[1] «مَلَیْیَ جَمَ وُوَ غَوُ بْرْࢽِ سَرْدِسّٜࢽْ دَسَاࢽَدْیٜرُو أَوُو أَࢽِیَ رُوُغْࢽٜ: أَکُّو کَوُرِ تِ دُوُوࢽْ رُحُ تُلُرْ اللَّهیٜدَ سِلُّووُ تُلُرْدَ ثْدَࢽَمَدْیٜدْ؞ کْࢽْدُوࢽْمْ ࢽُوکّْࢽَ؞ أَمْسُو ࢽِیَ رُووَرُو ࢽغُوࢽْجَࢽَ یَیٜ، رُوࢽْمْ بَوُو؞
[2] ࢻَادَرُو دْغَیْ، أَوُو غَࢻْثْࢽَ ࢽُو ثْدِدَ کِبَّغْࢽٜ، کْࢽْدُوࢽْمْ ࢽَ اللَّهࢽِیٜࢽْ کَلْکَلْ غْࢽِرُو رُکّْࢽَ؞
[3] أَدْ ࢽَࢽْغَرُو أَوُو ࢻَࢽّْمٜ ࢽغُوࢽْمَّدَ تَࢽْغٜ رُوࢽٜ، تْمّٜ! ࢻَادَرُو دْغَمْبَوُووَ، بَرْوُ غَیْ إِسْکِّ، کُورُو سَ ࢻِࢽْ ࢽَࢽْمْبُو إِسْکِّرُو ࢽُوࢽْمْبَوُو؞
[4] أَدْ یَیٜ ࢽَࢽْمْࢽِࢽْ بْرْࢽِ سَرْدِسّٜࢽْ أَمْ لَا کَجْمُࢽْجَ بَࢽَّجَࢽِّ تَیِرْ کَسَرْغَ مبٜجِ؞ کَجْمُ بُلَّ وُوَ سَسَدُّوِ، مَرْتَوَࢽْجَا ࢽَࢽْغَرُو؞
[5] ࢽغَیْࢽِࢽْ کَمْ کْࢽَّسَرْ ثُوَࢽْدْࢽَمَدْ کَجْمُ بُلْ لُجِ، کُورُو تْمَّرُو ثُࢽْجُ ثُرُو کِتَوُ رُویٜࢽْ ثِࢽّْکِّوَوُو، أَمَّ ࢻُوُ بَوَࢽِیَ مَلَیْیَوَࢽْجُوَیٜࢽْ تِ کَکّٜ ࢽْکِّ؞
[6] کَمْ سْمُوࢽْجُوَمَدْ أَوُو رُحُ اللَّهیٜ جَمَ وُوَ غَوُ سَمَّرُو وُلْجِیدَ ࢻَࢽْجُو!»
[7] «مَلَیْیَ جَمَ وُوَ غَوُ بْرْࢽِ ࢻِلَدٜلْࢻِیَیٜࢽْ دَسَاࢽَدْیٜرُو أَوُو أَࢽِیَ رُوُغْࢽٜ: أَکُّو کَوُرِ تِ دُوُوࢽْ تَیِرْ یٜ، جِرٜ یٜ، کُورُو ثُوُرَمْ مَیْ دَاوُدَیٜ ثْدَࢽَمَدْیٜدْ، وُوتّٜ تِ دُوُوࢽْ کَجِیَ، وُࢽْدُمَ جَکْثِوَوُو، کُورُو جَکْثِیَ، وُࢽْدُمَ کَجِوَوُودْ؞
[8] کْࢽْدُوࢽْمْ ࢽُوکّْࢽَ؞ أَکُّو ثِࢽَّ وُࢽْدُمَ رَکْثٜ جَکْثِوَوُو کَࢽْجْغْکّْࢽَ؞ دُࢽُوࢽْمْ غَࢽَمَ، مَࢽَࢽِ کَسَدّْمٜ ࢽغُوࢽْمَّ، کُورُو ثُࢽِ أَࢽْغْرْࢽْمِّ؞
[9] أَکُّو أَوُو تَیِ جَمَ دَࢽْدَلْ إِوُلِیسّٜ، تَیِ دُوُوࢽْ یَوْدِ ثَࢽِ، أَمَّ کَتُّوُ یَوْدِ غْࢽِدْرُو یِدّْکِّدْ: یَکّْکّٜ إِسَࢽٜ ࢻُوُࢽْمْلَࢽْ تُࢽْغُرُمْجَࢽٜ ࢽِیَ ࢽجْرَاکّْࢽَرُو ࢽُوجَیْ؞
[10] مَࢽَࢽِ ࢽٜتُّیٜ کَسَدّْمٜ ࢽغُوࢽْمَّ ࢽَࢽْغَرُو، سَ بُوࢽٜىٰ أَدَمْغْࢽَ سَمَّا رِجَࢻْتُرُو دُࢽِیَ ࢽغَرُو إِسِدْࢽْ ࢽِیَ ࢽجْرِوُکِّ؞
[11] دُوَمَࢽْ إِسْکِّ؞ أَوُو تَمَّدَ ࢽغْلَرُو رُوࢽٜ، بَرٜ وُࢽْدُمَ أَرِیَوُࢽْمْ کْࢽَّسَرّٜ ثْمُواْࢽِّرُو؞
[12] کَمْ کْࢽَّسَرْ ثُوَࢽْدْࢽَمَدَ تَمَرْمَرِ ࢻَدُو اللَّهࢽِیٜرُو دِکّٜ ࢽَدْࢽْ تْمَّرُو ثُلُوِوَوُو؞ تِیࢽْجُࢽْ ثُ اللَّهࢽِیٜیَ ثُ بْرْࢽِ اللَّهࢽِیٜ جٜرُجَلٜمْ بْرِࢽْ سَمٜࢽْ ࢽَ اللَّهࢽِیٜࢽْ جْࢻْثِدْیٜیَ ثُࢽِ بْرِࢽَّ رُوُࢽْکِّ؞
[13] کَمْ سْمُوࢽْجُوَمَدْ أَوُو رُحُ اللَّهیٜ جَمَ وُوَ غَوُ سَمَّرُو وُلْجِیدَ ࢻَࢽْجُو!»
