[1] Só-lò-mùn lâu Âi-khi̍p-vòng kiet-mèn, thó Âi-khi̍p-vòng ke moi-é cho pû-ngiòng. Kì màng hí chhṳ-kâ he̍t ke vòng-kiûng, Song-chú ke sṳn-thien lâu Yâ-lu-sat-lâng chû-vì ke sàng-chhiòng yî-chhièn, kì yit-chhṳ̍t pûn Âi-khi̍p kûng-chú he̍t chhai Thai-ví-sàng tú.
[2] Song-chú ke sṳn-thien hàn-màng hí ke sṳ̀, ngìn-mìn chhai sân-kông táng hien-chi.
[3] Só-lò-mùn kin-oi Song-chú, cheu kiâ-pâ Thai-ví ke hiun-sṳ hàng-sṳ, chúng-he kì hàn-he chhai tak-vi sân-kông táng hien-chi sêu-hiông.
[4] Yû yit-pái, Só-lò-mùn-vòng to Kî-phiên hien-chi, yîn-vi ke sân-kông táng ke chi-thàn he chui chhut-miàng ke. Kì chhai ke-vi hien yit-chhiên chak sêu-fa-chi.
[5] Ke am-pû, Song-chú chhai mung-chûng hiong kì hién-hien, mun kì: “Ngì oi khiù Ngài su-pûn ngì má-ke?”
[6] Só-lò-mùn en-kóng: “Ngì yit-chhṳ̍t yung ví-thai ke chhṳ̀-oi khoán-thai Ngì ke phu̍k-ngìn — ngâ-pâ Thai-ví, yîn-vi kì tui Ngì chûng-sîm, sṳ̀n-sṳ̍t, yû chṳn-chhṳ̍t ke sîm. To liá-ha, Ngì hàn-he yung liá-chúng ví-thai ke chhṳ̀-oi khoán-thai kì, su-pûn kì yit-ke lai-é kîm-pû-ngit chhô chhai kì ke vòng-vi.
[7] Song-chú — ngài ke Song-ti â, sûi-yèn phu̍k-ngìn hàn heu-sâng, m̀-tî ngióng-pân chhṳ-lî koet-kâ, chúng-he Ngì pûn ngài sṳ̀n-chiap ngâ-pâ Thai-ví cho vòng.
[8] Phu̍k-ngìn chhai Ngì só kién-sién ke ngìn-mìn tông-chûng cho vòng; kì-têu ke ngìn-su tô-to mò fap-thu son.
[9] Só-yî, khiù Ngì su-pûn phu̍k-ngìn yû chṳ-fi, sṳ́ ngài yû nèn-li̍t vi kì-têu ton sṳ-fî, pûn hó-fái; na-mò, ngài ngióng-pân cho-tet thúng-chhṳ Ngì án-tô ke ngìn-mìn?”
[10] Chú Song-ti fôn-hí Só-lò-mùn ke khì-khiù,
[11] chhiu tui kì kóng: “Yîn-vi ngì mò vi chhṳ-kâ khiù chhòng-su, khiù chhòi-fu, ya-he khiù sêu-me̍t thi̍t-ngìn, fán-chón khiù ton sṳ-fî ke chṳ-fi, voi yung kûng-ngi chhṳ-lî ngìn-mìn,
[12] só-yî Ngài oi cheu ngì só-khiù ke pûn ngì. Ngài oi su-pûn ngì chhûng-mìn chṳ-fi; liá he yî-chhièn ke ngìn só mò ke, yî-heu ke ngìn ya m̀-voi chai-yû.
[13] Ngì mò-khiù ke, Ngài ya oi su-pûn ngì; ngì yit-sên hióng-su ke yùng-fà fu-kui, chhai lie̍t-vòng chûng mò yit-ke cho-tet lâu ngì pí.
[14] Ngì na sun-chhiùng Ngài, chûn-hàng Ngài ke fap-li̍t lâu kie-min, chhiong ngiâ-pâ Thai-ví khiung-yong, Ngài voi su-pûn ngì chhòng-su.”
