[1] دَجِ سَمٜ بْرِࢽَّ ثِدِ بْرِࢽَّ کِرُکُّو؞ سَمٜ بُرْوُویٜیَ ثِدِ بُرْوُویٜیَدْ بَوُورُو وَلْجَࢽَ، کُورُو تٜکُ یٜ غَدٜرُو بَوُو؞
[2] کُورُو بْرْࢽِ تَیِرْ تِرُو جٜرُجَلٜمْ بْرِࢽْ ثَࢽِدَ سَمٜلَࢽْ ࢽَ اللَّهیٜࢽْ جْࢻْثِ کِرُکُّو؞ بْرْࢽِدْ ࢽجُدُ کوَࢽْجُ ࢽَࢽْغَرُو کَوَرَ ثْدْࢽَدْ غَیْ دَبَّرْغَدَ؞
[3] کُواْ کُرَ لَا کُرِسْ کْرْمَیْیٜدْلَࢽْ ࢽُکْثِ ࢻَࢽْغٜکُّو؞ تِیٜ: «أَکُّو کْࢽْدْغَیْرَمْ اللَّهیٜ ࢽَ أَمْبٜࢽْ، کُورُو تَیِیَ رُوکُّو دْغَیْ؞ تَیِ جَمَࢽْجُرُو وَلْجَیْ، کُورُو اللَّه کْلَࢽْجُ تَیِیَ رُوکُّو دْغَیْ یٜ، اللَّهࢽْجَرُو وَلْجِ یٜ؞
[4] سِمَلُوࢽْجَ سَمَّا سِمْࢽْجَࢽْ ثِࢽْجِ؞ کُوَ أَدْࢽْ ࢻُوُࢽْ کَرْمُو یٜ بَوُو، لَغَرَࢽْ یٜ بَوُو، کُورُو سُو دِیُو یٜ بَوُو، بُوࢽٜ ࢽجَ یٜ بَوُو، دَلِلْࢽْجُدْ أَوُووَ ثَیٜدْ بَوُورُو وَلْجَࢽَ ࢽَࢽْغَرُو،» یٜࢽُو؞
[5] دَجِ تِ کْلَ کُرِسْ کْرْمَیْیٜࢽْ ࢽَࢻْکَدَمَدْیٜ: «أَکُّو أَوُو سَمَّا بْرِࢽُّو دِیُو دِکِّ!» یٜࢽُو؞ کُورُو وُرُو: «رُوُࢽٜ، أَوُووَ مَࢽَ أَࢽِ أَوُو مْرْسَدُیٜ یٜ، جِرٜ یٜ،» یٜࢽُو؞
[6] کُورُو وَلْدٜ وُرُو: «ثٜرْࢽَ! وُمَ بُرْوُویٜ یٜ، دَرْیٜىٰ یٜ وُو؞ وُمَ بَدِدُرَمْ یٜ، ࢽجٜرُورَمْ یٜ وُو؞ وُ کَمْ ࢽغُدُوَدْرُو سِمْ إِࢽْغِ رُو ࢻَࢽْدُویٜࢽْ دٜرُو کْࢽْجَرُو یِکِّ؞
[7] کَمْ کْࢽَّسَرْ ثُوَࢽْدْࢽَمَدْ أَوُو أَࢽِیَ وَرَسَجِ، کُورُو وُ اللَّهࢽْجُرُو وَلّْکِّ، تِ یٜ تَدَࢽِرُو وَلْجِ؞
[8] أَمَّ أَمْ کُویْوُ سُو، أَمَࢽْ بُووُ سُو، أَمْ حَرَمْغَدَ سُو، کَمْثٜجِ سُو، کْࢽْجْࢽَوُ سُو، بُوکَ سُو، سْࢽْمْغُ سُو، کَتُّوُ کَمْدَوُ سَمَّ سُودْ، ࢽُوَࢽْجَ بْرْمْ کَࢽُّیٜیَ کَوْ کَࢽُّ کِمٜجْغْࢽَیٜیَ؞ أَدْمَ کَرْمُو یِࢽْدِیٜدْ وُو؞»
