[1] Yû yit-ke Yâ-sṳ̂-lie̍t-ngìn ham-cho Nâ-pak, kì yû yit-te phù-thò-yèn chhai Yâ-sṳ̂-lie̍t, chhai Sat-mâ-li-â-vòng Â-ha̍p ke vòng-kiûng fu-khiun.
[2] Yû yit-ngit, Â-ha̍p tui Nâ-pak kóng: “Chiông ngì ke phù-thò-yèn ngiong-pûn ngài hó-mò! Yîn-vi kì vá-khiun vòng-kiûng, ngài oi yung liá-te thi cho chhoi-yèn. Ngài voi yung hàn-kha hó ke phù-thò-yèn lâu ngì von; ya-he ngì oi chhièn, ngài chhiu cheu sṳ-ka son-pûn ngì.”
[3] Nâ-pak tui Â-ha̍p kóng: “Song-chú m̀-chún ngài chiông chú-sán ngiong-pûn ngì.”
[4] Â-ha̍p chón-to vòng-kiûng, yîn-vi Yâ-sṳ̂-lie̍t-ngìn Nâ-pak kóng: “Song-chú m̀-chún ngài chiông chú-sán ngiong-pûn ngì” liá-ki fa, sîm-tú pot-at tông mò fôn-hí. Kì vang chhai mìn-chhòng, mien-hiong piak, m̀-sṳ̍t tûng-sî.
[5] Kì ke pû-ngiòng Yâ-sé-pit ngi̍p-hi mun kì: “Ngì cho-má-ke pot-at án mò fôn-hí? Cho-má-ke m̀-sṳ̍t tûng-sî nè?”
[6] Kì en-kóng: “Yîn-vi ngài hiong Yâ-sṳ̂-lie̍t-ngìn Nâ-pak kóng: ‘Ngài chhut ka-chhièn oi mâi ngì ke phù-thò-yèn; na-he ngì oi, ngài ya cho-tet yung nang-ngoi yit-te phù-thò-yèn lâu ngì von.’ Chúng-he kì sa kóng: ‘Ngài cho-m̀-tet chiông ngài ke phù-thò-yèn ngiong-pûn ngì!’ ”
[7] Vòng-heu Yâ-sé-pit tui Â-ha̍p kóng: “Ngì kám m̀-he Yî-set-lie̍t ke vòng? Hong-hí-lòi, fôn-fôn hí-hí lòi sṳ̍t-fan; ngài yit-thin voi chiông Yâ-sṳ̂-lie̍t-ngìn Nâ-pak ke phù-thò-yèn kâu-pûn ngì!”
[8] Só-yî, Yâ-sé-pit yung Â-ha̍p ke miàng siá sin-é, chém Â-ha̍p ke yin-é, yèn-heu sung-pûn ke-têu lâu Nâ-pak khiung-sàng he̍t ke kui-chhu̍k lâu chóng-ló.
[9] Sin-é siá-kóng: “Oi siên-ko kim-sṳ̍t yit-ngit, seu-si̍p ngìn-mìn, chhiáng Nâ-pak chhô thai-vi.
[10] Hêm lióng-ke lù-màn tông-mien ko kì, kóng kì chu-ma Song-ti lâu vòng, yèn-heu chiông kì thô-chhut sàng-ngoi, yung sa̍k-thèu te̍p-sí kì.”
[11] Yâ-sṳ̂-lie̍t ke-têu kui-chhu̍k lâu chóng-ló cheu Yâ-sé-pit ke sin-é só chṳ́-sṳ ke hi-cho.
[12] Kì-têu siên-ko kim-sṳ̍t yit-ngit, seu-si̍p ngìn-mìn khiung-ha lòi, chhiáng Nâ-pak chhô thai-vi.
[13] Lióng-ke lù-màn tông-mien ko Nâ-pak, kóng kì chu-ma Song-ti lâu vòng. Só-yî ngìn-mìn chiông Nâ-pak thô-chhut sàng-ngoi, yung sa̍k-thèu chiông kì te̍p-sí.
[14] Kì-têu chhiu ham-ngìn hi Yâ-sé-pit ke-vi, kóng Nâ-pak yí-kîn pûn-ngìn yung sa̍k-thèu te̍p-sí lé.
[15] Yâ-sé-pit yit thâng-tó Nâ-pak pûn-ngìn yung sa̍k-thèu te̍p-sí, chhiu tui Â-ha̍p kóng: “Hó hi chiap-sû Yâ-sṳ̂-lie̍t-ngìn Nâ-pak m̀-hén mai-pûn ngì ke phù-thò-yèn lé! Kì yí-kîn sí-thet lé!”
