ثَدْࢽَ، کُورُو أَمْ دُࢽِیَࢽْ دَسَاࢽَدْ یٜ دِبٜࢽْ کْࢽْجْࢽَࢽْجُیٜلَࢽْ سَغَرَࢽْدَࢽَ،» یٜࢽُو؞
[3] دَجِ رُحُ اللَّهیٜ وُرُو جْمْسِیٜ، وَحَیِلَࢽْ مَلَیْیَدْ وُوَ کَرَارُو سُتُّلُوُو، کُورُو کَمُ لَا کْلَ بُࢽْدِ کِمٜ ثِتّٜࢽْ ࢽَࢻْکَدَ کِرُکُّو؞ بُࢽْدِدْ تِیࢽْجُ ࢽغَࢽْ ثُوَ غَدٜغَدٜ اللَّهَ بَسْتُیٜࢽْ جَکَّدَ، کْلَࢽْجُ تُلُرْ، کَࢽْغَدِ مٜوُوَ؞
[4] کَمُدْ کَجْمُ کِمٜ ثِتْ لُجْࢽَ، کَرٜ کَوَرَیٜ دِࢽَرْ سُو، کَرِ سُو، مُرْسَمْ سُولَࢽْ تْدْࢽَ ثَکّْࢽَ؞ مُکُّوࢽْجُࢽْ کْࢽْجَرَمْ دِࢽَرّٜیَ ثُرُوࢽْجُࢽْ أَوُو جَوْرُو وَادَ کْࢽْجْࢽَࢽْجُیٜلَࢽْ ثْمْبْرْࢽَ؞
[5] ࢽغُمْࢽْجُࢽْ ثُ أَسْرّٜ رُوُوَدَ: «بْرْࢽِ کُرَ بَبِلَیٜ، یَ جَوَرَّ سُو، أَوُو وَادَ دُࢽِیَیٜ سُویٜ؞»
[6] دَجِ کَمُدْ بُ مُمِࢽَّیٜیَ بُ شٜدَوُ عِیسَیٜیَ ثَࢽٜ سَغَرَࢽْدْࢽَرُو کِرُکُّو؞ تِیَ کِرُکّْࢽِیَ، جَوْرُو أَجَࢻْکٜکُّو؞
[7] أَمَّ مَلَیْیَدْیٜ وُرُو: «أَوِرُو غْلٜ أَجَࢻْکٜمْ؟ أَسْرْ کَمُدْیٜیَ بُࢽْدِ دُوُوࢽْ کْلَࢽْجُرُو جُوَࢽَ کْلَ تُلُرَّ کَࢽْغَدِ مٜوُوَدْیٜیَ ࢽِرُو بَیِࢽْجْغْکِّ؞
[8] بُࢽْدِ رُمَّ أَدْ کُرٜ یٜࢽْ دْغَࢽَ، کْرْمَ یٜ بَوُو، کُورُو ࢻُوُ یٜࢽْ بْلَا دَدُرَمْ بَوُووَلَࢽْ ثُلُوٜ سِدُوُرُو لٜجِ؞ أَمْ دُࢽِیَࢽْ دَسَاࢽَ دُوُوࢽْ ثُࢽْجَ ثُرُو کِتَوُ رُویٜࢽْ تْࢽْ دُࢽِیَ أَلَکْتْࢽَمَࢽْ رُوُدْࢽِّدْ بُࢽْدِدَ ثَرُیْیَ، أَجَࢻْثَیْ، تِ کُرٜ یٜࢽْ دْغَࢽَ، کْرْمَ یٜ بَوُو، کُورُو ࢻُوُ یٜࢽْ وَلْدٜ إِسِ ࢽَࢽْغَرُو؞
[9] أَکُّو لَمَرْ حَࢽْغَلْکْجِیَ ࢽَࢽْرَشِدُوَیٜ: کْلَ تُلُرْدْ کَوْ کُرُوُ تُلُرْ دُوُوࢽْ کْلَࢽْجَࢽْ کَمُدْ ࢽَࢻْثْࢽَدْ؞ کُورُو تَیِدْ مَیْ تُلُرْ:
[10] أُوُࢽْجَیٜ کْرْمَیْ ثٜرْࢽَ، ࢻَلْࢽْجَ کْرْمَ مبٜجِ، ࢻَلْࢽْجَ ࢻُوُࢽْ إِسِ؞ إِسِیَ، ࢽغْوُرُو تُسِّوَوُو؞
[11] بُࢽْدِ کُرٜ یٜࢽْ دْغَࢽَ کْرْمَ یٜ بَوُودْ، تِدْ مَیْ وُسْکُیٜ، أَمَّ تِ تُلُرْدْیٜ، کُورُو سِدُوُرُو لٜجِ؞
[12] کَࢽْغَدِ مٜوُ رُمَّدْ مَیْیَ مٜوُ کُورُومَ کْرْمَیْ ثَوَࢽْدْࢽِّ، أَمَّ سَ ࢻَلُّو بُࢽْدِدَ رُوکُّو کْرْمَیْ ثَوَࢽْدِ؞
[13] تَیِ أَࢽِ سَمَّ ࢽِیَࢽْجَ تِلُو، کْࢽْدُوُوࢽْجَا کْرْمَیْࢽْجَا مُکُّو بُࢽْدِدْیٜرُو ثَسَکِّ؞
[14] تَمَدْرُو کْرِوُ ثَکَّدِ، أَمَّ تَمَدْ کْلَ تَیِیٜࢽْ کْࢽَّسَرْ ثُوَࢽْدِ، تِمَ کْمَ کْمَوَیٜ، کُورُو مَیْ مَیْیَیٜ وُو ࢽَࢽْغَرُو، کُورُو أَمْ تِیَ جَاࢽَدْ بُواْوَدَ یٜ، کْرٜیَدَ یٜ، أَمَࢽَّ یٜ،» یٜࢽُو؞
[15] کُورُو مَلَیْیَدْ وَلْدٜ وُرُو: «إِࢽْغِ ࢽغْوُ ࢽَ جَوَرْ ࢽَࢻْثْࢽَ رُمَّدْ، تَیِمَ جَمَ سُو، ثَمُّو سُو، لَرْدُوَ سُو، تْلَمْبَ سُو وُو؞
[16] کَࢽْغَدِ مٜوُ رُمَّدَ بُࢽْدِدَسُو جَوَرْدَ وُلْ وَجَیْ؞ کَرٜࢽْجُ سَمَّا ثَمُویٜ تِیَ رِࢽْجَیْ، کُورُو دَࢽْجُ جَغَرٜ کَࢽُّࢽْ تِیَ رْمْسْ وَرْجَیْ؞
[17] أَوُووَ اللَّه کَرْوُࢽْجَا ثَکّٜ ࢽِیَࢽْجُ دِیُورُو ࢻَࢽْدَࢽٜ کْرْمَیْࢽْجَ بُࢽْدِدْرُو ثَدِ، حَرْ مَࢽَ اللَّهیٜ وَکَّجِرُو؞
[18] کَمُ رُمَّدْ بْرْࢽِ کُرَ دُوُوࢽْ مَیْیَ دُࢽِیَیٜیَ ثُࢽُودِدْ،» یٜࢽُو؞