[1] Yû yit-ke sṳ̀n-ngìn fung Song-chú ke min-lin tui Yù-thai to Pak-thi̍t-li hi. Kì to ke sṳ̀, Yâ-lò-pô-ôn khî chhai chi-thàn chhièn sêu-hiông.
[2] Sṳ̀n-ngìn cheu Song-chú ke min-lin ma chi-thàn kóng: “Chi-thàn â, chi-thàn! Song-chú án-ngiòng kóng: Thai-ví ke kâ-chhu̍k voi kiung yit-ke se-lai-é, miàng ôn-to Yok-sî-â. Kì voi chiông sṳ̀n-meu tú ke-têu chi-sṳ̂, chhiu-he chhai ngì liá chi-thàn táng sêu-hiông ke chi-sṳ̂, chhai ngì táng-kô chhṳ̀-thet, yu chhai ngì táng-kô sêu ngìn ke kut-thèu.”
[3] Ke-ngit, sṳ̀n-ngìn thì-chhut yit-ke seu-thèu, kóng: “Liá chi-thàn voi lie̍t-thet, táng-kô ke fôi voi sia hâ-lòi. Ke-sṳ̀, ngì chhiu tî liá-fa he Song-chú thûng-ko ngài kóng ke.”
[4] Yâ-lò-pô-ôn-vòng thâng-tó liá-fa chhiu chhûn-sú chṳ́-tén sṳ̀n-ngìn ha-lin kóng: “Chok hí-lòi!” Vòng ke sú-kut ngiàm-sṳ̀ m̀-voi thîn-thûng, mò phan-fap kiû chón-lòi.
[5] Chi-thàn fut-yèn lie̍t-thet, táng-kô ke fôi sia to mân thi-nài, chhiu-chhiong sṳ̀n-ngìn fung Song-chú ke min-lin só yi-ngièn ke.
[6] Vòng kiak-kiak tui sṳ̀n-ngìn kóng: “Chhiáng vi ngài hiong Song-chú — ngì ke Song-ti khì-tó, khiù Kì yî-chhṳ ngài ke sú-kut!” Sṳ̀n-ngìn hiong Song-chú khì-tó, vòng ke sú-kut chhiu hó chón-hi, chhiong ngièn-tán yit-yong.
[7] Só-yî vòng tui sṳ̀n-ngìn kóng: “Chhiáng lâu ngài khiung-ha chón vuk-hâ, sṳ̍t-têu tûng-sî! Ngài me oi sung lî-vu̍t tap-chhia ngì.”
[8] Sṳ̀n-ngìn tui vòng kóng: “Chhiu-son ngì chiông yit-pan ke kâ-sán pûn ngài, ngài me m̀ lâu ngì hi, me m̀ lâu ngì khiung-ha lîm-sṳ̍t;
[9] yîn-vi Song-chú min-lin ngài, m̀-hó chhai Pak-thi̍t-li sṳ̍t má-ke, lîm má-ke, ya ham ngài m̀-hó tui ngièn-lòi ke-thiàu lu chón-hi.”
[10] Só-yî ke sṳ̀n-ngìn mò tui kì lòi Pak-thi̍t-li ke lu chón-hi; kì tui nang-ngoi yit-thiàu lu chón-hi.
[11] Ke-sṳ̀, yû yit-ke ló siên-tî he̍t chhai Pak-thi̍t-li. Kì ke-têu lai-é lòi lâu kì kóng yû-koân Yù-thai lòi ke sṳ̀n-ngìn chhai Pak-thi̍t-li só-cho ke sṳ pin kì tui Yâ-lò-pô-ôn-vòng só-kóng ke fa.
[12] Ló siên-tî chhiu mun kì-têu: “Kì he tui nai-thiàu lu chón-hi?” Ke-têu lai-é chhiu chṳ́ pûn kì khon Yù-thai lòi ke sṳ̀n-ngìn hàng nai-thiàu lu chón-hi.
[13] Kì ham kì-têu vi kì yi-phi lì-è; kì-têu cheu â-pâ ke fa hi-cho. Ló siên-tî chhiu khì-sông lì-è,
[14] hiong ke-thiàu lu hi tûi Yù-thai lòi ke sṳ̀n-ngìn. Kì chhìm-tó ke sṳ̀n-ngìn chhô chhai yit-thèu siong-su hâ, chhiu mun kì: “Ngì he tui Yù-thai lòi ke sṳ̀n-ngìn mò?” Ke-ngìn en-kóng: “He!”
[15] Ló siên-tî kóng: “Chhiáng lâu ngài chón vuk-hâ sṳ̍t-fan!”
[16] Sṳ̀n-ngìn kóng: “Ngài cho-m̀-tet lâu ngì khiung-ha chón-hi, ya cho-m̀-tet chhai liá-vi lâu ngì khiung-ha lîm-sṳ̍t;
[17] yîn-vi Song-chú sṳt min-lin ngài, m̀-hó chhai Pak-thi̍t-li sṳ̍t má-ke, lîm má-ke, ya ham ngài m̀-hó tui ngièn-lòi ke-thiàu lu chón-hi.”