[15] Só-lò-mùn soi-siáng, tî Song-ti chhai mung-chûng hiong kì kóng-fa. Só-yî kì to Yâ-lu-sat-lâng hi, khî chhai Song-chú ke yok-khui chhièn, hien sêu-fa-chi lâu phìn-ôn-chi, yèn-heu pài yèn-si̍t khoán-thai kì só-yû ke kôn-yèn.
[16] Yû yit-ngit, yû lióng-ke kî-ńg lòi kien Só-lò-mùn-vòng, khî chhai kì mien-chhièn.
[17] Yit-ke kóng: “Ngâ chú â, liá fu-ngìn-kâ lâu ngài khiung-ha he̍t chhai yit-kiên vuk-tú; ngài chhai vuk-hâ kiung se-ngìn-è ke sṳ̀, kì ya chhai ke-vi.
[18] Ngài kiung yit-ke se-lai-é; lióng ngit-heu kì ya kiung yit-ke se-lai-é. Liá vuk-tú chṳ́-yû ngài lióng-sà, mò phe̍t-ngìn.
[19] Yû yit am-pû, kì mò chu-yi, sa chak-sí chhṳ-kâ ke se-ngìn-è.
[20] Kì chhiu pan-ya hong-hí-lòi, chhai ngài tông hó-soi ke sṳ̀ tui ngâ sṳ̂n-piên nám-chéu ngài ke lai-é, piong chhai kì ke hiûng-chhièn, yèn-heu chiông kì sí-thet ke se-ngìn-è piong chhai ngài hiûng-chhièn.
[21] Thi-ngi chêu-sṳ̀n, ngài hong-hí-lòi oi pûn se-ngìn-è sṳ̍t-nen, fat-hien kì yí-kîn sí-thet; ngài siòng-se khon, ngièn-lòi liá-ke m̀-he ngài kiung ke se-ngìn-è.”
[22] Nang-ngoi yit-ke fu-ngìn-kâ kóng: “M̀-chho̍k! Hàn-sâng ke se-ngìn-è he ngài ke, sí ke chang he ngì ke!” Thi-yit ke fu-ngìn-kâ en-kóng: “M̀-chho̍k! Sí ke se-ngìn-è he ngì ke, hàn-sâng ke chang he ngài ke!” Kì-têu chhai vòng mien-chhièn chhiu án-ngiòng chhàu lòi chhàu hi.
[23] Só-lò-mùn-vòng sîm-tú sióng: “Kì-têu lióng-sà chhiòn-phu kóng hàn-sâng ke se-ngìn-è he chhṳ-kâ ke, sí ke he tui-fông ke.”
[24] Só-yî kì kóng: “Nâ tô-é lòi!” Phu-ha chhiu chiông tô-é nâ-lòi.
[25] Vòng ha-lin kóng: “Chiông liá hàn-sâng ke se-ngìn-è pho-cho lióng-sak, yit-sak pûn liá fu-ngìn-kâ, yit-sak pûn ke fu-ngìn-kâ.”
[26] Ke hàn-sâng ke se-ngìn-è ke â-mê yîn-vi siak chhṳ-kâ ke lai-é, chhiu tui vòng kóng: “Ngâ chú â, chhiên-van m̀-hó chhṳ̀ liá se-ngìn-è! Khiù ngì chiông kì kâu-pûn ke fu-ngìn-kâ hó lé!” Chúng-he nang-ngoi yit-ke fu-ngìn-kâ kóng: “M̀-sṳ́ pûn ngài, ya m̀-hó pûn kì, chiông liá se-ngìn-è pho-cho lióng-sak!”
[27] Só-lò-mùn-vòng kóng: “M̀-hó chhṳ̀ liá se-ngìn-è! Chiông kì kâu-pûn thi-yit ke fu-ngìn-kâ, yîn-vi kì chang he se-ngìn-è ke â-mê.”
[28] Yî-set-lie̍t ngìn-mìn thâng-tó Só-lò-mùn-vòng án-ngiòng ke kiet-chhài, chhiòn-phu tông phi-fu̍k kì; yîn-vi kì-têu tî Song-ti su-pûn kì chṳ-fi, yû nèn-li̍t sṳ́m-phan on-é.