[1] Só-lò-mùn-vòng hí Song-chú ke sṳn-thien, vòng-kiûng lâu kì só-oi hí ke khì-thâ fòng-vuk yî-heu,
[2] Song-chú chai yit-pái hiong kì hién-hien, chhiong yî-chhièn chhai Kî-phiên hiong kì hién-hien khiung-yong.
[3] Song-chú tui kì kóng: “Ngài yí-kîn thâng ngì ke khì-tó. Ngài chiông ngì hí ke liá sṳn-thien fûn-phe̍t vì-sṳn, sàng-cho yún-yén kin-pai Ngài ke thi-fông; Ngài voi sòng-sòng chhai liá-vi khon-ku kì, koân-sîm kì.
[4] Na-he ngì chhiong ngiâ-pâ Thai-ví khiung-yong sṳ̀n-sîm sṳ̀n-yi lòi fu̍k-sṳ Ngài, chûn-sú Ngài ke fap-li̍t, cheu Ngài ke min-lin hi-cho,
[5] Ngài yit-thin voi kiên-ku ngì Yî-set-lie̍t ke vòng-vi, cheu Ngài hiong ngiâ-pâ Thai-ví só yin-hí ke, pûn kiâ heu-thoi ke vòng-vi m̀-voi thôn-thet, voi yún-yén thúng-chhṳ Yî-set-lie̍t.
[6] Na-he ngì-têu lâu ngì-têu ke heu-thoi vat-thèu lì-khôi Ngài, m̀ chûn-sú Ngài pûn ngì-têu ke fap-li̍t lâu kie-min, hi kin-pai phe̍t ke sṳ̀n,
[7] Ngài voi chiông Ngài ke chṳ́-mìn Yî-set-lie̍t tui Ngài su-pûn kì-têu ke thú-thi song vok chhut-hi, yu fit-thet liá-chho Ngài sṳt fûn-phe̍t vì-sṳn, sàng-cho kin-pai Ngài ke sṳn-thien. Van-mìn voi chhṳ́-seu Yî-set-lie̍t, khon-khiâng kì-têu.
[8] Liá sṳn-thien chiông-lòi voi sàng-cho fông-phû; ko-lu ngìn chhiòn-phu voi chho̍k-kiâng, sâu-nat kóng: ‘Song-chú cho-má-ke án-ngiòng khoán-thai liá-koet lâu liá sṳn-thien nè?’
[9] Ngìn voi en-kóng: ‘Yîn-vi kì-têu lì-khôi Song-chú — kì-têu ke Song-ti. Song-chú sṳt thu kì-têu ke chú-siên tui Âi-khi̍p chhut-lòi, kì-têu fán-chón hi chhîn-khiun, fu̍k-sṳ, kin-pai phe̍t ke sṳ̀n-mìn, só-yî Song-chú kong liá yit-chhiet châi-nan pûn kì-têu.’ ”
[10] Só-lò-mùn yung ngi-sṳ̍p ngièn ke sṳ̀-kiên hí Song-chú ke sṳn-thien lâu vòng-kiûng.
[11] Thai-ngì ke vòng Hî-làn kiûng-kip Só-lò-mùn só sî-yeu ke hiông-pak-su, chhiùng-su lâu kûng-chhàng sî-yeu ke kîm-é. Vàn-kûng yî-heu, Só-lò-mùn-vòng chhiu chiông Kâ-li-li thi-khî ke ngi-sṳ̍p chho sàng pûn Hî-làn.
[12] Hî-làn tui Thai-ngì lòi khon Só-lò-mùn pûn kì ke-têu sàng, tông m̀ mân-yi,
[13] chhiu tui Só-lò-mùn kóng: “Hiûng-thi â, ngì pûn ngài ke liá-têu sàng-sṳ son má-ke?” Só-yî ke thi-khî to kîm-pû-ngit hàn-he ham-cho Kâ-phu-le̍t.
[14] Hî-làn pûn Só-lò-mùn ke kîm-é thai-yok yû si-chhiên kûng-kîn.
