[1] دَجِ کَࢽْغَلٜ کَ ࢽغَلْدُرَمْ غَیْ سَدٜ وُرُو: «ثِࢽٜ، ࢻَدُو اللَّهیٜیَ لَیَ دُوَدُرَمْدَ ࢽغَلّٜ، کُورُو أَمْ أَمْبْتُّوُوُ ثُرُودْࢽْ دَسَاࢽَدَ کُومّٜ!
[2] أَمَّ بَلْبَلَّ ࢻَدُو اللَّهیٜ دٜیَࢽْ دْغَࢽَدَ کُولّٜ، بَرٜ ࢽغَلّْمِّ، دَلِلْࢽْجُدْ تِیَ مُکُّو جَمَ کْرْدِیَیٜرُو ثَسَکّْࢽَ، کُورُو کْࢽْدَوُ ࢻِدٜوُࢽْ یِࢽْدِࢽُّو بْرْࢽِ تَیِرْدَ غُغُوَثَّیْ ࢽَࢽْغَرُو؞
[3] شٜدَمَࢽِ یِࢽْدِدْرُو کْࢽْدُوُو یِکّٜ کَوُ دْوُࢽْ یٜرْ یِࢽْدِࢽْ ࢻِرَکُّࢽُّو أَجَجَ لُوَدَا ࢽَوِࢽَوِ ثَدِ،» یٜࢽُو؞
[4] شٜدَمَ یِࢽْدِ أَࢽِ، تَیِمَ یَ جَیْتُࢽّٜ یِࢽْدِیَ ࢻَتْلَ یِࢽْدِیَ ࢻُوُ کْمَ دُࢽِیَیٜࢽْ دَسَاࢽَدْ وُو؞
[5] کَمْ لَا تَیِیَ بَسَرْدُ ثْرَاࢽَا، کَࢽُّ ثِࢽْجَࢽْ ثُلُوٜ کْلَدُووَࢽْجَا رْمْسْ جُوُیْ؞ کَمْ لَا تَیِیَ بَسَرْدُ ثْرَاࢽَا، دُولٜ جِرِ أَدْغَیْࢽِࢽْ ࢽُیْ؞
[6] تَیِ یِࢽْدِ أَࢽِ ࢽَࢽْجَࢽْ کْࢽْدُوُو سَمٜیَ جَکْتُیٜ مبٜجِ، بَرٜ جَمَࢽْ ࢽَوِࢽَوِࢽْجَیٜدْࢽْ إِࢽْغِ سَمٜىٰ ثُدُرْࢽِّرُو، کُورُو کْࢽْدُوُوࢽْجَ سَ ثَرَاࢽَلَࢽْ إِࢽْغِیَ بُرُو کَلَکْتُیٜیَ دُࢽِیَرُو مَسِوَ جِرِ ࢻِ یَیٜ کُدُویٜیَ مبٜجِ؞
[7] سَ شٜدَࢽْجَ ࢽجُودْ ثٜرِیَ، بُࢽْدِ دُوُوࢽْ بْلَا دَدُرَمْ بَوُووَلَࢽْ ثُلُوِمَدْ تَیِرُو کْرِوُ ثْکَّدٜ ࢽَسَرْدٜ تَیِیَ رُورُو ثٜجِ؞
[8] کَمِࢽّجَدَ ࢻَرْسَمْ بْرْࢽِ کُرَیٜلَࢽْ کُولْجَغَیْ، بْرْࢽِ دُوُوࢽْ تِرُو مِسَلُّو سُودُومْبَ مَسَرَّ ثَࢽِ، ࢽَ کْمَࢽْجَدَ کْسْکَرُو جَجَغَࢽٜ ثٜىٰسْࢽَدْ؞
[9] أَدْغَیْمَ أَمْ جَمَیٜ سُو، جِرِیَیٜ سُو، تْلَمْبَیٜ سُو، لَرْدُوَیٜ سُو کَمِࢽّجَدَ کَوُ یَکُّ رٜدَارُو ثَرُࢽٜ سِتّْرَدُ وَجَیْ؞
[10] أَمْ دُࢽِیَیٜ کَرْمُوࢽْجَیٜ جَوْرُو کْجِ ࢻَࢽْجَیْ، ࢽغْمْرِ کَرْوُکْجِیٜ ثَدِ، کُورُو کَتّٜࢽْجَ یٜࢽْ کْࢽْجُوسُو ثَدِ، دَلِلْࢽْجُدْ ࢽَوِیَ یِࢽْدِ أَࢽِ تَیِرُو أَجَوُ غْࢽَجَاࢽَ ࢽَࢽْغَرُو؞
