[1] Ko chhin-kiú yî-heu, thiên-hôn thi-sâm ngièn, Song-chú tui Yî-li-â kóng: “Ngì hi kien Â-ha̍p-vòng, Ngài oi lo̍k-yí chhai thi-song lé.”
[2] Yî-li-â chhiu hi, oi kien Â-ha̍p-vòng. Ke-sṳ̀, Sat-mâ-li-â ke kî-fông fî-sòng ngiàm-chhung;
[3] Â-ha̍p ham kón-lî vòng-kiûng sṳ-vu ke Ngò-pâ-tí lòi. (Ngò-pâ-tí he khièn-sṳ̀n kin-vi Song-chú ke ngìn.
[4] Yâ-sé-pit chhṳ̀ Song-chú ke siên-tî ke-sṳ̀, Ngò-pâ-tí kiu-chhut yit-pak ke siên-tî, chiông kì-têu fûn-cho lióng-chû, tak-chû ńg-sṳ̍p sà, khong chhai sân-lùng tú, yu kiûng-kip kì-têu sṳ̍t-vu̍t lâu súi.)
[5] Â-ha̍p tui Ngò-pâ-tí kóng: “Ngài-têu to koet-nui só-yû ke chhièn-ngièn lâu sân-lak hi chhìm, khon chhìm tet-tó chhiâng-chhó lòi hiuk mâ-é lâu lò-è mò; ngài-têu chhiu m̀-sṳ́ chhṳ̀-thet liá-têu thèu-sâng.”
[6] Só-yî kì-têu thùng-yi fûn-khôi to mò khiung-yong ke fông-hiong lâu thi-khî hi tá-tham.
[7] Chhai lu-song, Ngò-pâ-tí tù-tó Yî-li-â. Kì ngin-chhut he Yî-li-â, chhiu phu̍k chhai thi-song, mun: “Ngì ton-chṳ̂n he ngài ke chú Yî-li-â mò?”
[8] Yî-li-â kóng: “He! Ngì hi lâu vòng — ngì ke chú-ngìn kóng, Yî-li-â chhai liá-vi.”
[9] Ngò-pâ-tí kóng: “Phu̍k-ngìn fam má-ke chhui, ngì ngióng-oi chiông ngài kâu-pûn Â-ha̍p, pûn kì chhṳ̀ ngài nè?
[10] Ngài tui yún-sên Song-chú — ngì ke Song-ti fat-sṳ, mò-lun nai-pâng, nai-koet, ngài ke chú-ngìn lûng-chúng phai-ngìn hi chhìm ngì. Na-he yû-ngìn kóng ngì mò chhai ke-vi, kì chhiu oi ham ke-pâng ke-koet ke ngìn fat-sṳ kóng, ton-chṳ̂n chhìm ngì m̀-tó.
[11] Liá-ha ngì ngióng-pân tui ngài kóng: ‘Hi lâu ngì ke chú-ngìn kóng, Yî-li-â chhai liá-vi!’
[12] Chhai ngài lì-khôi yî-heu, na-he Song-chú ke Lìn tai ngì to nang-ngoi yit-ke ngài m̀-tî ke thi-fông, ngài yu lâu Â-ha̍p kóng ngì chhai liá-vi, kì chhìm m̀-tó ngì, yit-thin voi chhṳ̀-sí ngài. Ngì oi tî, phu̍k-ngìn chhiùng-se chhiu-he khièn-sṳ̀n kin-vi Song-chú ke ngìn.
[13] Kám mò-ngìn lâu ngâ chú kóng, Yâ-sé-pit chhṳ̀ Song-chú ke siên-tî ke-sṳ̀, ngài chiông yit-pak ke siên-tî khong chhai sân-lùng tú? Ngài chiông kì-têu fûn-cho lióng-chû khong hí-lòi, tak-chû ńg-sṳ̍p sà, ngài kiûng-kip kì-têu sṳ̍t-vu̍t lâu súi.
[14] Liá-ha ngì kóng: ‘Hi lâu ngì ke chú-ngìn kóng, Yî-li-â chhai liá-vi!’ Kì yit-thin voi chhṳ̀-sí ngài!”
[15] Yî-li-â kóng: “Ngài chṳ́-tén ngài só fu̍k-sṳ ke Song-chú — Van-kiûn ke Ngièn-soi fat-sṳ, kîm-pû-ngit ngài yit-thin oi pûn vòng khon-tó ngài.”
[16] Só-yî, Ngò-pâ-tí to Â-ha̍p-vòng ke-vi hi po-ko, Â-ha̍p chhiu hi kien Yî-li-â.
[17] Â-ha̍p khon-tó Yî-li-â chhiu kóng: “Met-sôi Yî-set-lie̍t ke chhiu-he ngì mò?”
