[1] Lò-pô-ôn to Sṳ-kiam hi; Yî-set-lie̍t-ngìn chhiòn-phu chhi-si̍p chhai ke-vi, oi sat-li̍p kì cho vòng.
[2] Nì-pat ke lai-é Yâ-lò-pô-ôn yîn-vi sám Só-lò-mùn-vòng thò-to Âi-khi̍p hi; kì yit thâng-tó Lò-pô-ôn cho vòng ke sêu-sit, chhiu tui Âi-khi̍p kón chón-lòi.
[3] Pet-phu kî-chhu̍k ke ngìn-mìn phai-ngìn hi chhiáng kì lòi, yèn-heu lâu kì khiung-ha hi kien Lò-pô-ôn, tui kì kóng:
[4] “Ngiâ-pâ Só-lò-mùn sṳ́ ngài-têu pà chhûng-tâm. Na-he ngì kám-khiâng ngài-têu ke fu-tâm, pûn ngài-têu ke sên-fa̍t ko-tet hi, ngài-têu chhiu fu̍k-sṳ ngì.”
[5] Lò-pô-ôn kóng: “Sâm-ngit yî-heu chai ko-lòi, ngài voi fì-tap ngì-têu.” Só-yî kì-têu chhiu lì-khôi.
[6] Lò-pô-ôn-vòng mun kí-ke ngièn-ló ke yi-kien; kì-têu sṳt cho-ko kiâ-pâ Só-lò-mùn-vòng ke ku-mun. Kì mun kì-têu: “Ngì-têu sióng ngài yin-kôi ngióng-pân fì-tap liá-têu ngìn nè?”
[7] Kì-têu kóng: “Na-he ngì sióng-oi hó-hó vi ngìn-mìn fu̍k-vu, fì-tap kì-têu ke sṳ̀ oi kóng hó-fa, kì-têu chhiu voi yún-yén cho ngì ke nù-phu̍k.”
[8] Chúng-he, Lò-pô-ôn m̀-tap liá-têu ngièn-ló ke khien-va, fán-chón hi chhìm ke-têu lâu kì khiung-ha thai ke heu-sâng ngìn; kì-têu liá-ha cho kì ke ku-mun.
[9] Lò-pô-ôn mun kì-têu: “Ngì-têu yû má-ke kien-ngi? Ke-têu ngìn-mìn yêu-khiù ngài kám-khiâng kì-têu ke fu-tâm, ngài yin-kôi ngióng-pân fì-tap kì-têu nè?”
[10] Kì-têu kóng: “Ngì cho-tet án-ngiòng lâu kì-têu kóng: ‘Ngài ke sú-chṳ́-mî pí ngâ-pâ ke yêu-sṳ̂n hàn-kha chhû!
[11] Ngâ-pâ pûn ngì-têu chhûng-tâm, ngài oi pûn ngì-têu hàn-kha chhûng ke tâm-thèu. Ngâ-pâ yung phì-piên tá ngì-têu, ngài oi yung tai kiêu-é ke phì-piên tá ngì-têu!’ ”
[12] Sâm-ngit yî-heu, Yâ-lò-pô-ôn lâu só-yû ngìn-mìn cheu Lò-pô-ôn-vòng ke chṳ́-sṳ, yu to kì mien-chhièn.
[13] Vòng m̀-thâng ngièn-ló ke kien-ngi, fán-chón cheu heu-sâng ngìn ke kien-ngi tui ngìn-mìn kóng tông-ngiàm ke fa. Kì kóng: “Ngâ-pâ pûn ngì-têu chhûng-tâm, ngài oi pûn ngì-têu hàn-kha chhûng ke tâm-thèu. Ngâ-pâ yung phì-piên tá ngì-têu, ngài oi yung tai kiêu-é ke phì-piên tá ngì-têu!”
[15] Vòng m̀-tap ngìn-mìn ke yêu-khiù; chúng-he liá he Song-chú ke chṳ́-yi, oi sṳ̍t-hien Kì thûng-ko Sṳ-lò-ngìn siên-tî Â-hî-ngâ tui Nì-pat ke lai-é Yâ-lò-pô-ôn só-kóng ke fa.
[16] Yî-set-lie̍t ngìn-mìn khon-tó vòng m̀ chiap-na̍p kì-têu ke yêu-khiù chhiu thai-sâng hêm-kóng: “Chhai Thai-ví-kâ ngài-têu son má-ke? Yâ-sî ke lai-é tui ngài-têu yû má-ke hó-chhu? Yî-set-lie̍t-ngìn â, ngài-têu lòi-hi chón! Thai-ví-kâ â, chhṳ-kâ pó-chhung ô!” Só-yî, Yî-set-lie̍t ngìn-mìn chho-fán, chón vuk-hâ hi.
[17] Chúng-he he̍t chhai Yù-thai thi-khî ke Yî-set-lie̍t-ngìn, Lò-pô-ôn hàn-he cho kì-têu ke vòng.
