[1] Só-lò-mùn-vòng he chhiòn Yî-set-lie̍t ke vòng;
[2] kiâ kôn-yèn ke miàng ki chhai hâ-poi: Thai-chi-sṳ̂: Sat-tuk ke lai-é Â-sat-li-ngâ.
[3] Vòng-sṳt sû-ki: Sṳ-sâ ke lai-é Yî-li-hò-lie̍t lâu Â-hî-â. Li̍t-sṳ́-kôn: Â-hî-li̍t ke lai-é Yok-sâ-fap.
[4] Ngièn-soi: Yâ-hò-yâ-thai ke lai-é Pí-nâ-ngâ. Chi-sṳ̂: Sat-tuk lâu Â-pí-â-thâ.
[5] Chúng-tuk-chóng: Nâ-tân ke lai-é Â-sat-li-ngâ. Vòng-sṳt ku-mun: Nâ-tân ke lai-é chi-sṳ̂ Sat-pu-tet.
[6] Vòng-kiûng phu̍k-ngìn chúng-kón: Â-hî-sat. Khú-kûng ke chúng-kón: Â-pí-thai ke lai-é Â-tô-nì-làn.
[7] Só-lò-mùn sat-li̍p sṳ̍p-ngi ke ngìn chhai Yî-set-lie̍t tak só-chhai cho thi-khî chúng-tuk. Kì-têu yit-thin oi tui só kón ke thi-khî kiûng-kip sṳ̍t-vu̍t pûn vòng lâu vòng ke kâ-chhu̍k; tak-khî chúng-tuk tak-ngièn fu-chit yit-chak ngie̍t.
[8] Liá sṳ̍p-ngi thi-khî ke chúng-tuk lâu kì-têu ke kón-khî ki chhai hâ-poi: Phien-Fu-ngí: kón-khî he Yî-fap-lièn sân-khî.
[9] Phien-Tí-kap: kón-khî he Mâ-kâ-sṳ̂, Sâ-pîn, Pak-Sṳ-ma̍k, Yî-lùn-Pak-Ha̍p-làn liá-têu sàng.
[10] Phien-Hî-sit: kón-khî he Â-lû-pok lâu Sô-kô lióng-sàng, pin chhiòn-phu Hî-fut thi-khî.
[11] Thó Só-lò-mùn moi-é Thâ-fap cho pû-ngiòng ke Phien-Â-pí-nâ-tha̍t: kón-khî he Tô-ngí chhiòn-thi.
[12] Â-hî-li̍t ke lai-é Pâ-nâ: kón-khî he Thâ-na̍p, Mí-kit-tô lióng-sàng, lâu vá-khiun Pak-San, Sat-lâ-tan, Yâ-sṳ̂-lie̍t nàm-phién ke chhiòn-phu thi-khî, chhṳ̍t-to Â-pak-Mí-hò-lâ-sàng lâu Yok-ngiam-sàng.
[13] Phien-Kî-phe̍t: kón-khî he Kî-lie̍t ke Lâ-ma̍t-sàng, lâu chhai Kî-lie̍t su̍k Mâ-nâ-sî chṳ́-sûn Ngài-ngí chûng-chhu̍k ke chhûn-chông, lâu Pâ-sân ke Â-ngí-kô-pak thi-khî, khiung liuk-sṳ̍p ke thai-chṳ́n, chhiòn-phu yû sàng-chhiòng lâu thùng mùn-chhôn.
[14] Yi̍t-tô ke lai-é Â-hî-nâ-tha̍t: kón-khî he Mâ-ha̍p-ngiam thi-khî.
[15] Thó Só-lò-mùn nang-ngoi yit-ke moi-é Pâ-sṳ̍t-mat cho pû-ngiòng ke Â-hî-mâ-sṳ̂: kón-khî he Nâ-fut-thâ-li thi-khî.
[16] Fu-chhî ke lai-é Pâ-nâ: kón-khî he Â-sat lâu Pí-â-liu̍k-chṳ́n.
[17] Pha-lu-â ke lai-é Yok-sâ-fap: kón-khî he Yî-sat-kâ thi-khî.
[18] Yî-lâ ke lai-é Sṳ-mî: kón-khî he Phien-ngâ-mén thi-khî.
[19] Vû-li ke lai-é Kî-phe̍t: kón-khî he Kî-lie̍t thi-khî, chhiu-he yî-chhièn Â-mô-li-vòng Sî-fèn lâu Pâ-sân-vòng Ngo̍k kón ke só-chhai. Chhù-liáu liá sṳ̍p-ngi ke thi-khî chúng-tuk yî-ngoi, yû yit-ke chúng-tuk-chóng chúng-kón chhiòn-phu thi-khî.
