[1] تَمَدْ کَرَمَ تُلُرّٜدَ کَیٜࢽِّیَ، رٜدَ سَیٜ غَیْرُو سَمٜ غْمْ کِدُو؞
[2] دَجِ مَلَیْیَ تُلُرْ ࢻُوُ اللَّهیٜࢽْ دَادَدَ کِرُکُّو؞ تَیِرُو کَࢽْغَدِ تُلُرْ کٜدُو؞
[3] مَلَیْیَ غَدٜ مُکُّوࢽْ کَاجِ وَرْدَرَمْ دِࢽَرّٜیَ إِسٜ ࢽَ لَیَ دُوَدُرَمْدْیٜࢽْ دَیٜࢽُو؞ تِرُو کَاجِ کَدَا مُودُوَ مُمِࢽَّ سَمَّیٜࢽْ کُࢽْدٜࢽُّو کْلَ لَیَ دُوَدُرَمْ دِࢽَرّٜ ࢻُوُ کُرِسْ کْرْمَیْیٜࢽْ دْغَࢽَدْیٜࢽْ ثَکُّورُو کٜدُو؞
[4] کَࢽْغٜ کَاجِدْیٜ مُودُوَ مُمِࢽَّیٜࢽْ کُࢽْدٜࢽُّو مُکُّو مَلَیْیَدْیٜࢽْ ࢻُوُ اللَّهیٜࢽْ تْرْࢽْ ثِیٜࢽُو؞
[5] دَجِ مَلَیْیَدْ کَاجِ وَرْدَرَمْدَ ࢽغُوجٜ کَࢽُّ لَیَ دُوَدُرَمْبٜدْࢽْ ثْمْبْرٜ دُࢽِیَرُو غْࢻْکٜىٰࢽِّیَ، کٜىٰرَ یٜ غْغْرْجِ، کُواْ یٜ ࢽُکْثِ، دُࢽِیَ یٜ ثُوَلْدِ، کُورُو ثِدِ یٜ لُولُوجِ؞
[6] دَجِ مَلَیْیَ تُلُرْ کَࢽْغَدِ تُلُرَّدْ تَیِیَ ࢻُدُرُو دَبَّرْغَدَرَ؞
[7] بُرْوُویٜدْ ࢻُیٜࢽُو، کُورُو مَࢻِیَ کَࢽُّوَ بُ تَیِرُو کْلَّادَا دُࢽِیَرُو ࢻِیٜىٰرَ؞ دُࢽِیَدْیٜ ࢽَࢽْجُ ࢻَلْ ثُرُو یَکُّیٜࢽْ کَࢽُّ غِوُو، کْسْکَ یٜیَ ࢻَلْ ثُرُو یَکُّیٜࢽْ کَࢽُّ غِوُو، کُورُو کَجِمْ کْرِ یٜ سَمَّا کَࢽُّ غِوُو؞
[8] مَلَیْیَ یِࢽْدِیٜدْ ࢻُیٜࢽُو، کُورُو أَوُو لَا أَلَمَ کَوْ کُرُوُ کَࢽُّ ثْدَࢽَ غَیْ تٜکُرُو غْࢻْکٜىٰرَ؞ إِࢽْغِ تٜکُیٜدْیٜ ثِ ࢻَلْ ثُرُو یَکُّیٜࢽْ بُرُو وَلْیٜࢽُو،
[9] أَلَوْوَ رُووَ ثُرُو تٜکُیٜࢽْ دَسَاࢽَدْ یٜ ࢻَلْ ثُرُو یَکُّیٜࢽْ کَسُࢽُو، کُورُو مَارَ إِࢽْغِیٜ ࢻَلْ ثُرُو یَکُّیٜࢽْ یٜ تْغْمْبُو بَࢽَّادَرَ؞
[10] مَلَیْیَ یَکُّیٜدْ ࢻُیٜࢽُو، کُورُو سِلُّووُ مَࢻْࢽْدِ لَا کَࢽُّ غَیْ ثَمْبِ کْلَ کُلُوُ ࢻَلْ ثُرُو یَکُّیٜرُو، کُورُو کْلَ سِمْ إِࢽْغِیٜرُو سَمٜلَࢽْ کِکُّرُو؞
[11] سِلُّووُ أَدْیٜ ثُࢽْجُ ثْمْ، کُورُو إِࢽْغِیٜ ثِ ࢻَلْ ثُرُو یَکُّیٜࢽْ ثْمْ ࢻُوکُّو وَلْیٜࢽُو، ثْمْبُو وَلْجْࢽَ ࢽَࢽْغَرُو أَمْ ثَسَࢽَیٜ ࢽغْوُࢽْجَ کَسُࢽُو؞
[12] مَلَیْیَ دٜوُیٜدْ ࢻُیٜࢽُو، کُورُو ثِ ࢻَلْ ثُرُو یَکُّیٜࢽْ کْࢽْغَلّٜیَ کُمْبَلّٜیَ سِلُّووُوَیٜیَ بَکّٜرَ، حَرْ ࢽُرْࢽْجَیٜ یٜ ثِ ࢻَلْ ثُرُو یَکُّیٜࢽْ دُوُ ثْلْمْ ࢻْتُّو وَلْیٜࢽُو، کُورُو ࢽُرْ کَوْسُیٜدْ یٜ ثِ ࢻَلْ ثُرُو یَکُّیٜࢽْ وَسّْࢽِّ، بُࢽٜىٰدْ یٜ ࢽغَیْ؞
[13] رُکِّ ࢽغَیْ دُوُوࢽْ، ࢽغَرْمُ لَا سَمٜ کُرُوُࢽْ ࢻَرْجِیٜ کُواْࢽْجُ ࢻَࢽْغٜکُّو؞ کُواْ دُࢽُووَرُو سَࢻْثٜ: «کُتُّࢽْجَ! کُتُّࢽْجَ! کُتُّࢽْجَ أَمْ دُࢽِیَلَࢽْ دَسَاࢽَدْ، کُواْ کَࢽْغَدِیٜ غَࢻْثَࢽَ مَلَیْیَ یَکُّ ࢻُوُࢽْ ࢻُجَیْدْ ࢽَࢽْغَرُو!» ثْࢽِ؞