[9] دَجِ مَلَیْیَ تُلُرْ تَسَ تُلُرْ مَسِوَ تُلُرْ دَرْیٜىٰلَࢽْ ثَسَمْبْرْࢽَ مُکُّوࢽَّدْیٜ ࢻَلْࢽْجَ إِسٜ مَࢽَ سَدّٜ وُرُو: «أَرٜ، ࢽِرُو ࢽجُدُ وُوتّٜ کَمُ تَمَیٜدَ ࢻْلٜࢽْجْغْکِّ،» یٜࢽُو؞
[10] رُحُ اللَّهیٜ وُرُو جْمْسِیٜ وَحَیِلَࢽْ مَلَیْیَدْ کْلَ کَوْ کُرُوُ کُرَ لَایٜرُو سَدٜ بْرْࢽِ تَیِرْ جٜرُجَلٜمْبٜ سَمٜلَࢽْ ࢽَ اللَّهیٜࢽْ جْࢻْثِ ࢻْلٜسٜىٰࢽُو؞
[11] بْرْࢽِدْ دَرَجَ اللَّهیٜیَ ࢽَࢽْغَرُو جَوْرُو ࢽُرَّ أَلَمَ کَوْ تَمَࢽَّ تِیٜࢽْ أَوِ یَیٜ تُرُیْ تِرُو جَسْࢻَ ثَࢽِدْ غَیْ وَرَکْ یِیلْجِ،
[12] کُورُو غَرُ کُرَ یٜ، کُرُوُ یٜ ثِࢽَّ ࢽغَوُورَمْ مٜوُࢽْ یِࢽْدِࢽَّ؞ ثِࢽَّوَدْلَࢽْ مَلَیْیَ مٜوُࢽْ یِࢽْدِࢽْ مبٜجِ، کُورُو ثِࢽَّوَدْلَࢽْ ثُ جِرِ مٜوُࢽْ یِࢽْدِࢽْ تَدَوَ إِسْرَاءِیلَیٜ رُوُوَدَ یٜ مبٜجِ؞
[13] أَدِࢽَّمْلَࢽْ ثِࢽَّ یَکُّ مبٜجِ، یَلَلَࢽْ ثِࢽَّ یَکُّ، أَࢽْمْلَࢽْ ثِࢽَّ یَکُّ، ࢻْدٜلَࢽْ ثِࢽَّ یَکُّ؞
[14] غَرُ بْرْࢽِدْیٜدْ ࢻْرْدُ مٜوُࢽْ یِࢽْدِࢽَّ، کُورُو کْلَࢽْجَࢽْ ثُ مٜوُࢽْ یِࢽْدِࢽْ کْࢽْغَیَمْ مٜوُࢽْ یِࢽْدِࢽْ تَمَدْیٜدْ رُوُوَدَ؞
[15] مَلَیْیَ وُرُو مَࢽَسِیدْ بْرْࢽِدَ ثِࢽَّوَࢽْجُوَ غَرُࢽْجُوَ ࢽغَلْدُرُو مُکُّوࢽْجُࢽْ ࢽغَلْدُرَمْ کَ دِࢽَرّٜیَ؞
[16] بْرْࢽِدْ کْرْکْمْ ثْکْ دٜوُوَ، ࢽَࢽْکُرُوُࢽْجُوَ ࢽَࢽْࢻَرَکْࢽْجُوَ سَمَّ تِلُو؞ مَلَیْیَدْ تِیَ کَ ࢽغَلْدُرَمْࢽْجُࢽْ ࢽغَلْیٜࢽِّیَ، ࢽغَلْ دْوُ مٜوُࢽْ یِࢽْدِࢽْ؞ ࢽَࢽْکُرُوُࢽْجُوَ ࢽَࢽْࢻَرَکْࢽْجُوَ دَدُࢽْجُوَ سَمَّ تِلُو؞
[17] ࢽغَلْ کَمْبٜلَࢽْ، وُوتّٜ ࢽغَلْ مَلَیْیَیٜلَࢽْ ࢻَیْدَدٜ غَرُ بْرْࢽِیٜدَ ࢽغَلْیٜࢽِّیَ، جَ مِیَࢽْ ࢻِدٜوُࢽْ دٜرِ؞
