[1] Yî-li-â só-cho ke mî-yit khien-sṳ lâu kì ngióng-pân yung tô-é chhṳ̀-sí só-yû Pâ-li̍t siên-tî ke sṳ, Â-ha̍p-vòng chiông chhiòn-phu lâu kiâ pû-ngiòng Yâ-sé-pit kóng.
[2] Yâ-sé-pit chhiu phai sṳ́-chá hi kien Yî-li-â, kóng: “Thiên-kông-ngit liá-sṳ̀, ngài na-mò chhiong ngì tui-thai ke-têu siên-tî ke sin-miang án-ngiòng tui-fu ngì, ngien sṳ̀n-mìn chhûng-chhûng chit-fa̍t ngài!”
[3] Yî-li-â hak-tó, chhiu hong-hí-lòi thò-miang, tai-tén kì ke phu̍k-ngìn to Yù-thai ke Phe̍t-sṳ-pâ hi. Yî-li-â chiông phu̍k-ngìn liù chhai ke-vi,
[4] chhṳ-kâ chhai khóng-yâ hàng yit-ngit ke lu-chhàng, lòi-to yit-thèu thu-chhiùng su-hâ, chhô chhai ke-vi khiù-sí; kì khì-tó kóng: “Song-chú â, la-pái lé! Chiông ngài ke sin-miang sû chón-hi hó nâ! Yîn-vi ngài mò pí ngài ke chú-siên kha voi.”
[5] Kì soi chhai su-hâ, soi-thet lé. Fut-yèn-kiên, yû yit-ke thiên-sṳ́ lòi phok kì, tui kì kóng: “Hó-hong lé, lòi sṳ̍t-têu tûng-sî!”
[6] Kì pak-khôi muk-chû yit-khon, khon-tó chhai thèu-nà sùn-thèu yû yung fó-than phoi-hó ke piáng lâu yit-kon súi. Kì chhiu nâ-lòi lîm-sṳ̍t, yèn-heu yu vang chón-hi soi.
[7] Song-chú ke thiên-sṳ́ thi-ngi pái lòi phok kì, kóng: “Hó-hong lé! Lòi sṳ̍t-têu tûng-sî, ngì oi hàng ke lu hàn tông-yén!”
[8] Yî-li-â chhiu hong-hí-lòi, nâ-lòi sṳ̍t, nâ-lòi lîm. Sṳ̍t-vu̍t pûn kì chhin-yû ngièn-hi, hàng si-sṳ̍p ngit-ya, to Song-ti ke sân, chhiu-he Hò-lie̍t-sân.
[9] Chhai ke-vi, kì ngi̍p-hi yit-chak sân-lùng ko-ya. Fut-yèn, Song-chú tui kì kóng-fa: “Yî-li-â, ngì chhai liá-vi cho-má-ke?”
[10] Yî-li-â en-kóng: “Song-chú — Van-kiûn ke Ngièn-soi Song-ti â, ngài vi Ngì thai-fat ngie̍t-sîm. Chúng-he Yî-set-lie̍t ngìn-mìn vì-phoi Ngì lâu kì-têu li̍p ke yok, chhak-thet Ngì ke chi-thàn, yu chhṳ̀-thet Ngì só-yû ke siên-tî. Liá-ha chṳ́-yû chhûn ngài yit-ke ngìn, kì-têu hàn-he oi chhìm ngài, sû ngài ke miang!”
[11] Song-chú tui kì kóng: “Chhut-hi khî chhai sân-táng, khî chhai Ngài ke mien-chhièn.” Ke-sṳ̀, Song-chú tui ke-vi kîn-ko, fut-yèn-kiên khiòng-fûng sṳ́ sân-pên sa̍k-lie̍t, chúng-he Song-chú mò chhai fûng-chûng. Fûng chhôi-ko, chiap-tén yû thi-thûng, chúng-he Song-chú ya mò chhai thi-thûng chûng.
[12] Thi-thûng heu yû fó, chúng-he Song-chú ya mò chhai fó-chûng. Fó yî-heu, yû mì-se ke sâng.
[13] Yî-li-â thâng-tó, chhiu yung ngoi-sâm êm-tén mien, chhut-hi khî chhai lùng-héu. Yû yit-ke sâng-yîm tui kì kóng: “Yî-li-â, ngì chhai liá-vi cho-má-ke?”
[14] Kì en-kóng: “Song-chú — Van-kiûn ke Ngièn-soi Song-ti â, ngài vi Ngì thai-fat ngie̍t-sîm. Chúng-he Yî-set-lie̍t ngìn-mìn vì-phoi Ngì lâu kì-têu li̍p ke yok, chhak-thet Ngì ke chi-thàn, yu chhṳ̀-thet Ngì só-yû ke siên-tî. Liá-ha chṳ́-yû chhûn ngài yit-ke ngìn, kì-têu hàn-he oi chhìm ngài, sû ngài ke miang!”
[15] Song-chú kóng: “Ngì tui ngièn-lòi ke lu chón-to Thai-mâ-sṳ-kiet fu-khiun ke khóng-yâ hi, yèn-heu ngi̍p-sàng hi kò-yù sat-li̍p Ha̍p-siet cho Si-li-â-vòng,
[16] kò-yù sat-li̍p Nèn-sṳ ke sûn-é Yâ-fu cho Yî-set-lie̍t-vòng, yu kò-yù sat-li̍p Â-pak-Mí-hò-lâ-ngìn Sâ-fap ke lai-é Yî-li-sâ chiap ngì cho siên-tî.
[17] Sám tet-khôi Ha̍p-siet tô-é ke ngìn, chhiu voi pûn Yâ-fu chhṳ̀-sí; sám tet-khôi Yâ-fu tô-é ke ngìn, chhiu voi pûn Yî-li-sâ chhṳ̀-sí.
[18] Chúng-he Ngài oi chhai Yî-set-lie̍t chûng liù-hâ chhit-chhiên ngìn; liá-têu ngìn m̀-sṳt hiong Pâ-li̍t khúi-pai, ya m̀-sṳt chîm-ko kì.”
[19] Yî-li-â lì-khôi ke-vi, chhìm-tó Sâ-fap ke lai-é Yî-li-sâ. Yî-li-sâ tú-tú-hó chhai kâng-thièn; yû sṳ̍p-ngi tui ngiù chhai kì thèu-chhièn, kì sṳ́-tén chui-heu yit-tui. Yî-li-â thot-hâ ngoi-sâm, kâ chhai Yî-li-sâ sṳ̂n-song.
[20] Yî-li-sâ chhiu lì-khôi kì ke ngiù, hi kiuk Yî-li-â, kóng: “Tén ngài siên lâu yà-ôi chhṳ̀-phe̍t, yèn-heu ngài chang-lòi thèn ngì.” Yî-li-â kóng: “Hó, ngì chón-hi. Ngài mò chú-tóng ngì!”
[21] Yî-li-sâ chhiu chón-hi, chiông kì ke yit-tui ngiù chhṳ̀-thet, chiông ngiù-ak nâ-lòi cho chhèu sêu, chiông ngiù-ngiuk chú pûn thai-kâ sṳ̍t; yèn-heu Yî-li-sâ hi-thèn Yî-li-â, fu̍k-sṳ kì.