[18] Yî-li-â kóng: “M̀-he ngài met-sôi Yî-set-lie̍t; he ngì lâu ngiâ-pâ ke kâ-chhu̍k! Ngì-têu vì-poi Song-chú ke min-lin, hi-thèn Pâ-li̍t.
[19] Liá-ha, hi seu-si̍p só-yû ke Yî-set-lie̍t-ngìn to Kâ-me̍t-sân kien ngài, yu oi tai-tén Yâ-sé-pit vòng-heu só-hiuk ke si-pak ńg-sṳ̍p ke Pâ-li̍t ke siên-tî lâu si-pak ke Â-sa-lâ ńg-sṳ̀n ke siên-tî khiung-ha lòi.”
[20] Só-yî, Â-ha̍p seu-si̍p só-yû ke Yî-set-lie̍t-ngìn lâu Pâ-li̍t ke-têu siên-tî sông Kâ-me̍t-sân.
[21] Yî-li-â khî chhut-lòi, tui ngìn-mìn kóng: “Ngì-têu sâm-sîm lióng-yi oi to kí-sṳ̀ nè? Na Song-chú he Song-ti, chhiu oi pai Song-chú; na Pâ-li̍t he Song-ti, chhiu pai Pâ-li̍t!” Chúng-he ngìn-mìn yit-ki fa ya m̀-kóng.
[22] Yî-li-â yu kóng: “Song-chú ke siên-tî chṳ́ chhûn-to ngài yit-sà, chúng-he Pâ-li̍t yû si-pak ńg-sṳ̍p ke siên-tî.
[23] Ngì-têu tai lióng-chak ngiù-kú lòi, pûn Pâ-li̍t ke siên-tî siên tho̍k yit-chak, ham kì-têu chiông ngiù chhṳ̀-thet, chhiet-cho yit-te yit-te, piong chhai chhèu-táng, m̀-hó tiám-fó; nang-ngoi yit-chak ngiù pûn ngài, ngài ya cheu án-ngiòng cho.
[24] Yèn-heu, Pâ-li̍t ke siên-tî hiong kì-têu ke sṳ̀n-mìn khì-tó, ngài hiong Song-chú khì-tó; ke kong-fó yin-tap khì-tó ke chhiu-he Song-ti!” Ngìn-mìn chhiòn-phu kóng: “Ngì án-ngiòng kóng tông-hó.”
[25] Yî-li-â tui Pâ-li̍t ke siên-tî kóng: “Ki-yèn ngì-têu ngìn tô, ngì-têu siên tho̍k yit-chak ngiù hi yi-phi! Hiong ngì-têu ke sṳ̀n-mìn khì-tó, chúng-he cho-m̀-tet tiám-fó.”
[26] Kì-têu chiông pûn kì-têu ke ngiù yi-phi hó-se, chhiu hiong Pâ-li̍t khì-tó, tui chêu-sṳ̀n-thèu yit-chhṳ̍t khiù-to tông-chu. Kì-têu chhin-hêm: “Pâ-li̍t â, tap-yin ngài-têu nâ!” Yu kín vì-tén kì-têu hí ke chi-thàn thiau-vú, chúng-he chhiòn mò fán-yin.
[27] Tông-chu ke sṳ̀, Yî-li-â met-sa kì-têu kóng: “Sê kha thai-sâng têu-é! Kì tông-yèn he sṳ̀n! Khó-nèn kì chhai ke-vi me̍t-sióng; khó-nèn kì chhin mò-hàn; ya khó-nèn chhut-hi lî-hàng lé. Mò yit-thin he soi-thet hi, ngì-têu hi hêm kì siáng!”
[28] Ke-têu siên-tî chhiu hàn-kha thai-sâng khì-tó, yu cheu kì-têu ke ngì-sṳt yung tô-é lâu tón-kiam kot-sông chhṳ-kâ, chhṳ̍t-to hiet liù mân-sṳ̂n.
[29] Kì-têu yit-chhṳ̍t chhin-sê chhin-hêm, tui tông-chu chhṳ̍t-to lìm-am-é hien-chi ke sṳ̀, hàn-he mò fán-yin, mò fì-tap, mò yit-si̍t-é sâng-yîm.
[30] Só-yî, Yî-li-â tui thai-chung kóng: “Ngì-têu to ngài liá-vi lòi!” Kì-têu chhiu chhiòn-phu vì-tén kì. Kì siên chiông fái-thet ke Song-chú ke chi-thàn cháng-hó.