[18] غَرُدْ کَوْ تَمَࢽَّ تِرُو جَسْࢻَ ثَࢽِلَࢽْ تْدَࢽْدْࢽَ، بْرْࢽِدْ یٜ دِࢽَرْ ࢽغَلْوُو، کُدْرَمْ تِیٜࢽْ أَوِ یَیٜ تُرُیْیَ ثَمُࢽْ؞
[19] ࢻْرْدُوَ غَرُ بْرْࢽِدْیٜدْ کَوْ تَمَࢽَّ جِرِ جِرِلَࢽْ جَࢽٜیَدَ؞ بُرْوُویٜدْ کَوْ تَمَࢽَّ جَسْࢻَ ثَࢽِلَࢽْ جَࢽٜیَدَ، یِࢽْدِیٜدْ سَࢻِرْلَࢽْ، یَکُّیٜدْ أَغٜتْلَࢽْ، دٜوُیٜدْ یٜمٜرُودْلَࢽْ،
[20] أُوُیٜدْ أُوࢽِکْلَࢽْ، أَرَکُّیٜدْ کَرْࢽٜلِیَلَࢽْ، تُلُرّٜدْ کْرَسُولَیْلَࢽْ، وُسْکُیٜدْ بِرِلَّࢽْ، لْغَرّٜدْ تُوࢻَسْلَࢽْ، مٜوُیٜدْ کْرَسُوࢻَرَسْلَࢽْ، مٜوُࢽْ تِلُوࢽّٜدْ جَسِࢽْلَࢽْ، مٜوُࢽْ یِࢽْدِࢽّٜدْ أَمَتِسْلَࢽْ؞
[21] ثِࢽَّ مٜوُࢽْ یِࢽْدِࢽْدْ مُرْسَمْ مٜوُࢽْ یِࢽْدِࢽْ، ࢻِࢽْجَ یَیٜ مُرْسَمْ ࢻَلْ؞ ࢻَرْسَمْ بْرْࢽِیٜدْ دِࢽَرْ ࢽغَلْوُو، کُدْرَمْ تِیٜࢽْ أَوِ یَیٜ تُرُیْیَ ثَمُࢽْ؞
[22] بْرْࢽِدْلَࢽْ ࢻَدُو اللَّهیٜ رُکّْࢽِ، أَوُووَ اللَّه کْمَࢽْدٜ مَرْتَوَمَا تَمَادْ تَیِمَ ࢻَدُو اللَّهیٜ بْرْࢽِدْیٜدْ وُو؞
[23] بْرْࢽِدْ ࢽُرْ کْࢽْغَلّٜیَ کُمْبَلّٜیَلَࢽْ مْرَدُࢽْجُ بَوُو، أَوُووَ دَرَجَ اللَّهیٜ ࢽُرْ غَیْ تِیَ وَسّْࢽَ، کُورُو تَمَدْ یٜ ࢻَتْلَࢽْجُ؞
[24] جَمَ دُࢽِیَیٜ سَمَّ ࢽُرْ بْرْࢽِدْیٜدْࢽْ کْࢽْدْغَیْ ثَدِ، کُورُو مَیْیَ دُࢽِیَیٜ یٜ دَرَجَࢽْجَا بْرْࢽِدْرُو ثَوُدِ؞
[25] ثِࢽَّوَ بْرْࢽِیٜدْ کَوْسُ تْمَّرُو جَکْتَیْوَوُو، أَوُووَ بُࢽٜ ࢽَدْࢽْ بَوُو؞
[26] دَرَجَا مَرْتَوَا جَمَ دُࢽِیَیٜ سَمَّا ثُرُودْرُو ثَوُدِ؞
[27] أَوِمَ تَیِرْ غْࢽِ ثُرُودْرُو ࢽغَیِوَوُو، کُورُو کَمْ أَوُو وَادَ دِیُومَ سُو، کَتُّوُمَ سُو یٜ ثُرُودْرُو ࢽغَسَیِوَوُو، سَیْ أَمْ دُوُوࢽْ ثُࢽْجَ ثُرُو کِتَوُ رُویٜ تَمَدْیٜࢽْ رُوُوَدَدْ؞