[1] ࢽغَوُو أَدْیٜࢽْ أَکُّو ثِࢽَّ سَمٜࢽْ کَادَ کِرُکُّو، کُورُو کُواْ دُوُوࢽْ کَࢽْغَدِ غَیْ بُرْوُوࢽْ مَࢽَسِیے ࢻَکّْࢽَدْیٜ وُرُو: «أَرٜ ࢽَ أَدْرُو تَدّٜ، أَوُو ࢻَغَتُّو ࢽغَوُو أَدْیٜࢽْ وَکَّجِسُودَ ࢻْلٜࢽْجْغْکّٜ،» یٜࢽُو؞
[2] سَدْمَࢽْ رُحُ اللَّهیٜ وُرُو جْمْسٜىٰࢽُو؞ أَکُّو سَمٜࢽْ کُرِسْ کْرْمَیْیٜ مبٜجِ، کُورُو کْمَࢽْجُ کْلَ کُرِسْدْیٜࢽْ ࢽَࢻْکَدَ کِرُکُّو؞
[3] تِ ࢽَࢻْکَدَدْ ثَمُࢽُوࢽْجُ أَلَمَ کَوْوَ تَمَࢽَّ جَسْࢻَا کَرْࢽٜلِیَا غَیْ، کُورُو مَرَمَ یٜمٜرُودْ غَیْ کُرِسْدَ دِرِجٜ کْلْجْࢽَ؞
[4] کُرِسْ کْرْمَیْیٜ غَدٜ ࢻِࢽْدِ دٜرِ کُرِسْدَ دِرِجَࢽٜ کْلْجَࢽَ، کُورُو کْلَࢽْجَࢽْ أَمْوُرَوَ ࢻِࢽْدِ دٜرِ کَجْمُ بُلْ لُوَدَ کْلَࢽْجَࢽْ أَرِیَوُ دِࢽَرّٜیَ ࢽَࢻْکَدَ مبٜجِ؞
[5] کُرِسْدْࢽْ ࢻْرَلْمَ ثُلُوٜ غْغْࢻْتِ، کُواْ کٜىٰرَ غْغْرْجِیٜ یٜ ࢻَࢽْدِ؞ ࢻُوُ کُرِسْدْیٜࢽْ ࢻَتْلَ تُلُرْ وَسْکَدَ ثَسَمْبِ، تَیِمَ رُحُ تُلُرْ اللَّهیٜدْ وُو؞
[6] کُورُو ࢻُوُ کُرِسْدْیٜࢽْ أَوُو لَا بْرْمْ غَیْ تِیٜࢽْ أَوُو سَمَّ ࢻَرَکُّو تُرُیْ کُدْرَمْ غَیْ مبٜجِ؞ دَوُ کُرِسّٜیَ دِرِࢽْمْکْلّٜࢽْجُوَࢽْ أَلَوْ رُووَ دٜوُ مبٜجِ، تِیࢽْجَ ࢻُوُوَ ࢽغَوُووَ ࢽغَࢽْ سِمْ کَدَا؞
[7] أَلَوْ بُرْوُویٜدْ أَلَمَ ࢽغَمْ غَیْ، أَلَوْ یِࢽْدِیٜدْ أَلَمَ دَلُو غَیْ، أَلَوْ یَکُّیٜدْ ࢻْکَّࢽْجُ ࢻْکَّ کَمْبٜ غَیْ، کُورُو أَلَوْ دٜوُیٜدْ أَلَمَ ࢽغَرْمُ ࢻَرْدُ ثْدِ غَیْ؞
[8] أَلَوْ رُووَ دٜوُ أَࢽِ ࢻِࢽْجَ یَیٜ ࢻٜࢻٜدُو أَرَکُّ أَرَکُّوَ، ࢻٜࢻٜدُوࢽْجَ کْلَا ثِدِیَا ࢽغَࢽْ سِمْ کَدَا؞ بُࢽٜیَ کَوْسُوَرُو دَدُ بَوُورُو تَیِیٜ: «تَیِرْ، تَیِرْ، تَیِرْ، اللَّه کْمَࢽْدٜ مَرْتَوَمَ، تِ دُوُوࢽْ کُرٜࢽْ دْغَࢽَ، کْرْمَ یٜ مبٜجِ، ࢻُوُ یٜࢽْ دْغَیْدْ!» ثَࢽِ؞
[9] کُورُو سَ دُوُوࢽْ أَلَوْوَ رُووَدْ تِ حَرْ أَبَدَ أَبَدِࢽُّو دْغَمَ کْلَ کُرِسْ کْرْمَیْیٜࢽْ ࢽَࢻْکَدَمَدْرُو دَرَجَا مَرْتَوَا وُسٜدُوَ ثَدِیَ،
[10] أَمْوُرَوَ ࢻِࢽْدِ دٜرِدْ یٜ ࢻُوُ تِ کْلَ کُرِسْ کْرْمَیْیٜࢽْ ࢽَࢻْکَدَمَدْیٜࢽْ تْمْدَࢽٜ تِ حَرْ أَبَدَ أَبَدِࢽُّو دْغَمَدْرُو أَمْبْثَّغَࢽٜ أَرِیَوُࢽْجَ ثَتُّلُوٜ ࢻُوُ کُرِسْ کْرْمَیْیٜࢽْ غْࢽَجَࢽٜ تِرُو:
[11] «اللَّه کْمَࢽْدٜ، دَرَجَا مَرْتَوَا کْࢽْدُوُووَ ࢻَࢽْدُوࢽْمْدْ جُسّْࢽَ، دَلِلْࢽْجُدْ أَوُو سَمَّا أَلَࢽْغْمٜ، کْلَ ࢽِیَࢽْمْبٜࢽْ یُوجَࢽٜ أَلَکْتَࢽَ ࢽَࢽْغَرُو،» ثَࢽِ؞