[31] Yî-li-â nâ sṳ̍p-ngi te sa̍k-thèu, tak-te thoi-péu yit-ke kî-chhu̍k; liá-têu kî-chhu̍k chhiu-he cheu Ngâ-kok sṳ̍p-ngi ke lai-é ôn-miàng ke. Song-chú sṳt pûn Ngâ-kok yit-ke miàng ham-cho Yî-set-lie̍t.
[32] Yî-li-â yung liá-têu sa̍k-thèu hí yit-ke kin-pai Song-chú ke chi-thàn. Kì yu chhai chi-thàn si chû-vì yet kiêu-é, khó-yî chông sṳ̍p-si kûng-sṳ̂n kuk-chúng án-thai.
[33] Yèn-heu, kì chiông chhèu piong chhai thàn-táng, chiông ngiù-kú chhiet-cho yit-te yit-te, piong chhai chhèu-táng. Kì fûn-fu kóng: “Khâi si-thúng súi lòi, tó chhai chi-vu̍t lâu chhèu táng-kô.” Kì-têu cheu án-ngiòng hi-cho.
[34] Kì yu kóng: “Chai tó yit-pái!” Kì-têu chhiu chai tó yit-pái. Kì yu-chai kóng: “Tó thi-sâm pái!” Kì-têu chhiu tó thi-sâm pái.
[35] Súi liù-to chi-thàn ke si chû-vì, kiêu-é súi mân-mân.
[36] To lìm-am-é hien-chi ke sṳ̀, siên-tî Yî-li-â to chi-thàn chhièn khì-tó kóng: “Song-chú â, Â-pak-lâ-hón, Yî-sat, Ngâ-kok ke Song-ti â, khiù Ngì hién-mìn Ngì he Yî-set-lie̍t ke Song-ti, ya hién-mìn ngài he Ngì ke phu̍k-ngìn, ngài só-cho ke chhiòn-phu he cheu Ngì ke min-lin.
[37] Khiù Ngì tap-yin ngài! Song-chú â, tap-yin ngài, sṳ́ liá ngìn-mìn tî Ngì — Song-chú he Song-ti, yu tî he Ngì sṳ́ kì-têu fì-sîm chón-yi.”
[38] Song-chú chhiu kong-hâ fó lòi, sêu-thet sêu-fa-chi, chhèu, sa̍k-thèu, lâu nài, yu chiông kiêu-é ke súi sêu châu-thet.
[39] Mìn-chung khon-tó, chhiòn-phu chhiu phu̍k chhai thi-song, thai-sâng kóng: “Song-chú he Song-ti! Song-chú chang he Song-ti!”
[40] Yî-li-â ha-lin kóng: “Hi-chok Pâ-li̍t ke siên-tî, yit-ke ya m̀-hó pûn kì chéu-thet!” Mìn-chung chhiu chok-tó kì-têu. Yî-li-â tai kì-têu to Kî-hiun hò-sùn, chhai ke-vi chiông kì-têu chhṳ̀-thet.
[41] Yî-li-â tui Â-ha̍p-vòng kóng: “Liá-ha ngì cho-tet hi sṳ̍t hi lîm. Ngài yû thâng-tó lo̍k thai-yí ke hióng-sâng lé.”
[42] Â-ha̍p hi lîm-sṳ̍t ke sṳ̀, Yî-li-â sông-to Kâ-me̍t-sân táng, khúi chhai thi-song, thèu-nà piong chhai lióng-chak chhit-thèu tûng-ông.
[43] Kì tui kì ke phu̍k-ngìn kóng: “Ngì hi, hiong hói ke-phién khon.” Phu̍k-ngìn sông-hi khon-liáu chón-lòi, kóng: “Ngài mò khon-tó má-ke.” Yî-li-â ham kì chai ko-hi khon-kâ yit-pái, yit-khiung ham kì hi khon chhit-pái.
[44] Thi-chhit pái phu̍k-ngìn chón-lòi kóng: “Ngài khon-tó yit se-te yùn, hàn-mò ngìn ke sú pâ-chóng án-thai, tui hói ke-phién sông-lòi.” Yî-li-â fûn-fu phu̍k-ngìn: “To Â-ha̍p-vòng ke-vi hi lâu kì kóng, kón-kín chhô chan-chhâ chón-hi, na-mò, voi pûn thai-yí tóng-tó.”
[45] Ko yit-ha-é, ton-chṳ̂n vû-yùn mân-thiên, hí thai-fûng lo̍k thai-yí. Â-ha̍p chhiu chhô chan-chhâ, chón Yâ-sṳ̂-lie̍t hi.
[46] Song-chú ke nèn-li̍t lìm-to Yî-li-â, kì chhiu kiê-hèn yêu-tai, kón chhai Â-ha̍p thèu-chhièn, yit-chhṳ̍t chéu-to Yâ-sṳ̂-lie̍t.