[20] Yù-thai lâu Yî-set-lie̍t ke ngìn-mìn chhiong hói-sùn ke sâ án-tô. Kì-têu yû-sṳ̍t yû-lîm, fî-sòng khoai-lo̍k.
[21] Só-lò-mùn kón-lî ke koet-kâ pâu-hàm tui Yu-fat-lâ-tí-hò to Fî-li-sṳ lâu Âi-khi̍p piên-kie só-yû ke koet-kâ. Só-lò-mùn chhai-sṳ ke ngit-è, kì-têu hiong kì chin-kung, kûi-sun kì.
[22] Só-lò-mùn tak-ngit sî-yeu ńg-chhiên kûng-sṳ̂n yu-mien-fún, yit-van kûng-sṳ̂n chhû mien-fún,
[23] sṳ̍p-chak ngiù-làn tú hiuk ke phì-ngiù, ngi-sṳ̍p chak mu̍k-chhòng hiuk ke phì-ngiù, yit-pak chak mièn-yòng; nang-ngoi hàn-yû lu̍k-é, lìn-yòng, vòng-pân-lu̍k lâu vuk-hâ hiuk ke kiê-é.
[24] Só-lò-mùn thúng-chhṳ Yu-fat-lâ-tí-hò sî-phién só-yû ke thú-thi, tui Yu-fat-lâ-tí ke Thì-fut-sat chhṳ̍t-to chui sî-phién ke Kâ-sat-sàng. Só-yû Yu-fat-lâ-tí-hò sî-phién ke koet-vòng chhiòn-phu kûi-sun kì; kì ya lâu lìn-koet fò-phìn siông-chhu.
[25] Só-lò-mùn chhai-sṳ ke sṳ̀, chhiòn Yù-thai lâu Yî-set-lie̍t ke ngìn-mìn chhiòn-phu ko thai-phìn ke ngit-è, tui chui pet-phién ke Tan to chui nàm-phién ke Phe̍t-sṳ-pâ tak kâ-thìn chhiòn-phu yû chhṳ-kâ ke phù-thò-su lâu vù-fâ-kó-su.
[26] Só-lò-mùn ke mâ-liàu tú yû si-van chak thô chan-chhâ ke mâ lâu yit-van lióng-chhiên chak khì-pîn ke mâ.
[27] Ke sṳ̍p-ngi ke thi-khî ke chúng-tuk tak-ke ngie̍t cheu-lùn fu-chit kiûng-kip Só-lò-mùn-vòng lâu vòng-kiûng tú só sî-yeu ke sṳ̍t-vu̍t, chhiùng-lòi m̀-sṳt khiet-séu.
[28] Tak thi-khî ke chúng-tuk ya kiûng-kip fun-nui yin-kôi kiéu ke thai-ma̍k lâu châu-chhó pûn sî-yeu ke thi-fông, lòi hiuk chan-mâ lâu khì-thâ ke mâ.
[29] Song-ti su-pûn Só-lò-mùn chhin-thai ke chṳ-fi, chhin-khiòng ke lî-kié-li̍t, yu yû chhiong hói án-fat ke sîm-hiûng.
[30] Só-lò-mùn ke chṳ-fi chhêu-ko tûng-fông ngìn lâu Âi-khi̍p-ngìn ke chṳ-fi.
[31] Kì pí van-ngìn kha-yû chṳ-fi, yàng-ko Yî-sṳ̂-lâ-ngìn Yî-tham, yu yàng-ko Mâ-hot ke lai-é Hî-man, Kap-kok, Tha̍t-thai. Kì ke miàng-sâng chhòn-to chû-vì kok-koet.
[32] Kì cho sâm-chhiên ki chṳ̂m-ngièn lâu yit-chhiên làng ńg-sú sṳ̂-kô.
[33] Kì kóng-lun su-muk fâ-chhó, tui Lì-pâ-nun ke hiông-pak-su to sâng chhai chhiòng-táng ke ngiù-chhit-chhó, yu kóng-lun tak-chúng fî-khìm, chéu-chhu, phà-chhùng lâu ǹg-lui.
[34] Sṳ-kie tak-koet ke vòng chhiòn-phu thâng-tó Só-lò-mùn ke chṳ-fi, chhiu phai-ngìn hi thâng kì chṳ-fi ke fa.