[14] «مَلَیْیَ جَمَ وُوَ غَوُ بْرْࢽِ لَوُدِکِیَیٜࢽْ دَسَاࢽَدْیٜرُو أَوُو أَࢽِیَ رُوُغْࢽٜ: أَکُّو کَوُرِ تِ دُوُوࢽْ تِرُو أَمِࢽْ ثَࢽِ یٜ، تِ شٜدَمَ أَمَࢽَّ، جِرٜىٰ یٜ، کُورُو ࢻْرْدُ أَوُو اللَّه أَلَکْثْࢽَ سَمَّیٜدْیٜدْ؞
[15] کْࢽْدُوࢽْمْ ࢽُوکّْࢽَ؞ ࢽِ سَمْسُ غْࢽِ، کَࢽُّوَ غْࢽِ؞ ثَ ࢽِدْ سَمْسُ بِ کَࢽُّوَا، رَاکُّو!
[16] أَمَّ ࢽِ دْغْسُ، کَࢽُّوَ غْࢽِ، سَمْسُ غْࢽِ ࢽَࢽْغَرُو، ثِࢽِلَࢽْ ࢽِیَ تْوَࢽْجْکِّ؞
[17] ࢽِیٜ: ‹وُ غَرِوُ، أَرْسِیے ࢽغْوُ ࢻَࢽْدْکّْࢽَ، أَوِمَ مَوْسْࢽِّ،› ࢽْمِ، أَمَّ ࢽِ أَوُو کَࢽْجِمَرِیٜ یٜ، ࢽجُࢽُودُیٜ یٜ، ࢽغُدِ یٜ، کَمْبُ یٜ، ࢻْتْکُ یٜرُو ࢽُوࢽْمِّ؞
[18] أَدْ ࢽَࢽْغَرُو ࢽِیَ غَلَࢽْجْکِّ، ࢽَࢽِࢽْ دِࢽَرْ کَࢽُّࢽْ کِدَادَ یُوٜ غَرِوُرُو وَلّٜ؞ کَجْمُ بُلْ یٜ یُوٜ تِیࢽْمْ جَࢽْغٜ، بَرٜ وُࢽْدُمَ أَسْرْࢽْمْ ثُرُࢽِّرُو؞ کُورُو کَرْوُࢽْ سِمْبٜ یٜ یُوٜ سَمْدْࢽٜ سِمْ ࢻَࢽْدٜ؞
[19] أَمْ رَاکّْࢽَدْرُو یِکَّدْکّٜ یَرْغَرِکِّ؞ أَدْ ࢽَࢽْغَرُو مْلْدْࢽٜ تْمّٜ!
[20] أَکُّوࢽِ، ثِࢽَّ ࢻَدُویٜࢽْ بَکْتُ دِکِّ؞ کَمْ لَا کُواْࢽِ ࢻَࢽْجٜ ثِࢽَّدَ کَجِیَ، ࢽغَاکّٜ تِیَ رُوکُّو مَسْࢽَ دِکِّ، تِ یٜ وُوَ رُوکُّو ثْدِ؞
[21] کَمْ کْࢽَّسَرْ ثُوَࢽْدْࢽَمَدْرُو أَمَرْغْکّٜ وُوَ رُوکُّو کُرِسْࢽِ کْرْمَیْیٜࢽْ ࢽَࢻْثِ، جِرِ وُ یٜ کْࢽَّسَرْ ࢻَࢽْدْکّٜ بَوَࢽِیَ رُوکُّو کُرِسْࢽْجُ کْرْمَیْیٜࢽْ ࢽَمّْکّْࢽَدْ غَیْ؞
[22] کَمْ سْمُوࢽْجُوَمَدْ أَوُو رُحُ اللَّهیٜ جَمَ وُوَ غَوُ سَمَّرُو وُلْجِیدَ ࢻَࢽْجُو!»