[1] Sṳ-pâ ńg-vòng thâng-tó Só-lò-mùn-vòng yîn-vi Song-chú su-fuk tet-tó hó miàng-sâng, chhiu to Yâ-lu-sat-lâng lòi, sióng yung khun-nàn ke mun-thì lòi kháu kì.
[2] Kì tai-tén yit thai-khiùn sṳ̀n-phu̍k, hàn-yû yit thai-chhui lo̍k-thò chai-tén hiông-liau, chû-pó lâu chhin-tô vòng-kîm. Kì khon-tó Só-lò-mùn ke sṳ̀, chiông sîm-chûng só sióng-tó ke mun-thì chhiòn-phu nâ-lòi mun.
[3] Só-lò-mùn-vòng yit-yit fì-tap kì só-yû ke mun-thì, mò yit-chak mun-thì kháu-tó kì.
[4] Sṳ-pâ ńg-vòng thâng-tó Só-lò-mùn chṳ-fi ke fa, ya khon-tó kì só-hí ke vòng-kiûng,
[5] yu khon-tó kì chok-táng fûng-fu ke sṳ̍t-vu̍t, kiâ kôn-yèn he̍t ke vuk, vòng-kiûng phu̍k-ngìn ke chû-chṳt lâu só-chok ke chṳ-fu̍k, chṳ̂m-chiú ke phu̍k-ngìn, lâu sṳn-thien tú hien ke sêu-fa-chi, kûi-chak ngìn ngong thet-hi.
[6] Kì tui Só-lò-mùn-vòng kóng: “Ngài chhai chhṳ-kâ ke koet-kâ só thâng-tó yû-koân ngì ke sṳ̀n-chhiu lâu chṳ-fi chhiòn-phu he ton-chṳ̂n ke!
[7] Ngài ngièn-lòi m̀-sin, chúng-he chhṳ̍t-to ngài lòi liá-vi, chhîn-ngién khon-tó liá yit-chhiet chang siông-sin. Ngài só thâng-tó ke hàn màng-yû yit-pan nè! Ngì ke chṳ-fi lâu chhòi-fu pí phe̍t-ngìn só lâu ngài kóng ke chhêu-ko chhin-tô.
[8] Ngì ke pû-ngiòng se-chiá hàn-yû fuk-hi ô! Fu̍k-sṳ ngì ke ngìn ngióng-pân án-yû fuk-hi â! Kì-têu yû-hó sòng-sòng chhai ngì mien-chhièn thâng ngì chṳ-fi ke fa!
[9] Ngien Song-chú — ngì ke Song-ti tet-tó chan-mî! Kì sat-li̍p ngì cho Yî-set-lie̍t ke vòng, péu-sṳ Kì ngióng-pân chung-yi ngì. Yîn-vi Song-chú yún-yén thung-siak Yî-set-lie̍t, só-yî sat-li̍p ngì cho kì-têu ke vòng, oi ngì vì-fu fap-li̍t, sṳ̂n-chông chṳn-ngi.”
[10] Sṳ-pâ ńg-vòng chiông tai-lòi ke lî-vu̍t hien-pûn Só-lò-mùn-vòng: Thai-yok yû si-chhiên kûng-kîn chhûng ke vòng-kîm, chhin-tô hiông-liau lâu pó-sa̍k. Só-lò-mùn-vòng yî-heu, m̀-sṳt sû-ko án-tô ke hiông-liau.
[11] (Hî-làn ke sòn-chhui tui Ngò-fî yun kîm-é lòi, ya yun-lòi chhin-tô thàn-hiông-muk lâu pó-sa̍k.
[12] Só-lò-mùn-vòng yung liá-têu thàn-hiông-muk cho Song-chú ke sṳn-thien lâu vòng-kiûng ke làn-kôn, ya vi ngo̍k-sṳ̂ kô-sú chṳ-chho su-khìm lâu chhit-hièn-khìm. Yî-set-lie̍t chhiùng-lòi m̀-sṳt chin-khiéu án-hó ke thàn-hiông-muk, chhṳ̍t-to kîm-pû-ngit ya m̀-sṳt khon-ko án-hó ke.)