[16] Â-ha̍p thâng-tó Nâ-pak sí-thet, ngiàm-sṳ̀ chhiu chhut-fat, oi hi pa-cham Yâ-sṳ̂-lie̍t-ngìn Nâ-pak ke phù-thò-yèn.
[17] Song-chú tui Thì-sṳ̂-pí-ngìn siên-tî Yî-li-â kóng:
[18] “To Sat-mâ-li-â ke-vi hi kien Yî-set-lie̍t-vòng Â-ha̍p, ngì voi chhai Nâ-pak ke phù-thò-yèn tù-tó kì; kì sióng-oi pa-cham ke phù-thò-yèn.
[19] Ngì hi lâu kì kóng, Ngài — Song-chú tui kì kóng: ‘Ngì chhṳ̀-sí ngìn, hàn sióng pa-cham kì ke sán-ngia̍p he-mò?’ Lâu kì kóng Song-chú án-ngiòng kóng: ‘Kiéu chhai má-ke thi-fông sê Nâ-pak ke hiet, ya voi chhai ke-vi sê ngì chhṳ-kâ ke hiet!’ ”
[20] Â-ha̍p khon-tó Yî-li-â, chhiu kóng: “Sí tui-thèu ke â, ngài ngióng-pân yu tù-tó ngì?” Yî-li-â en-kóng: “Ngài lòi-chhìm ngì. Yîn-vi ngì chhut-mai chhṳ-kâ, hàng Song-chú khon-cho sià-ok ke sṳ.
[21] Só-yî, Song-chú tui ngì kóng: ‘Ngài oi kong châi-fo pûn ngì, oi chhù-me̍t ngì lâu ngì kâ-chhu̍k só-yû ke nàm-ngìn, mò-lun chhṳ-yù ke ya-he mò chhṳ-yù ke chhiòn-phu oi me̍t-thet.
[22] Ngài voi sṳ́ ngì ke kâ-chhu̍k chhiong Nì-pat ke lai-é Yâ-lò-pô-ôn-vòng ke kâ-chhu̍k khiung-yong, yu chhiong Â-hî-ngâ ke lai-é Pâ-sâ-vòng ke kâ-chhu̍k khiung-yong, yîn-vi ngì sṳ́ Yî-set-lie̍t-ngìn ham chhai chhui-ok tông-chûng, yu ngiâ Ngài fat-khién.’
[23] Lun-tó Yâ-sé-pit, Song-chú kóng: ‘Kiéu-è oi chhai Yâ-sṳ̂-lie̍t sàng-chhiòng sùn sṳ̍t Yâ-sé-pit ke sṳ̂-thí.’
[24] Ngì vuk-hâ só-yû ke ngìn, sí chhai sàng-tú ke yit-thin voi pûn kiéu-è sṳ̍t-thet, sí chhai sân-yâ ke yit-thin voi pûn tiâu-é sṳ̍t-thet.”
[25] (Sṳ-sṳ̍t song mò-ngìn chhiong Â-ha̍p án-ngiòng chhut-mai chhṳ-kâ, hàng Song-chú khon-cho sià-ok ke sṳ; liá chhiòn-phu he yîn-vi kiâ pû-ngiòng Yâ-sé-pit ke sô-súng.
[26] Song-chú sṳt chhai Yî-set-lie̍t-ngìn mien-chhièn chiông Â-mô-li-ngìn kiuk-chhut liá thi-fông; chúng-he Â-ha̍p cheu Â-mô-li-ngìn án-ngiòng hi-pai ngiéu-siong, fam chui chit-ok ke chhui.)
[27] Â-ha̍p thâng-tó liá-têu fa, chhiu chhá-lan sâm, von-chok mà-sâm, m̀ sṳ̍t tûng-sî. Kì chok-tén mà-sâm soi-muk, hàng-lu ya thèu lài-lài, kín-théu thai-hi.
[28] Song-chú tui Thì-sṳ̂-pí-ngìn siên-tî Yî-li-â kóng:
[29] “Â-ha̍p chhai Ngài mien-chhièn án khiâm-pî, ngì yû khon-tó mò? Yîn-vi kì chhai Ngài mien-chhièn án khiâm-pî, Ngài mò-oi chhai kì hàn-sâng ke ngit-è kong châi-fo; Ngài oi chhai kiâ lai-é cho vòng ke sṳ̀ kong châi-fo pûn Â-ha̍p ke kâ-chhu̍k.”