[1] Yû yit-ke siên-tî miàng-ham Yî-li-â, he Kî-lie̍t ke Thì-sṳ̂-pí-ngìn. Kì tui Â-ha̍p-vòng kóng: “Ngài chṳ́-tén ngài só fu̍k-sṳ yún-sên ke Song-chú — Yî-set-lie̍t ke Song-ti fat-sṳ: Liá kí-ngièn nui, ngài na mò kóng, thiên chhiu m̀-voi lo̍k-yí, ya m̀-voi kong lu-súi.”
[2] Song-chú tui Yî-li-â kóng:
[3] “Ngì lì-khôi liá-vi, hiong-tûng hàng, to Yok-tan-hò tûng-phién ke Kî-li̍p-hâi fu-khiun khong hí-lòi.
[4] Ngì cho-tet lîm hâi-tú ke súi; Ngài yí-kîn min-lin vû-â sung sṳ̍t-vu̍t to ke-vi pûn ngì sṳ̍t.”
[5] Yî-li-â thâng-chhiùng Song-chú ke min-lin hi he̍t chhai Yok-tan-hò tûng-phién ke Kî-li̍p-hâi fu-khiun.
[6] Kì lîm hâi-tú ke súi; vû-â tak-ngit chêu-sṳ̀n lâu lìm-am-é chhiu sung piáng-è lâu ngiuk lòi pûn kì.
[7] Ko yit-chham sṳ̀-kiên, yîn-vi mò lo̍k-yí, hâi-tú ke súi chhiòn-phu châu-thet.
[8] Só-yî, Song-chú tui Yî-li-â kóng:
[9] “Ngì to Sî-tun fu-khiun ke Sat-le̍t-fap hi, he̍t chhai ke-vi. Ngài yí-kîn fûn-fu he̍t chhai ke-vi ke yit-ke koá-fu kiûng-kip ngì sṳ̍t-vu̍t.”
[10] Yî-li-â chhiu hi Sat-le̍t-fap. Lòi-to sàng mùn-héu ke sṳ̀, kì khon-tó yit-ke koá-fu chhai ke-vi ngiâm-chhèu. Kì chhiu ham kì kóng: “Pai-thok ngì yung âng-é chông-têu súi pûn ngài sṳ̍t.”
[11] Koá-fu oi hi nâ-súi ke sṳ̀, Yî-li-â hêm kì, kóng: “Pai-thok ya tai-têu piáng-è pûn ngài!”
[12] Koá-fu kóng: “Ngài tui yún-sên Song-chú — ngì ke Song-ti fat-sṳ, ngài mò piáng-è. Ngài chṳ́-yû chhûn âng-tú yit-kha̍k mien-fún lâu kon-tú yit-si̍t-é kám-lám-yù. Ngài to liá-vi lòi ngiâm têu-é chhèu, oi tai-chón vuk-hâ hi cho-piáng, pûn ngài lióng chṳ́-ôi sṳ̍t; sṳ̍t-thet heu, ngài-têu chṳ́-yû tén-sí!”
[13] Yî-li-â tui kì kóng: “M̀-sṳ́ kiâng! Cheu ngì só-kóng ke hi-cho! Chúng-he siên cho yit-te se piáng-è, nâ-lòi pûn ngài sṳ̍t, yèn-heu chang cho têu-é pûn ngì lâu ngiâ lai-é sṳ̍t,
[14] yîn-vi Song-chú — Yî-set-lie̍t ke Song-ti án-ngiòng kóng: ‘Chhṳ̍t-to Ngài — Song-chú lo̍k-yí ke-ngit, chông mien-fún ke âng-é m̀-voi kien-tái, kon-tú ke yù ya m̀-voi yung chhiang-chhiang.’ ”
[15] Koá-fu chhiu hi, cheu Yî-li-â fûn-fu ke fa hi-cho. Kì-têu thai-kâ chhiòn-phu yû-hó sṳ̍t, yu sṳ̍t chhin-kiú.
[16] Chhiu-chhiong Song-chú thûng-ko Yî-li-â só yin-hí ke, chông mien-fún ke âng-é mò kien-tái, kon-tú ke yù ya mò yung chhiang-chhiang.
[17] Ko yit-chham sṳ̀-kiên, koá-fu ke lai-é pot phiang-é, ye̍t-lòi ye̍t ngiàm-chhung, heu-lòi phiang-to sí-thet.
[18] Koá-fu tui Yî-li-â kóng: “Sṳ̀n-ngìn nâ, ngì cho-má-ke án-ngiòng tui-thai ngài? Ngì to liá-vi lòi he oi sṳ́ Song-ti sióng-hí ngài ke chhui, sṳ́ ngài ke lai-é sí-thet he-mò?”
[19] Yî-li-â kóng: “Chiông se-ngìn-è kâu-pûn ngài!” Kì tui koá-fu fài-chûng chiông se-ngìn-è nám ko-lòi, tai-to lèu-táng kì he̍t ke fòng-kiên, piong chhai mìn-chhòng táng.
[20] Yèn-heu Yî-li-â thai-sâng khì-tó: “Song-chú — ngài ke Song-ti â, Ngì cho-má-ke kong châi-fo pûn liá koá-fu nè? Ngài chia kiâ vuk-hâ hiet, Ngì ngióng-oi sṳ́ kì ke lai-é sí-thet nè?”
[21] Yî-li-â sâm-pái phu̍k chhai se-ngìn-è sṳ̂n-song, khì-khiù kóng: “Song-chú — ngài ke Song-ti â, khiù Ngì sṳ́ liá se-ngìn-è fán-sâng!”
[22] Song-chú thâng Yî-li-â ke khì-tó, se-ngìn-è ke lìn-fùn chhiu chón-to kì ke sṳ̂n-thí, kì chhiu fán-sâng ko-lòi.
[23] Yî-li-â chiông se-ngìn-è tui lèu-táng nám hâ-lòi, ngi̍p-to vuk-tú kâu-pûn kiâ-mê, tui kì kóng: “Khon nâ, ngiâ lai-é fán-sâng lé!”
[24] Koá-fu tui Yî-li-â kóng: “Liá-ha ngài khok-sṳ̍t tî ngì he sṳ̀n-ngìn; Song-chú thûng-ko ngì kóng ke fa chhiòn-phu he chṳ̂n-sṳ̍t ke!”