[13] Só-lò-mùn-vòng ya tông-khói, sung Sṳ-pâ ńg-vòng kok-chúng lî-vu̍t, chhù-liáu cheu-li oi sung ke lî-vu̍t yî-ngoi, fàm-he Sṳ-pâ ńg-vòng yêu-khiù ke, kì chhiòn-phu pûn kì. Ńg-vòng lâu kì ke sṳ̀n-phu̍k chhiu chón Sṳ-pâ hi lé.
[14] Só-lò-mùn-vòng tak-ngièn sû-tó lióng-van sâm-chhiên kûng-kîn ke vòng-kîm,
[15] nang-ngoi hàn-yû sên-lî ngìn na̍p ke soi, méu-yi̍t-soi, Â-lâ-pak ke-têu vòng chin-kung ke lî-vu̍t, lâu Yî-set-lie̍t kok thi-khî chúng-tuk hien ke lî-vu̍t.
[16] Só-lò-mùn-vòng chṳ-chho lióng-pak te thai tún-phài; tak-te thai-yok yung chhit kûng-kîn ke kîm-é tá ke.
[17] Kì yu chṳ-chho sâm-pak te se tún-phài; tak-te thai-yok yung lióng kûng-kîn ke kîm-é tá ke. Kì chiông liá-têu tún-phài piong chhai Lì-pâ-nun Lìm-kiûng tú.
[18] Só-lò-mùn-vòng yu yung siong-ngà chṳ-chho yit-chak thai pó-chho, yung sùn-kîm pâu-tén.
[19] Pó-chho thèu-chhièn yû liuk-chhèn ton-é; tak-chhèn lióng-thèu kok-yû yit-chho sṳ̂-é, chúng-khiung sṳ̍p-ngi chho. Pó-chho ke pen-poi táng he yèn-hìn ke, lióng-phién ke fù-sú kok-yû yit-chho sṳ̂-é. Khì-thâ koet-kâ chhiòn-phu m̀-sṳt yû án-ngiòng ke pó-chho.
[21] Só-lò-mùn-vòng só-yû ke chiú-pî chhiòn-phu he kîm-é cho ke; só-yû chhai Lì-pâ-nun Lìm-kiûng tú ke vón-phàn chhiòn-phu he sùn-kîm cho ke, m̀-he yung ngiùn-è cho ke; yîn-vi chhai Só-lò-mùn ke sṳ̀-thoi, ngiùn-è m̀-he kui-chhung ke.
[22] Só-lò-mùn-vòng yû yit-chhui thai-sòn, lâu Hî-làn-vòng ke sòn-chhui khiung-ha chhut-hói; sòn-chhui sâm-ngièn chón-lòi yit-pái, tai-tén kîm-ngiùn, siong-ngà, hèu-è lâu khúng-chhiok chón-lòi.
[23] Só-lò-mùn-vòng pí sṳ-song só-yû ke koet-vòng kha fu-yû, hàn-kha yû chṳ-fi.
[24] Chhiòn sṳ-kie ke ngìn chhiòn-phu sióng-oi lòi kien Só-lò-mùn, oi thâng Song-ti su-pûn kì chṳ-fi ke fa.
[25] Kì-têu tak-ngièn tai lî-vu̍t pûn kì, chhiong-he kîm-hi, ngiùn-hi, sâm-fu, vú-hi, hiông-liau, mâ lâu lò-è.
[26] Só-lò-mùn kien-li̍p yit-chhui yû yit-chhiên si-pak liòng chan-chhâ lâu yit-van lióng-chhiên chak chan-mâ ke khì-pîn-chhui. Kì chiông yit phu-fun ôn-phài to Yâ-lu-sat-lâng, khì-thâ ke fûn-chu to tak-ke sàng-sṳ.
[27] Chhai kì thúng-chhṳ khì-kiên, Yâ-lu-sat-lâng ke ngiùn-pi chhiong sa̍k-thèu án-tô, hiông-pak-su ya chhiong kô-ngièn ke sông-é-su án phû-phiên.
[28] Só-lò-mùn ke sên-lî ngìn tui Mu-chṳ̂-lì lâu Kî-li-kâ chin-khiéu mâ-é,
[29] ya tui Âi-khi̍p chin-khiéu chan-chhâ. Kì-têu chiông mâ-é lâu chan-chhâ chón-mai pûn Het-ngìn ke vòng lâu Si-li-â-ngìn ke vòng: Chan-chhâ yit-liòng liuk-pak chak ngiùn-pi; mâ-é yit-chak yit-pak ńg-sṳ̍p chak ngiùn-pi.