[18] Lò-pô-ôn-vòng phai khú-kûng ke chúng-kón Â-tô-làn to Yî-set-lie̍t-ngìn ke-vi hi, Yî-set-lie̍t-ngìn sa yung sa̍k-thèu chiông kì te̍p-sí. Liá-sṳ̀, Lò-pô-ôn-vòng kón-kín sông chan-chhâ, sia chón-hi Yâ-lu-sat-lâng.
[19] Tui án-ngiòng, pet-koet Yî-set-lie̍t ke ngìn-mìn yit-chhṳ̍t fán Thai-ví ke kâ-chhu̍k.
[20] Yî-set-lie̍t ngìn-mìn thâng-kóng Yâ-lò-pô-ôn tui Âi-khi̍p chón-lòi lé, chhiu chhiáng kì hi fu yit-ke mìn-chung thai-fi, sat-li̍p kì cho Yî-set-lie̍t-vòng. Chṳ́-yû Yù-thai yit kî-chhu̍k hàn-he tui Thai-ví ke heu-thoi chhin chûng-sîm.
[21] Lò-pô-ôn yit-to Yâ-lu-sat-lâng chhiu seu-si̍p Yù-thai lâu Phien-ngâ-mén kî-chhu̍k chui yû-siu ke kiûn-chhui sṳ̍p-pat van-ngìn, oi hi kûng-tá Yî-set-lie̍t, chhióng-chón kì — Só-lò-mùn ke lai-é tui pet-phu kî-chhu̍k ke khúng-chṳ.
[22] Chúng-he Song-ti lâu sṳ̀n-ngìn Sṳ-mâ-ngâ kóng:
[23] “Ngì hi tui Só-lò-mùn ke lai-é Yù-thai-vòng Lò-pô-ôn lâu só-yû Yù-thai, Phien-ngâ-mén kî-chhu̍k, pin khì-thâ ke ngìn-mìn kóng:
[24] ‘Song-chú án-ngiòng kóng: M̀-hó hi kûng-tá ngì-têu ke hiûng-thi Yî-set-lie̍t-ngìn. Ngì-têu chhiòn-phu chón-hi! Liá-pái só fat-sên ke sṳ he chhut-yì Ngài.’ ” Kì-têu chhiu thâng-chhiùng Song-chú ke min-lin, chhiòn-phu chón vuk-hâ hi.
[25] Yî-set-lie̍t-vòng Yâ-lò-pô-ôn chhai Yî-fap-lièn sân-khî ke Sṳ-kiam hí fòng-phi kûng-sṳ, he̍t chhai ke-vi yit-chham sṳ̀-kiên. Heu-lòi, kì lì-khôi ke-sàng, yu chhai Pí-nú-yî-le̍t hí fòng-phi kûng-sṳ.
[26] Yâ-lò-pô-ôn sîm-tú sióng: “Cheu muk-chhièn ke chhìn-hìn khon, na-he ngài ke ngìn-mìn sông Yâ-lu-sat-lâng hi, chhai ke-vi ke sṳn-thien hiong Song-chú hien-chi, kì-têu voi pien-sîm hi tui Yù-thai-vòng Lò-pô-ôn chhin-chûng, yu voi lòi chhṳ̀ ngài. Án-ngiòng, ngài ke koet voi kûi Thai-ví ke heu-thoi.”
[28] Yâ-lò-pô-ôn-vòng chhâm-siòng ko, chhiu kiet-thin chu-chho lióng-chak kîm-ngiù, yèn-heu tui ngìn-mìn kóng: “Ngì-têu hi Yâ-lu-sat-lâng kin-pai thet sîn-khú lé. Yî-set-lie̍t ngìn-mìn â, liá chhiu-he thu ngì-têu chhut Âi-khi̍p ke sṳ̀n-mìn!”
[29] Yâ-lò-pô-ôn chiông yit-chak kîm-ngiù piong chhai Pak-thi̍t-li, nang-ngoi yit-chak piong chhai Tan.
[30] Liá chhiu sàng-cho ngìn-mìn fam-chhui ke ngièn-yîn, yîn-vi kì-têu to Pak-thi̍t-li lâu Tan hi-pai kîm-ngiù.
[31] Yâ-lò-pô-ôn yu chhai sân-kông táng hí chi-pai ke sṳ̀n-meu, sṳm-chṳ tui Li-vi kî-chhu̍k yî-ngoi ke ngìn sién-chhut chi-sṳ̂.
[32] Yâ-lò-pô-ôn yu thin pat-ngie̍t sṳ̍p-ńg cho chûng-kau chiet-khì, chhiong chhai Yù-thai ke chiet-khì khiung-yong. Kì chhai Pak-thi̍t-li chi-thàn táng hiong kì chu-chho ke kîm-ngiù hien-chi, yu chhai Pak-thi̍t-li sién-li̍p chi-sṳ̂, oi kì-têu chhai kì só-hí ke sṳ̀n-meu sṳ-fung.
[33] Yâ-lò-pô-ôn chhai pat-ngie̍t sṳ̍p-ńg, chhiu-he kì chhṳ-kâ vi Yî-set-lie̍t ngìn-mìn sién-thin ke chiet-khì, hi Pak-thi̍t-li, chhai chi-thàn táng sêu-hiông.