[11] أَمَّ ࢽغَوُو کَوُ یَکُّ رٜدَا أَࢽِیٜࢽْ اللَّه تَیِرُو رُو ࢻُجِیٜ ثِجَࢽٜ دَیٜرَ، کُورُو أَمْ تَیِیَ ثَرُࢽَ سَمَّ جَوْرُو رِیٜرَ؞
[12] دَجِ کُواْ دُࢽُووَ لَا سَمٜلَࢽْ ࢽُکْثٜ تَیِرُو: «أَرُواْ ࢽَ أَدْرُو تَدُّواْ!» ثْࢽِ ࢻَࢽْغٜرَ؞ کْلَدُووَࢽْجَ تَیِیَ ثَرُیْ ࢽغَیْ دُوُوࢽْ، ثُرُو ࢻُوࢻُووْیٜࢽْ سَمٜرُو تَکّٜرَ؞
[13] سَدْمَࢽْ ثِدِ جَوْرُو لُولُوجٜ بْرْࢽِدْیٜ ثِ ࢻَلْ ثُرُو مٜوُیٜࢽْ وُرْدٜ أَمْ دْوُ تُلُرْ کَسُࢽُو؞ أَمْ غَࢻْثَࢽَدْ کَرْوُࢽْجَ تَیْ دَجٜ کَمْدٜ اللَّه مَیْ سَمٜمَرُو دَرَجَ کٜدُو؞
[14] مَسِوَ یِࢽْدِیٜدْ کُوجْࢽَ، أَکُّو مَسِوَ یَکُّیٜدْ ࢽَغَتُّو إِسِ؞
[15] مَلَیْیَ تُلُرّٜدْ ࢻُیٜࢽُو، کُورُو کُواْ دُࢽُووَ دُࢽُووَ لَا سَمٜلَࢽْ ࢽُکْثَࢽٜ: «کْرْمَیْ دُࢽِیَیٜدْ کْمَࢽْدٜىٰیَ أَلْمَسِیوُࢽْجُیٜیَرُو وَلْیٜࢽُو، کُورُو حَرْ أَبَدَ أَبَدِࢽُّو کْرْمَیْ ثُࢽُودِ،» یٜرَ؞
[16] أَمْوُرَوَ ࢻِࢽْدِ دٜرِ ࢻُوُ اللَّهیٜࢽْ کْلَ کُرِسْࢽْجَ کْرْمَیْیٜࢽْ ࢽَࢻْکَدَدْ تْمْدَࢽٜ ࢽغُمْࢽْجَ ثِدِࢽْ غْࢽَجَࢽٜ اللَّهرُو أَمْبْثَّغَࢽٜ
[17] تِرُو: «کْمَࢽْدٜ اللَّه مَرْتَوَمَ، ࢽِ کُرٜ یٜࢽْ دْغَمَّ، کْرْمَ یٜ مبٜجِدْ، وُسٜࢽْجِیٜࢽَ، أَوُووَ کْࢽْدُوُوࢽْمْ دُࢽُووَ ࢽغُوࢽْمٜ کْرْمَیْࢽْمْ ࢽُودُو بَدِࢽْمَّ؞
[18] جَمَ کْرْدِیَیٜ غْرْغَجْࢽَ، أَمَّ سَ غْرْغَدُࢽْمْبٜدْ إِسْࢽَ؞ آه، سَ أَمْ سَࢽُࢽَرُو شَرَ ࢽجْدُّویٜ ثْدْࢽَ، سَ دُوُوࢽْ وُولُودِیَࢽْمْ ࢽَوِیَدَ مُمِࢽَّدَ أَمْ ثُࢽْمْ رِجَࢽٜ ࢽجَاࢽَ کُرَࢽْ غَࢽَࢽْ سَمَّارُو مُکُووَ یِمٜ أَمْ دُࢽِیَ بَࢽَّجَࢽَدَ سِدُوُیٜدْ!» یٜرَ؞
[19] دَجِ ࢻَدُو اللَّهیٜ سَمٜلَࢽْ دْغَࢽَدْ ࢻْرْمْدٜ سَࢽْدُوُ أَمَࢽّجُیٜدْ ࢻَدُو اللَّهیٜࢽْ تُرُیْ کْرْغَ؞ سَدْمَࢽْ دُࢽِیَ یٜ ثُوَلْدِ، کُواْ لَا یٜ ࢽُکْثَیْ، کٜىٰرَ یٜ غْغْرْجِ، ثِدِ یٜ لُولُوجِ، کُورُو مَࢻِ کُرَ کُرَ یٜ ثُدُرِ؞