[18] Ló siên-tî tui kì kóng: “Ngài ya he siên-tî, lâu ngì khiung-yong. Yû yit-vi thiên-sṳ́ fung Song-chú ke min-lin lâu ngài kóng, oi ngài tai ngì khiung-ha chón vuk-hâ, chhiáng ngì khiung-ha lîm-sṳ̍t.” Khì-sṳ̍t, liá ló siên-tî he kóng fâ-liâu.
[19] Só-yî, sṳ̀n-ngìn lâu ló siên-tî khiung-ha chón-hi, chhai kiâ vuk-hâ khiung-ha sṳ̍t-fan lîm-súi.
[20] Kì-têu tú-tú chhô-chok ke sṳ̀, Song-chú ke fa lìm-to ló siên-tî.
[21] Kì chhiu tui Yù-thai lòi ke sṳ̀n-ngìn hêm-kóng: “Song-chú án-ngiòng kóng: ‘Ngì m̀ thâng-chhiùng Song-chú ke fa, mò cheu Song-chú — ngì Song-ti ke min-lin cho,
[22] ngì ngióng cho-tet chón-lòi, chhai Ngài m̀-chún ngì lîm-sṳ̍t ke thi-fông lîm-sṳ̍t. Só-yî, ngì voi sí-thet, ngì ke sṳ̂n-sṳ̂ ya m̀-voi chong chhai ngì kâ-chhu̍k ke fùn-mu tú.’ ”
[23] Kì-têu sṳ̍t-lîm yî-heu, ló siên-tî vi Yù-thai lòi ke sṳ̀n-ngìn yi-phi lì-è,
[24] kì chhiu sông-lu. Chhai lu-song yû yit-chak sṳ̂-é tù-tó kì, chiông kì ngâu sí-thet, sṳ̂n-sṳ̂ vang chhai lu-song; lì-è lâu sṳ̂-é khî chhai sṳ̂n-sṳ̂ sùn-thèu.
[25] Yû-ngìn tui ke-vi kîn-ko, khon-tó sṳ̂n-sṳ̂ vang chhai lu-song, sṳ̂-é khî chhai sùn-thèu, chhiu to Pak-thi̍t-li hi, chiông só khon-tó ke sṳ chhòn chhut-hi.
[26] Ló siên-tî thâng-tó, chhiu kóng: “Ke he m̀ thâng-chhiùng Song-chú min-lin ke sṳ̀n-ngìn; chhiu-chhiong Song-chú kóng-ko ke, Song-chú hêm sṳ̂-é chhá-lie̍t kì, ngâu-sí kì.”
[27] Só-yî kì tui ke-têu lai-é kóng: “Vi ngài yi-phi lì-è.” Kì-têu cheu kì ke fa hi-cho.
[28] Kì khì-sông lì-è chhut-mùn hi, khon-tó ke sṳ̀n-ngìn ke sṳ̂n-sṳ̂ vang chhai lu-song, lì-è lâu sṳ̂-é hàn khî chhai sṳ̂n-sṳ̂ sùn-thèu. Sṳ̂-é mò sṳ̍t sṳ̂n-sṳ̂, ya mò chhá-lie̍t lì-è.
[29] Só-yî ló siên-tî chiông sṳ̀n-ngìn ke sṳ̂n-sṳ̂ pân-sông lì-poi, tai-chón Pak-thi̍t-li, vi kì sông-sîm liù muk-chṳp, ya chiông kì mài-chong.
[30] Ló siên-tî chiông sṳ̂n-sṳ̂ chong chhai chhṳ-kâ kâ-chhu̍k ke fùn-mu tú; kì lâu kì ke-têu lai-é tui-tén sṳ̂n-sṳ̂ sông-sîm liù muk-chṳp kóng: “Ôi-châi, ngài ke hiûng-thi â!”
[31] Mài-chong yî-heu, ló siên-tî tui ke-têu lai-é kóng: “Yî-heu ngài sí-thet, chiông ngài chong chhai liá fùn-mu tú, chiông ngài ke sṳ̂n-sṳ̂ piong chhai sṳ̀n-ngìn ke sùn-thèu.
[32] Kì fung Song-chú min-lin kûng-kit Pak-thi̍t-li chi-thàn lâu só-yû chhai Sat-mâ-li-â sàng-chṳ́n ke-têu sṳ̀n-meu ke fa yit-thin voi sṳ̍t-hien.”
[33] Liá-sṳ yî-heu, Yî-set-lie̍t ke vòng Yâ-lò-pô-ôn hàn-he m̀ lì-khôi kì sià-ok ke tho-lu, ki-siu̍k tui phû-thûng ke kâ-chhu̍k chûng sién chi-sṳ̂ chhai sân-kông táng ke chi-thàn sṳ-fung. Kì sùi-phien fûng-li̍p só-yû ngien-yi cho chi-sṳ̂ ke ngìn cho sân-kông táng chi-thàn ke chi-sṳ̂.
[34] Yâ-lò-pô-ôn só-fam ke chhui sṳ́ kì ke vòng-chhèu sôi-phai, chṳ-to chhai thi-song vàn-chhiòn me̍t-mòng.