[15] Só-lò-mùn-vòng ham kûng-ngìn lòi hí sṳn-thien lâu vòng-kiûng, yu thùn-phiàng sàng-tûng ke tâi-vô thi, hí Yâ-lu-sat-lâng sàng-chhiòng. Kì ya yung liá-têu kûng-ngìn chhùng-kien Ha-só, Mí-kit-tô, lâu Kî-set ke-têu sàng.
[16] (Yî-chhièn Âi-khi̍p-vòng lòi kûng-tá Kî-set, cham-liâng kì, chiông sàng-nui ke Kâ-nàm-ngìn chhṳ̀-thet, yu piong-fó sêu-sàng. Heu-lòi, kiâ moi-é ka-pûn Só-lò-mùn ke sṳ̀, kì chhiu chiông liá-sàng cho ka-chông sung-pûn kiâ moi-é.
[17] Só-lò-mùn chhiu chhùng-kien Kî-set.) Kì yu hí Hâ Pak-Fò-lùn,
[18] Pâ-lâ, Yù-thai khóng-yâ ke Tha̍t-mo̍k,
[19] tún fo-vu̍t ke sàng-sṳ, piong chan-chhâ lâu chan-mâ ke sàng-sṳ, pin vàn-sṳ̀n chhai Yâ-lu-sat-lâng, Lì-pâ-nun lâu koet-nui só-yû thi-fông kì só-oi cho ke kûng-chhàng.
[20] Só-lò-mùn ham ke kûng-ngìn he Kâ-nàm-ngìn ke heu-thoi, chhiu-he Yî-set-lie̍t-ngìn chṳ̂n-fu̍k Kâ-nàm-thi ke sṳ̀ mò chhṳ̀-chhiang ke-têu ngìn ke heu-thoi. Ke-têu ngìn-chûng yû Â-mô-li-ngìn, Het-ngìn, Pí-li-sé-ngìn, Hî-vi-ngìn lâu Yâ-pu-sṳ̂-ngìn. Kì-têu ke heu-thoi to liá-ha hàn-he cho nù-chhòi.
[22] Só-lò-mùn mò sṳ́ Yî-set-lie̍t-ngìn cho nù-chhòi, chṳ́-yû ham kì-têu cho chan-sṳ, kôn-chóng, chiông-kiûn, kiûn-chóng, chan-chhâ-chóng lâu khì-pîn.
[23] Só-lò-mùn yû ńg-pak ńg-sṳ̍p ke kam-kûng, kam-tuk kûng-ngìn cho kok-chúng kien-chuk kûng-chhàng.
[24] Só-lò-mùn ke pû-ngiòng — Âi-khi̍p-vòng ke moi-é, tui Thai-ví-sàng pân-to Só-lò-mùn vi kì sîn-hí ke vòng-kiûng yî-heu, Só-lò-mùn chiông sàng-tûng ke tâi-vô thi thùn-phiàng.
[25] Só-lò-mùn yit-ngièn sâm-pái chhai kì vi Song-chú hí ke chi-thàn táng hien sêu-fa-chi lâu phìn-ôn-chi. Kì ya hiong Song-chú sêu-hiông. Án-ngiòng, kì vàn-sṳ̀n hí sṳn-thien ke kûng-chhàng.
[26] Só-lò-mùn-vòng yu chhai Yî-tûng thi-khî Fùng-hói sùn-thèu vá-khiun Yî-luk ke Yî-sùn-Kâ-phe̍t chho liáu thai-sòn, piên-sṳ̀n sòn-chhui.
[27] Hî-làn-vòng phai kì yû kîn-ngiam ke sòn-yèn chhut-hi, lâu Só-lò-mùn ke phu-ha khiung-ha hàng-sòn.
[28] Kì-têu hàng-sòn to Ngò-fî, tui ke-vi tet-tó thai-yok yit-van si-chhiên kûng-kîn ke kîm-é, chhiu yun chón-lòi pûn Só-lò-mùn-vòng.